ސާކް ކައުންސިލް އޮފް އެކްސްޕަރޓްސް އޮފް އެނާރޖީ ރެގިއުލޭޓަރސްގެ 4 ވަނަ ބައްދަލުވުން ފަށައިފި
ޝަރަފުވެރިކޮށްދެއްވީ އިކޮނޮމިކް މިނިސްޓަރ ފައްޔާޒް އިސްމާއިލް
ސާކް ކައުންސިލް އޮފް އެކްސްޕަރޓްސް އޮފް އެނާރޖީ ރެގިއުލޭޓަރސްގެ 4 ވަނަ ބައްދަލުވުން
ސާކް ކައުންސިލް އޮފް އެކްސްޕަރޓްސް އޮފް އެނާރޖީ ރެގިއުލޭޓަރސްގެ ހަތަރު ވަނަ ބައްދަލުވުން ފަށައިފިއެވެ.
ހޯމަ ދުވަހު ހޮޓެލް ޖެންގައި ބޭއްވި މި ބައްދަލުވުމުގައި ޗީފް ގެސްޓެއްގެ ގޮތުން އިކޮނޮމިކް މިނިސްޓަރ ފައްޔާޒް އިސްމާއިލް ވެސް ބައިވެރިވެ ވަޑައިގެންފައިވާއިރު، މި ބައްދަލުވުމުގައި "ސާކް ފްރޭމްވޯރކް އެގްރީމަންޓް ފޮރ އެނާރޖީ ކޯޕަރޭޝަން" (އިލެކްޓްރިސިޓީ) ތަންފީޒުކޮށް ސާކް ސަރަހައްދުގެ ޤައުމުތަކުގެ މެދުގައި ކަރަންޓު ގަނެވިއްކުމުގެ ބާޒާރެއް އުފައްދައި، ޤައުމުތަކުގެ މެދުގައި އިޤްތިސާދީ ގުޅުން ވަރުގަދަ ކުރުމަށް މަގުފަހި ކޮށްދިނުމަށްޓަކައި އެކުލަވާލާފައިވާ ޑްރާފްޓާ ގުޅޭ ގޮތުން މަޝްވަރާ ކުރުމަށް ނިންމާފައިވާއިރު، އެ ޑްރާފްޓް ފައިނަލް ކުރުމަށް ކުރަންޖެހޭ ކަންކަމާ ގުޅޭ ގޮތުން މަޝްވަރާ ކުރުން ވެސް އޮންނާނެއެވެ.
މި ބައްދަލުވުމުގައި ސާކް ޤައުމުތަކުގެ މަންދޫބުން ބައިވެރިވާއިރު، ރާއްޖޭގެ މަންދޫބުން ހިމެނޭ ގޮތަށް ޖުމުލަ 23 މަންދޫބަކު ބަައިވެރިވެއެވެ.
މި ބައްދަލުވުމުގައި ވާހަކަފުޅު ދައްކަވަމުން މިނިސްޓަރ ފައްޔާޒް ވަނީ މި ބައްދަލުވުމުގެ މުހިއްމުކަމާ ގުޅޭ ގޮތުން ވާހަކަދައްކަވައި، ދެމެހެއްޓެނިވި ގޮތެއްގައި ރައްޔިތުންނަށް އަގުހެޔޮކޮށް ކަރަންޓު ފޯރުކޮށްދިނުމަށް ސަރުކާރުން ކުރާ މަސައްކަތްތަކާ ގުޅޭ ގޮތުން ވާހަކަފުޅު ދައްކަވާފައެވެ. އެގޮތުން މިނިސްޓަރ ވިދާޅުވީ، ކަރަންޓުގެ އަގު ބޮޑުވުމަކީ ކުރިމަތިވެފައިވާ ވަރަށް ބޮޑު ގޮންޖެހުމެއް ކަމަށެވެ.
ސާކް ފްރޭމްވޯރކް އެގްރީމަންޓަކީ ސާކް ޤައުމުތަކުގެ މެދުގައި ހަކަތައިގެ ގުޅުން ވަރުގަދަ ކުރުމަށް 2017 ވަނަ އަހަރު އައްޑޫ ސިޓީގައި އޮތް 17 ވަނަ ސާކް ސަމިޓުގައި އެކުލަވާލި އެގްރީމަންޓެކެވެ. އޭގެ ފަހުން ސާކްގެ ޤައުމުތަކުގެ މެދުގައި އެ ޤައުމެއްގެ ޤާނޫނުތަކާއި ޤަވާއިދުތަކާ އެއްގޮތްވާ ގޮތުގެ މަތިން ވޮލަންޓިއަރކޮށް ކަރަންޓު ގަތުމަށް ރާއްޖެއިން ވަނީ 2014 ވަނަ އަހަރު ސޮއިކޮށްފައެވެ. އެގޮތުން އެ މަސައްކަތްތައް ކުރިއަށް ގެންދިއުމަށްޓަކައި އެނާރޖީ ރެގިއުލޭޓަރސް އެކްސްޕާރޓުންގެ ކައުންސިލެއް 2016 ވަނަ އަހަރު އެކުލަވާލާފައިވާއިރު، މިއަދު ބޭއްވިފައިވަނީ އޭގެ 4 ވަނަ ބައްދަލުވުމެވެ.
