ބޮޑުވަޒީރު މޯދީގެ ދަތުރުފުޅާ ގުޅިގެން ބްރިޖު ބަންދެއް ނުކުރާނެ: ފުލުހުން
8 ޖޫން 2019 | ހޮނިހިރު 10:53ބައެއް މަގުތައް އެއްކޮޅަށް ދުއްވޭ ގޮތަށް (ވަންވޭ) ވަނީ ބަދަލުކޮށްފައި
އިންޑިއާގެ ބޮޑުވަޒީރު މޯދީގެ ދަތުރުފުޅާ ގުޅިގެން މަގުތައް ޒީނަތްތެރިކޮށްފައި
އިންޑިއާގެ ބޮޑުވަޒީރު ރާއްޖެއަށް ކުރައްވާ ދަތުރުފުޅާ ގުޅިގެން ހޮނިހިރު ދުވަހު ސިނަމާލެ ބްރިޖު ބަންދު ކުރަން ހަމަޖެހިފައި ނުވާ ކަމަށް ފުލުހުން ވިދާޅުވެއްޖެއެވެ.
ބޮޑުވަޒީރު މޯދީގެ ދަތުރުފަތުރުގެ ސަބަބުން ބްރިޖްގައި ބަންދުކުރެވިގެންދާނެތޯ، ގިނަ ބަޔަކު އުފެއްދި ސުވާލަށް ޖަވާބު ދެމުން، ފުލުހުން ބުނެފައިވަނީ ބޮޑުވަޒީރު މޯދީގެ ދަތުރުފުޅުގެ ސަބަބުން ބްރިޖްގެ ދަތުރު ފަތުރަށް ދަތި ކަމެއް ނާންނާނެ ކަމަށެވެ.
ބޮޑުވަޒީރު މޯދީގެ ދަތުރުފުޅާ ގުޅިގެން ސެކިއުރިޓީ ބޭނުމަށް، ޗާޓުގައި ރަތްކުލައިން ފާހަގަކޮށްފައިވާ ޒޯންތަކުގައި މި މަހުގެ 7 ވަނަ ދުވަހުގެ އިރުއޮއްސި 6:00 އިން ފެށިގެން މި މަހުގެ 9 ވަނަ ދުވަހުގެ ރޭ 10:00 އަށް އެއްގަމު އުޅަނދު ޕާކު ކުރުމަކީ މަނާ ކަމެއް ކަމުގައި ވެސް ފުލުހުން ބުނެފައި ވެއެވެ.
މީގެ އިތުރުން، ގްރީން ޒޯނާ އެކު އިންވެގެން ހުރި މަގުތައް ވެސް ބަންދުކުރުމަށް ނިންމާފައިވާއިރު، ބައެއް މަގުތައް އެއްކޮޅަށް ދުއްވޭ ގޮތަށް (ވަންވޭ) ހެދުމަށް ނިންމާފައިވާ ކަމަށް ފުލުހުން ބުންޏެވެ. އަދި ގްރީން ޒޯނާ އެކު ހުޅުމާލޭގެ ބޮޑު ސަރަހައްދެއް ވެސް ބަންދުކުރަން ވަނީ ނިންމައިފައެވެ.
އިންޑިއާގެ ބޮޑުވަޒީރުގެ މަގާމަށް ދެ ވަނަ ދައުރަކަށް އިންތިހާބުވެ ވަޑައިގެންނެވި ނަރެންދުރަ މޯދީ މަގާމާ ހަވާލުވެވަޑައިގަތުމަށް ފަހު ފުރަތަމަ ފަހަރަށް އިންޑިއާ އިން ބޭރަށް ކުރައްވާ ދަތުރުފުޅުގައި ރާއްޖެ ވަޑައިގެން، ރައްޔިތުންގެ މަޖިލީހުގައި ތަގުރީރު ކުރެއްވުމަށް ދައުވަތު ދިނުމަށް މަޖިލީހުން ފާސްކޮށްފައި ވަނީ 29 މެއިގައި އޮތް ރައްޔިތުންގެ މަޖިލީހުގެ ޖަލްސާގައެވެ.
