ނޭމާ ކުޅުމާ ދުރުގައި ހުންނަން ޖެހޭނީ ހަތަރު ހަފްތާއަށް

ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ ބްރެޒިލްގެ ފޯވާޑް ނޭމާއަށް ލިބުނު އަނިޔާއާއެކު ހަތަރު ހަފްތާއެއްހާ ދުވަސް ކުޅުމާ ދުރުގައި ހުންނަންޖެހޭނެކަން ކަށަވަރުވެއްޖެއެވެ.

ނޭމާއަށް އަނިޔާވީ ބުދަ ދުވަހު ގަތަރު އަދި ބްރެޒިލް ބައްދަލުކުރި ރަހުމަތްތެރިކަމުގެ މެޗެއްގައެވެ. އެ މެޗުގައި ނޭމާ ފައިގެ ތަނބިކައްޓަށް ވަނީ އަނިޔާވެފައެވެ.

އަނިޔާގެ ސަބަބުން މި މަހު ފަށާ ކޮޕައެމެރިކާއިންވެސް ނޭމާއަށް ފުރުސަތު ގެއްލިފައިވާކަން ބްރެޒިލް ގައުމީ ޓީމުން ވަނީ ކަށަވަރުކޮށްދީފައެވެ. އޭނާގެ ބަދަލުގައި ސްކޮޑަށް ނަގާފައިވަނީ ޗެލްސީގެ ވިންގާ ވިލިއަންއެވެ.

މި ސީޒަނުގައި ޕީއެސްޖީއަށް ނޭމާ ކުޅުނު 28 މެޗުގައި ވަނީ 23 ލަނޑު ކާމިޔާބުކޮށްފައެވެ. އޭނާ ވަނީ ބްރެޒިލް ގައުމީ ޓީމަށް މިހާތަނަށް ކުޅުނު 97 މެޗުގައި 60 ލަނޑު ކާމިޔާބުކޮށްފައެވެ.

ކޮޕަ އެމެރިކާއަށް ތައްޔާރުވުމުގެ ގޮތުން ބްރެޒިލްއިން އަންނަނީ ރަހުމަތްތެރިކަމުގެ މެޗުތައް ވެސް ކުޅެމުންނެވެ. އެގޮތުން އަންނަ އާދީއްތަ ދުވަހު ހޮންޑިއުރަސްއާ ދެކޮޅަށް ރަހުމަތްތެރިކަމުގެ މެޗެއްގައި ބްރެޒިލް ނިކުންނާނެއެވެ.

މި މަހު ފަށާ ކޮޕަ އެމެރިކާ މުބާރާތުގައި ބްރެޒިލް ހިމެނެނީ ބޮލީވިއާ އާއި ވެނެޒުއޭލާ އާއި ޕެރޫއާ އެކު އެއް ގްރޫޕެއްގައެވެ.