ކޮޅިގަނޑެއްގައި ބިލެއްދޫ ބަނދަރު ތޮށީގެ ބޮޑު ބައެއް ވެއްޓި ހަލާކުވެއްޖެ
6 ޖޫން 2019 | ބުރާސްފަތި 07:05ބަނދަރު ތޮށީގެ ގާތްގަނޑަކަށް 100 ފޫޓަށްވުރެ ބޮޑު ބައެއް ވެއްޓި ހަލާކުވެފައިވޭ
ފ ބިލެއްދޫ ބަނދަރު
ރާއްޖެއަށް މިހާރު ކުރަމުންދާ ހުޅަނގު މޫސުމުގެ ވިއްސާރައިގައި އައި ކޮޅިގަނޑެއްގައި ފ. ބިލެއްދޫ ބަނދަރު ތޮށިގަނޑުގެ ބޮޑު ބައެއް ވެއްޓި ހަލާކުވެއްޖެއެވެ.
އެކަމާ ގުޅޭ ގޮތުން "ރާއްޖެއެމްވީ"އަށް މައުލޫމާތު ދެއްވަމުން ބިލެއްދޫ ކައުންސިލުގެ ރައީސް އިހުސާން ވިދާޅުވީ ބޯކޮށް ވާރޭ ވެހި، ވައި ގަދަވުމުގެ ސަބަބުންނާއި ކަނޑުގަދަވުމުގެ ސަބަބުން ބިލެއްދޫ ބަނދަރު ތޮށީގެ ގާތްގަނޑަކަށް 100 ފޫޓަށް ވުރެ ބޮޑު ބައެއް ވެއްޓި ހަލާކުވެފައިވާ ކަމަށާއި، ބޭރު ތޮށި ވެއްޓިފައި އޮތުމުގެ ސަބަބުން ބަނދަރު ތެރެއަށް ރާޅުއަރަމުންދާ ކަމަށެވެ. އަދި އޭގެ ސަބަބުން ބަނދަރު ތެރޭގައި ހުރި އޮޑިދޯނިފަހަރަށް ގެއްލުންވެ ބަނދަރު ބޭނުން ނުކުރެވޭވަރު ވަމުންދާ ކަމަށް އިހުސާން ވިދާޅުވިއެވެ.
އިހުސާން އިތުރަށް ވިދާޅުވީ، މި މައްސަލަ ޑިޒާސްޓަރ މެނޭޖްމަންޓް އޮތޯރިޓީގެ ސަމާލުކަމަށް ވެސް ގެނެސްފައިވާ ކަމަށާއި، އަވަސް ހައްލެއް ނުލިބިއްޖެ ނަމަ ބިލެއްދޫ ރައްޔިތުންނަށް ބަނދަރު ބޭނުން ނުކުރެވޭ ހިސާބަށް ހަލާކުވެދާނެ ކަމަށް ބެލެވޭ ކަމަށެވެ. އެގޮތުން ހުޅަނގު މޫސުން ވެސް ފެށިފައިވުމާ އެކު، މިކަމަށް އަވަސް ހައްލެއް ނުލިބިއްޖެ ނަމަ ބަނދަރަށް ލިބެމުންދާ ގެއްލުންތައް އިތުރުވަމުންދާނެ ކަމަށް ވެސް އޭނާ ވިދާޅުވިއެވެ. އަދި އެއީ އެރަށު ވަރަށް ގިނަ ރައްޔިތުންގެ ކަންބޮޑުވުމެއް ކަމަށް ވެސް އިހުސާން ވިދާޅުވިއެވެ.
އާބާދީގައި ގާތްގަނޑަކަށް 1346 މީހުން ދިރިއުޅޭ ބިލެއްދޫގެ ބަނދަރު ހަލާކުވެފައި ވުމުގެ ސަބަބުން އެރަށަށް ލަފާ ފުރުމުގައި ބޮޑެތި ދަތިތަކާ ކުރިމަތިލާންޖެހޭ ކަމަށް ރަށުން ވާހަކަދެއްކި ބައެއް ފަރާތްތަކުން ވެސް ފާހަގަކޮށްފައި ވެއެވެ.
