ހަ ރޯދައިގެ ދުވަސްވަރު ކަންކަން ރާވާއިރު ފަރުޟު ނަމާދުގެ ވަގުތުތަކަށް ސަމާލުވުމަށް ޕީޢެންސީން ގޮވާލައިފި

މިއީ ހަ ރޯދައިގެ ދުވަސްވަރު ކަމުން، އިންޑިއާގެ ބޮޑުވަޒީރު ނަރެންދުރަ މޯދީ ރާއްޖެއަށް ކުރައްވާ ދަތުރުފުޅުގެ އިންތިޒާމްތައް ރާވާއިރު، ފަރުޟު ނަމާދުގެ ވަގުތުތަކަށް އަހައްމިއްޔަތުކަން ދިނުމަށް ޕީޕަލްސް ނޭޝަނަލް ކޮންގްރެސް (ޕީއެންސީ) އިން ބުނެފިއެވެ.

ހުކުރު ދުވަހު އެ ޕާޓީން ނެރުނު ނޫސްބަޔާނެއްގައި ބުނީ، މިހާރުގެ އިންތިޒާމުތަކަށް ބަލާއިރު، މި ހިނގާ ހަ ރޯދައިގެ ދުވަސްތަކުގެ ދުވަހެއްގެ މަޢުރިބް ނަމާދަށް ފުރުސަތު ނުލިބޭ ކަމަށް ފާހަގަކުރެވޭ ކަމަށާއި، ފަރުޟު ނަމާދުގެ ފުރުސަތު މެމްބަރުންނަށް ގެއްލޭނެ ފަދަ ގޮތަކަށް އިންތިޒާމުތައް ނުކުރެއްވުމަށް ރައްޔިތުންގެ މަޖިލީހުގެ ރައީސާއި ދައުލަތަށް ގޮވާލާ ކަމަށެވެ.

ޕީއެންސީން އެހެން ބުނެފައިވާއިރު، ހޮނިހިރު ދުވަހު ރަސްމީ ދަތުރުފުޅެއްގައި ރާއްޖެއަށް ޒިޔާރަތް ކުރައްވާ ނަރެންދްރާ މޯދީ, ރައްޔިތުންގެ މަޖިލީހުގައި ތަގްރީރު ކުރެއްވުމަށް ހާއްސަކޮށްގެން ބާއްވާ ރައްޔިތުންގެ މަޖިލީހުގެ ޖަލްސާ އޮންނާނީ މަޢްރިބް ނަމާދަށް ފަހު ކަމަށް މަޖިލީހުގެ އިދާާރާއިން ވަނީ ބުނެފައެވެ. އަދި އެގޮތަށް ހަމަޖެއްސެވީ ބޮޑު ވަޒީރު ތަގްރީރު ކުރެއްވުމަށް ހާއްސަކޮށްގެން ބާއްވާ ޖަލްސާ ބޭއްވުމަށް ހަމަޖެހިފައިވާ ވަގުތަކީ މަޢްރިބް ނަމާދު ވަގުތާ ކައިރި ވަގުތަކަށް ވާތީއާ ނާމަދު ކުރުމަށް މަޖިލީހުގެ މެމްބަރުންނަށް ފުރުސަތު އެރުވުމުގެ ގޮތުން ކަމަށް މަޖިލިސް އިދާރާއިން ވަނީ ބުނެފަައެވެ.

ޕީއެންސީގެ ބަޔާނުގައި އިތުރަށް ބުނީ، ދިވެހިރާއްޖޭގެ އަމިއްލަ ވެރިކަމާއި، ސިޔާދަތު އަދި އިޤްތިސާދީ ގޮތުން ވަކި ބަޔަކަށް ބަރޯސާވާން ޖެހޭވަރުގެ ގެއްލުމެއް ވެދާނެ ފަދަ ކަމެއް ނުކުރުމަށް ދިިވެހި ސަރުކާރަށް އިލްތިމާސްކުރާ ކަމަށާއި، ބޮޑުވަޒީރުގެ ދަތުރުފުޅުގެ ކަންކަން ރާވާއިރު، ދިވެހިރާއްޖޭގެ ސަޤާފަތާއި، ރައްޔިތުންގެ ކަންބޮޑުވުންތަކަށް އިހުތިރާމް ކުރެއްވުމަށް އެދިލައްވާ ކަމަށެވެ.

އޭގެ އިތުރުން، ދިވެހި ރައްޔިތުންނަށް އަދި ދިވެހިރާއްޖެއަށް ހުތުރު ނަމެއް ލިބޭނެ ފަދަ އެއްވެސް ކަމެއް އެ ޕާޓީން ނުކުރާނެ ކަމަށް ވެސް އެ ޕާޓީން ވަނީ ބުނެފައެވެ.