ޗިކުންގުންޔާ ޖެހިގެން މިއަހަރުގެ މިހާތަނަށް 1190 ކޭސް ރިޕޯޓުކޮށްފައިވޭ: އެޗްޕީއޭ
6 ޖޫން 2019 | ބުރާސްފަތި 13:50ޗިކުންގުންޔާ ޖެހިގެން އެންމެ ގިނައިން ރިޕޯޓުކޮށްފައިވަނީ ރ، ގއ އަދި މާލެއިން
މީހަކު ސިއްހީ ފަރުވާ ހޯދަނީ
ޗިކުންގުންޔާ ޖެހިގެން މިއަހަރުގެ މިހާތަނަށް 1190 ކޭސް ރިޕޯޓުކޮށްފައިވާ ކަމަށް ހެލްތް ޕްރޮޓެކްޝަން އެޖެންސީން (އެޗްޕީއޭ) އިން ބުނެފިއެވެ.
އެޗްޕީއޭއިން ބުނީ ޗިކުންގުންޔާގެ ހާލަތަށް ބަލާއިރު ޖަނަވަރީ މަހުން ފެށިގެން ޖޫން މަހުގެ މިހާތަނަށް ޗިކުންގުންޔާ ޖެހިގެން ރިޕޯޓުކޮށްފައިވާ އަދަދު ވަނީ އިތުރުވެފައިވާ ކަމަށެވެ. އަދި މިހާތަނަށް 1190 ކޭސް ރިޕޯޓުކޮށްފައިވާ ކަމަށް އެޗްޕީއޭއިން ބުންޏެވެ.
އެޗްޕީއޭއިން ބުނީ ޗިކުންގުންޔާ ޖެހިގެން މިހާތަނަށް އެންމެ ގިނައިން ރިޕޯޓުކޮށްފައިވަނީ ރ، ގއ އަތޮޅުން އަދި މާލެއިން ކަމަށެވެ. މީގެ އިތުރުން އެޗްޕީއޭއިން ބުނީ މިއަހަރުގެ މިހާތަނަށް ޑެންގީ ހުން ޖެހިގެން 2411 ކޭސް ވަނީ ރިޕޯޓުކޮށްފައިވާ ކަމަށެވެ.
އެޗްޕީއޭއިން ބުނީ ވޭތުވެދިޔަ ތިން އަހަރުގެ މިދުވަސްވަރު އަޅާބަލާއިރު މިއަހަރުގެ މިދުވަސްވަރު ޑެންގީ ހުން ޖެހިގެން ރިޕޯޓުކުރަމުންދާ އަދަދު އަދިވެސް ގިނަ ކަމަށެވެ. ނަމަވެސް މިއަހަރުގެ އޭޕްރީލް މަހާ އަޅާބަލާއިރު މޭ މަހު ރިޕޯޓުކޮށްފައިވާ އަދަދު ދަށަށް ގޮސްފައިވާ ކަމަށް އެޗްޕީއޭއިން ބުންޏެވެ.
އެޗްޕީއޭއިން ބުނީ މެއި އަދި ޖޫން މަހު ޑެންގީ ހުން ޖެހިގެން އެންމެ ގިނައިން ރިޕޯޓުކޮށްފައިވަނީ ހދ، ރ ، އަދި ދ، އަތޮޅުން ކަމަށެވެ.
