ރާއްޖޭގެ ގައުމީ ޔުނިވަރސިޓީ އާއި ސްރީލަންކާގެ ސީ.އެސް.އީ.ސީ އާއި ދެމެދު އެމް.އޯ.ޔޫ އެއްގައި ސޮއިކޮށްފި
10 ޖޫން 2019 | ހޯމަ 14:56އިންޖިނިއަރިން ދާއިރާ އިން ފަންނީ އެހީތެރިކަންދޭނެ
ގައުމީ ޔުނިވަރސިޓީ އާއި ސްރީލަންކާގެ ސީ.އެސް.އީ.ސީ އާއި ދެމެދު އެމް.އޯ.ޔޫ އެއްގައި ސޮއިކުރުން
ދިވެހިރާއްޖޭގެ ގައުމީ ޔުނިވާސިޓީ (އެމް.އެން.ޔޫ) އަށް ފަންނީ އެހީތެރިކަން ފޯރުކޮށްދިނުމާ ބެހޭ އެމް.އޯ.ޔޫ އެއްގައި ސޮއި ކޮށްފިއެވެ.
މި އެމް.އޯ.ޔޫ އަކީ ސްރީލަންކާގެ ސިވިލް ސްޓްރަކްޗަރިންގ އެންޑް އިންޖިނިއަރިން ކޮންސަލްޓެންޓްސް ޕްރައިވެޓް ލިމިޓެޑް (ސީ.އެސް.އީ.ސީ / CSEC) ގެ ސީ.އެސް.އާރް ޕްރޮގްރާމްގެ ދަށުން، އެފަރާތުން އިސްނަގައިގެން ރާއްޖޭގެ ނެޝަނަލް ޔުނިވާސިޓީ އާ ދެމެދު މަޝްވަރާކުރުމަށް ފަހު ސޮއިކުރެވުނު އެމް.އޯ.ޔޫ އެކެވެ.
މި އެމް.އޯ.ޔޫގެ ދަށުން ރާއްޖޭގެ ޔުނިވާސިޓީގެ ދަރިވަރުންނަށް ފުރަތަމަ ޑިގްރީ ގެ ކޯސްތަކަށް ސްކޮލަޝިޕް ދިނުމާއި، ދަރިވަރުންގެ އިންޓާންޝިޕް ފުރިހަމަ ކުރުމަށް ބޭނުންވާ ތަޖުރިބާ ހޯދުމަށް އެހީތެރިވުމާ، ޔުނިވާސިޓީގެ ލެކްޗަރާއިންނަށް ފަންނީ ތަމްރީނު ދިނުން ހިމެނެއެވެ.
އަދި ރިސާޗް ހަދާ ދަރިވަރުންނަށް އޮސްޓްރޭލިއާގެ ޔުނިވާސިޓީ އޮފް މެލްބަން އިން ރިސާޗް އެސިސްޓެންސް ފޯރުކޮށްދިނުމާއި ދެ ޔުނިވާސިޓީގެ ދަރިވަރުން ގުޅިގެން އެކަޑަމިކް ލިޔުންތައް ޕަބްލިޝް ކުރުމުގެ ފުރުސަތު ވެސް ދަރިވަރުންނަށް ލިބިގެން ދާނެއެވެ.
ޕްރޮފެޝަނަލް ޑިވެލޮޕްމަންޓް ޕްރޮގްރާމް ތަކުގެ ތެރޭގައި ގެސްޓް ލެކްޗަރާއިންގެ ޓްރެއިނިންތަކުގައި ބައިވެރިވުމުމުގެ ފުރުސަތާއި ބައިނަލް އަގުވާމީ ކޮންފަރެންސް ތައް ރާއްޖޭގައި ބޭއްވުމުގެ ފުރުސަތުވެސް މި ފެކަލްޓީއަށް ލިބިގެންދާނެއެވެ. އަދި ސްރީލަންކާގެ އޯޕަން ޔުނިވަރސިޓީއާއި ގުޅިގެން ޑިސްޓަންސް-ލާނިންގ ޕްރޮގްރާމްތައް ހިންގުމަށް މަޝްވަރާކޮށްފައި ވެއެވެ.
މި އެމް.އޯ.ޔޫ ގައި ސޮއިކުރުމުގެ ރަސްމިއްޔާތުގައި ވާހަކަ ދައްކަވަމުން ސީ.އެސް.އީ.ސީގެ މެނޭޖިން ޑިރެކްޓަރ ޝިރޮމާލް ފެނާންޑޯ ވިދާޅުވީ އެ ކުންފުންޏަކީ ރާއްޖޭގައި މިހާރުވެސް އިންޖިނިއަރިން މަސައްކަތްތައް ކުރަމުން އަންނަ ބަޔަކަށްވާތީ، ހާއްސަކޮށް ރާއްޖޭގެ ޒުވާނުންނަށް ސްޓްރަކްޗަރަލް އިންޖިނިއަރިން ދާއިރާއިން ކުރިއަށް ދިޔުމަށް ބޭނުންވާ އެހީތެރިކަން ފޯރުކޮށްދިނުމަކީ ވަރަށްބޮޑު އުފަލެއް ލިބިގެންދާ ކަމެއް ކަމަށެވެ. އަދި އަލަށް ތައާރަފް ކުރެވޭ މޮޑިއުލާ ކޮންސްރަކްޝަން ޓެކްނޮލޮޖީއާއި ދެމެހެއްޓެނެވި، ތިމާވެއްޓަށް ގެއްލުން ނުލިބޭނެފަދަ 'ގްރީން ޓެކްނޮލޮޖީސް' ތަކުގެ ސަބަބުން، އިމާރާތްކުރުމުގެ ސިނާއަތް އިތުރަށް ފުޅާވެ، ތަނަވަސްވެގެން ދާނެކަމަށް އޭނާ ވިދާޅުވިއެވެ.
ސީ.އެސް.އީ.ސީ އަކީ ސްޓްރަކްޗަރަލް އިންޖިނިއަރިންގެ ދާއިރާއިން އެންމެ މަތީ ފަންތީގެ ކޮންސަލްޓެންސީ ފޯރުކޮށްދޭ ބައިނަލް އަގުވާމީ ކުންފުންޏެކެވެ.
އެފަރާތުން ހިންގާފައިވާ ފާހަނގަ ކޮށްލެވޭ ޕްރޮޖެކްޓްތަކުގެ ތެރޭގައި ސްރީލަންކާގެ ކޮލޮމްބޯ ލޮޓަސް ޓަވަރ، ކްރިޝް ސްކުވެއާ، ސިނަމަން ލައިފް، ކޮލޮމްބޯ ސިޓީ ސެންޓަރ، ޕްރައިމް ގްރޭންޑް، ޕާރލް ގްރޭންޑް، އަދި އެވިކް އެސްޓޮރިއޯ އެޕާރޓްމަންޓްސް ހިމެނެއެވެ. މީގެ އިތުރުން މިޔަންމާގެ ސްޓަރ ސިޓީ އަކީވެސް އެފަރާތުގެ އިންޖިނިއަރިން ކޮންސަލްޓެންސީގެ ދަށުން ހިންގަމުން އަންނަ ޕްރޮޖެކްޓެކެވެ. ސީއެ.ސް.އީ.ސީ ރާއްޖޭގެ ރަސްމީ އޭޖެންޓަކީ ނައިން ސިކްސްޓީ ހޯލްޑިންގްސް ޕްރައިވެޓް ލިމިޓެޑް އެވެ.
މި ކުންފުނީގެ ފަރާތުން ރާއްޖޭގައި ހިންގަމުން އަންނަ ޕްރޮޖެޓް ތަކުގެ ތެރޭގައި ބ. އަތޮޅުގައި ތަރައްގީކުރަމުން އަންނަ ވައްކަރު ލަގްޒަރީ ރިޒޯޓް އަދި މާލޭގައި އިމާރާތްކުރަމުން އަންނަ ނަސަންދުރަ ރެޒިޑެންސް ހިމެނެއެވެ.
އެހެން ކަމުން ރާއްޖޭގެ ޔުނިވާސިޓީ އަށް އިންޖިނިއަރިން ދާއިރާ އިން ފަންނީ އެހީތެރިކަން ދިނުމަށްޓަކައި މި އެމް.އޯ.ޔޫ ގައި ސޮއި ކޮށް މަސައްކަތް ފެށުން ވެގެންދާނީ އިންޖިނިއަރިންގެ ހިދުމަތްތައް ބޭނުންވާ ރާއްޖޭގެ ސިނާއަތްތަކުގައި މަސައްކަތް ކުރާ ފަރާތްތަކާ ގުޅުންބަދަހި ވެގެންދާނެ މުހިންމު ފިޔަވަޅެކެވެ.
ރާއްޖޭގެ ވިޔަފާރި މާހައުލު ދަނެގަތުމަށާއި ރާއްޖޭގެ ވިޔަފާރިތަކާއި ގުޅުން ދެމެހެއްޓުމަށްޓަކައި ސީ.އެސް.އީ.ސީ ގެ ފަރާތުން ރާއްޖޭގެ ސްޓެރެޖިކް ޕާޓްނަރެއްގެ ގޮތުގައި ހަމަ ޖައްސާފައިވާ ކޮންސަލްޓެންޓަކީ ނައިން ސިކްސްޓީ ހޯލްޑިންގްސް ޕްރައިވެޓް ލިމިޓެޑް އެވެ.
