ދިވެހިރާއްޖޭގެ ގައުމީ އެއާލައިން, މޯލްޑިވިއަންގެ ސްޓާފުންތަކެއް އެއްފަހަރަކާ ވަޒީފާއިން ވަކިވި ކަމަށް ދެކެވޭ ވާހަކަ އެ އެއާލައިނުން ދޮގުކޮށްފިއެވެ.
މޯލްޑިވިއަންގެ ގިނަ ޕައިލެޓުން ތަކެއް މަގާމުން އިސްތިއުފާ ދިން ކަމުގެ މައުލޫމާތު ހިމެނޭ ލިސްޓެއް ޓްވިޓާގައި ދަނީ ދައުރުވަމުންނެވެ. އެ ލިސްޓުގައި އެ ޕައިލެޓުންގެ ނަމާއި މަގާމުވެސް ވަނީ ހިމަނާފައެވެ.
އެ ލިސްޓުގައި ހިމަނާފައިވާ މައުލޫމާތު ބަލާއިރު، އާދިއްތަ ދުވަހު ތިން ޕައިލެޓަކު ވަނީ މަގާމުން އިސްތިއުފާ ދީފައެވެ. މައުލޫމާތު ލިބިފައިވާ ގޮތުގައި އެ ތިން ޕައިލެޓުންނަކީ މޯލްޑިވިއަންގެ ކުރީގެ ޑިރެކްޓަރ އޮފް ފްލައިޓް އޮޕަރޭޝަން އަމީންއާ ގާތް ގުޅުމެއް އޮންނަ މީހުންނެވެ. ބައެއް ޕައިލެޓުން ތުހުމަތު ކުރާ ގޮތުން އަމީން އަކީ މޯލްޑިވިއަން ގައި ނޫފޫޒު ގަދަ މީހެކެވެ.
އެ ލިސްޓުގައިވާ ގޮތުން ހަތަރު ޕައިލެޓަކު ވަނީ އިސްތިއުފާ ދިނުމަށްފަހު ޓްރާންސް މޯލްޑިވިއަން އެއާރވެސް (ޓީއެމްއޭ) އާ ގުޅިފައެވެ.
ޕައިލެޓުންތަކެއް އިސްތިއުފާ ދިން ކަމަށް ދެކެވޭ ވާހަކަތަކާ ބެހޭ ގޮތުން އާދިއްތާ ދުވަހު ގައުމީ އެއާލައިނުން ކުރި ޓްވީޓެއްގައި ބުނީ، އެ ކުންފުނީގެ ޓެކްނިކަލް ސްޓާފުންތަކެއް އެއްފަހަރާ ވަޒީފާއިން ވަކިވި ކަމަށް ދައުރުވާ މެސެޖަކީ ސައްހަ މަޢުލޫމާތެއް ނޫން ކަމަށެވެ. އަދި ކުންފުނީގެ އޮޕަރޭޝަނަށް ބުރޫ އަރާފަދަ އެއްވެސް ކަމެއް ނުހިނގާކަން ޔަގީންކަން އަރުވާ ކަމަށްވެސް މޯލްޑިވިއަނުން ބުންޏެވެ.
މޯލްޑިވިއަންގެ ޕަބްލިކް ރިލޭޝަންސް އެންޑް ކޮމިއުނިކޭޝަންސް މެނޭޖަރު މޫސާ ވަސީމް ވިދާޅުވީ، އެ ލިސްޓު ސަމާލު ކަމަށް އައިސްފައިވާ ކަމަށެވެ. ލިސްޓުގައި ކުރިން އިސްތިއުފާދިން ބައެއް ޕައިލެޓުން ހިމެނޭ ކަމަށް އޭނާ ވިދާޅުވިއެވެ. އެހެން ނަމަވެސް ޕައިލެޓުންގެ ތެރޭގައި މައްސަލައެއް ޖެހިގެން ނޫޅެކަން މޫސަ ފާހަގަ ކުރެއްވިއެވެ.
މޯލްޑިވިއަނުން އެ ކުންފުނީގެ ގިނަ ޕައިލެޓުންތަކެއް ވަޒީފާއިން ވަކި ނުވާކަމަށް ބުނެފައިވާއިރު، މިމަހުގެ ކުރީކޮޅު މޯލްޑިވިއަންގެ ޑައިރެކްޓަރ އޮފް ފްލައިޓް އޮޕަރޭޝަންސް ކެޕްޓަން އަމީން މަގާމުން ވަނީ ދުރުކޮށްފައެވެ. އޭނާ މަގާމުން ދުރުކުރަން ނިންމީ ބޯޑުގެ ލަފާގެ މަތިންނެވެ. އެހެން ނަމަވެސް އޭނާ އެ ކުންފުނިން ވަކި ކޮށްފައެއް ނުވެއެވެ. އަމީން އާ ދެކޮޅަށް މީގެ ކުރިން ފަންސަވީހަކަށް ވުރެ ގިނަ ޕައިލެޓުން ވަނީ އިހްތިޖާޖުކޮށްފައެވެ.
