ޤައުމީ އިނާމަށް ނަން ހުށަހެޅުމުގެ ފުރުޞަތު ހުޅުވާލައިފިއެވެ.

ރައީސް އޮފީހުން ގެޒެޓް ކޮށްފައިވާ އިއުލާނެއްގައި ބުނެފައިވަނީ މި އަހަރުން ފެށިގެން ގައުމީ އިނާމު ދިނުން އޮންނާނީ ގައުމީ ދުވަހުގެ މުނާސަބަތުގައި ބާއްވާ ޖަލްސާގައި ކަމަށެވެ. މީގެ ކުރިން ގައުމީ އިނާމު ވެސް ދެމުން އައީ ޖުމްހޫރީ ދުވަހުއެވެ.

އިއުލާނުގައިވާ ގޮތުން، ގައުމީ އިނާމު ދިނުމަށް މި ފަހަރު ވެސް ހަމަޖެހިފައި ވަނީ 33 ދާއިރާއަކުންނެވެ. އަދި އެ ދާއިރާތަކުން އިނާމު ދޭ ރޮނގުތަކާ ގުޅޭ ގޮތުން ސަރުކާރުގެ މިނިސްޓްރީތަކާއި އެހެނިހެން މުއައްސަސާތަކުގެ ހިޔާލު ހޯދައި ގެންނަން ޖެހޭ ބަދަލުތައް ގައުމީ އިނާމާ ބެހޭ ކޮމިޓީން ގެނެސްފައިވާ ކަމަށް އިއުލާނުގައި ވެއެވެ.

ކުރީ އަހަރުތަކެކޭ އެއްގޮތަށް މ،ި ފަހަރު ވެސް ގައުމީ އިނާމަށް ކުރިމަތިލާ އަމިއްލަ ފަރާތްތަކުންނާއި އެހެން ފަރަތެއްގެ ނަން ހުށަހަޅާ ފަރާތްތަކުންނާއި ކުންފުނިތަކުން އަދި ޖަމުއިއްޔާ ޖަމާއަތް ފަދަ ތަންތަނުން ވެސް ސަރުކާރުގެ އިދާރާއެއް މެދުވެރިނުކޮށް ނަން ހުށަހެޅޭ ގޮތަށް ވަނީ ހަމަޖައްސާފައެވެ.

މީގެ އިތުރުން، ސަރުކާރުގެ އިދާރާތަކުންނާއި މިނިވަން މުއައްސަސާތަކުން ގައުމީ އިނާމަށް ނަން ހުށަހެޅޭ ގޮތަށް ވެސް ވަނީ ހަމަޖައްސާފައެވެ. އެގޮތުން، ގައުމީ އިނާމަށް ވަކިވަކި ފަރުދުންގެ ނަން ހުށަހެޅުމަށް ހަމަޖެހިފައި ވަނީ އެކަމަށް ކަނަޑައެޅިފައިވާ ފޯމުގައެވެ. އަދި ކުންފުނިތަކާއި ޖަމުއިއްޔާ ފަދަ ތަންތަނުން ވެސް ނަން ހުށަހަޅަން ޖެހެނީ ފޯމުތަކުގައެވެ.

އިނާމަށް ނަން ހުށަހެޅޭނީ އަންނަ ޖުލައި މަހުގެ 31 ވާ ބުދަ ދުވަހުގެ މެންދުރު ފަހު 2:00 އާ ހިސާބަށެވެ.

ޤައުމީ އިނާމަށް ނަން ހުށަހަޅާ ފޯމު، ރަސްމީ ގަޑީގައި ރައީސުލްޖުމްހޫރިއްޔާގެ އޮފީހުން ލިބެން ހުންނާނެ ކަމަށް އިއުލާނުގައި ވެއެވެ. އަދި www.presidencymaldives.gov.mv އިން ޑައުންލޯޑު ވެސް ކުރެވޭނެއެވެ.

ގައުމީ އިނާމާ ބެހޭ މައުލޫމާތު މައުލޫމާތު ދިނުމަށާއި ހޭލުންތެރިކަން އިތުރުކުރުމަށް ހާއްސަ ޕްރޮގްރާމްތަކެއް ކުރިއަށް ގެންދިއުމަށް ނިންމާފައިވާ ކަމަށް ގައުމީ އިނާމާ ބެހޭ ކޮމިޓީން ވަނީ ބުނެފައެވެ.