ނައިބް ރައީސުންނާއި، ފަނޑިޔާރަށް އިނާއަތް ދިނުމަށް ހުށަހެޅީ ދައުލަތް ލޫޓުވަން: މެމްބަރު ސަލީމް
10 ޖޫން 2019 | ހޯމަ 11:57މިބިލް އަނބުރާ ފޮނުއްވާލުމަކީ ވަރަށް ޒިންމާދާރުކަމާއެކު ކުރެއްވި ކަމެއް
ހޯރަފުށީ ދާއިރާގެ މެމްބަރު އަހުމަދު ސަލީމް ރައްޔިތުންގެ މަޖިލީހުގެ ޖަލްސާގައި ވާހަކަދައްކަވަނީ
ރާއްޖޭގެ ނައިބް ރައީސްކަން ކުރައްވާފައިވާ ބޭފުޅުންނަށް އިނާއަތްތައް ދިނުމާ ބެހޭ ބިލާއި، ކުރީގެ އުއްތަމަ ފަޑިޔާރުކަން ކުރެއްވި ބޭފުޅުންނަށް އިނާއަތް ދިނުމާ ބެހޭ ބިލަކީ ދައުލަތް ލޫޓުވުމަށް ހުށަހަޅާފައިވާ ދެބިލް ކަމަށް ހޯރަފުށީ ދާއިރާގެ މެމްބަރު އަހުމަދު ސަލީމް (ސައްލެ) ވިދާޅުވެއްޖެ އެވެ.
ހޯމަ ދުވަހު ބޭއްވި ރައްޔިތުންގެ މަޖިލިސް ޖަލްސާގައި ވާހަކަދައްކަވަމުން މެމްބަރު ސަލީމް ވިދާޅުވީ ރާއްޖޭގެ ނައިބް ރައީސްކަން ކުރައްވާފައިވާ ބޭފުޅުންނަށް އިނާއަތްތައް ދިނުމާ ގުޅޭގޮތުން ކުރީގެ ރައްޔިތުންގެ މަޖިލީހުން ފާސްކުރެއްވި ގާނޫނު ތަސްދީގު ނުކުރައްވާ ރައީސުލްޖުމްހުރިއްޔާ އެ ބިލް އަނބުރާ ފޮނުއްވާލެއްވުމަކީ ވަރަށް ޒިންމާދާރުކަމާއެކު ކުރެއްވި ކަމެއް ކަމަށެވެ. ބިލްގައި ކަންބޮޑުވާ ބައެއްކަން ހުރިކަން ފާހަގަކުރައްވާ ސަލީމް ވިދާޅުވީ، އެ ބިލް ފާސްކޮށްފިނަމަ އެއީ މުސްތަޤުބަލަށް ޤާއިމްކުރެވޭ ނުރައްކާތެރި އުސޫލަކަށްވާނެކަމަށެވެ.
ސަލީމް ވިދާޅުވީ ވިސްނަންވީ ވަޒީފާ އަދާކުރުމަށްފަހު ވަޒީފާ އަދާކުރީތީ އިތުރަށް ދައުލަތުން އެއްޗެހި ހޯދަން ނޫން ކަމަށެވެ. އަދި އޭގެ ބަދަލުގައި ވަޒީފާ އަދާކުރުމަށްފަހު ދެން ލިބޭ އެންމެ ބޮޑު އިނާއަތާ ރައްކާތެރިކަމަކަށްވަނީ ދިވެހި ރައްޔިތުންގެ ފަރާތުން ލިބޭ ލޯތްބާއި، އޯގާތެރިކަން ކަމަށާއި، އެއަށްވުރެ ބޮޑު އިނާއަތެއް، އެއަށްވުރެ ބޮޑު ރައްކާތެރިކަމެއް ހޯދަން ހިޔާލަށް ގެނައުމީ ހަމަޖެހޭ ކަމެއް ނޫން ކަމަށެވެ.
ރާއްޖޭގެ ރަށްތަކުގެ ހާލަތަށް އަލިއަޅުއްވާލައްވާ ސަލީމް ވިދާޅުވީ މިއަދު ވެސް ކަރަންޓުގެ ހާލު ވަރަށް ދަށް ކިތަންމެ ރަށެއް އެބަހުރި ކަމަށާއި، ސިއްހީ ޚިދުމަތުގެ ފެންވަރު ރަނގަޅުކުރަން ނުޖެހޭ އެއްވެސް ރަށެއް ނެތް ކަމަށެވެ. އަދި ތައުލީމީ ހާލަތު ރަނގަޅުކުރަންޖެހޭ ކިތަންމެ ތަނެއް އެބަހުރި ކަމަށް އޭނާ ވިދާޅުވި އެވެ.
ކުރީގެ އުއްތަމަ ފަޑިޔާރުކަން ކުރެއްވި ބޭފުޅަކަށް އިނާއަތް ދިނުމާ ބެހޭ ގޮތުން މެމްބަރު ސަލީމް ވިދާޅުވީ ބިލް ފާސްކުރުމަށް ރައީސުލްޖުމްހޫރިއްޔާއަށް ފޮނުއްވުމަކީ ކުރީގެ ރައްޔިތުންގެ މަޖިލީހުން ހިންގި އެންމެ ދަށު ދަރަޖައިގެ އަމަލު ކަމަށެވެ.
ސަލީމް ވިދާޅުވީ މިދެބިލަކީ ވެސް ގައުމާއި، ރައްޔިތުންނަށް ގެއްލުންވާނެ ދެބިލް ކަމަށާއި، ތާއީދުކުރަނީ ބަލައި ނުގަނެ ފޮނުވާލަން ކަމަށެވެ.
