މިމަހުގެ ތިން ވަނަ ދުވަހުގެ ރޭގެ ވަގުތެއްގައި ފުލުހުން ހިންގި ޚާއްސަ އޮޕަރޭޝަނެއްގައި ކޯޓު އަމުރެއްގެ ދަށުން ހައްޔަރު ކުރި ދެ މީހުންނަށް މުއްދަތު ޖަހައި ނުދިނީ ގަވައިދާ އެއްގޮތަށް އައިއޯއެއް (ތަހުގީގުކުރުމުގެ މަސައްކަތް ހަވާލުވެފައިވާ ފަރާތް) ނުފޮނުވުމުން ކަމަށް ހުޅުމާލޭ ކޯޓުން ބުނެފިއެވެ.
ކޯޓުތަކާއި ބެހޭ މައި މަރިކަޒު ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) ގެ މީޑިއާ އޮފިޝަލް ފައިސަލް އާދަމް ރާއްޖެއެމްވީއަށް ވިދާޅުވީ ހައްޔަރުކުރި މީހުންނަށް މުއްދަތު ޖަހައި ނުދިނީ ގަވައިދާ އެއްގޮތަށް އައިއޯ އެއް ނުފޮނުވުމުން ކަމަށެވެ.
ދެވަނަ ފަހަރަށް އެމީހުން ހައްޔަރުކޮށްގެން މުއްދަތު ޖަހަން ހުލުމާލޭ ކޯޓަށް ގެންދިއުމުން އެމީހުން ދޫކޮށްލާފައިވަނީ ބުދަ ދުވަހުއެވެ.
އަންގާރަ ދުވަހު ވެސް އެދެމީހުން ހުޅުމާލޭ ކޯޓަށް ގެންދިޔައެވެ. އެހެން ނަމަވެސް ހައްޔަރުކުރުމަށް ހުޅުމާލޭ ކޯޓުން ނެރުނު އަމުރު ފުރިހަމަ ނުވާތީކަމަށް ބުނެ ކްރިމިނަލް ކޯޓުން ވަނީ އެ ދެ މީހުން ދޫކޮށްލާފައެވެ.
އަންގާރަ ދުވަހު ހުޅުމާލޭ ކޯޓުން ފުލުހުންނަށްދީފައިވާ ކޯޓު އަމުރުގައި ޖިނާއީ އިޖުރާއަތުގެ ޤާނޫނު 32 ވަނަ މާއްދާގެ (ހ) ގެ 12 ވަނަ ނަމްބަރާއި، 41 ވަނަ މާއްދާގެ (ށ) ގެ 6 ނަމްބަރުގައިވާ ކަންތައްތައް ކޯޓު އަމުރުގައި ފުރިހަމަވެފައިނުވާކަމަށް ކްރިމިނަލް ކޯޓުން ވަނީ ބުނެފައެވެ.
ޖިނާއީ އިޖުރާއަތުގެ ޤާނޫނު 32 ވަނަ މާއްދާގެ (ހ) ގެ 12 ވަނަ ނަމްބަރުގައި ބުނެފައިވަނީ ބަލައި ފާސްކުރުމުގެ ކޯޓު އަމުރުގައި ހުއްދަދޭ ފަނޑިޔާރުގެ ނަމާއި ސޮއި އަދި ކޯޓުގެ ތައްގަނޑު ހުންނަންޖެހޭނެ ކަމަށެވެ. އަދި އެ ޤާނޫނުގެ 41 ވަނަ މާއްދާގެ (ށ) ގެ 6 ނަމްބަރުގައި ބުނެފައިވަނީ މީހަކު ހައްޔަރުކުރުމަށް ނެރޭ ކޯޓު އަމުރުގައި ހުއްދަދޭ ފަނޑިޔާރުގެ ނަމާއި ސޮއި އަދި ކޯޓުގެ ތައްގަނޑު ހިމަނަންޖެހޭނެ ކަމަށެވެ.
ކްރިމިނަލް ކޯޓުން ބުނީ އެ ދެ މީހުން ހައްޔަރުކުރުމާއި ބަލައި ފާސްކުރުމަށް ހުޅުމާލޭ ކޯޓުން ފުލުހުންނަށް ދިން އަމުރުގައި އެކަންކަން ފުރިހަމަ ނުވާކަމަށެވެ.
އެހެން ކަމުން ދެވަނަ ފަހަރަށް އެދެމީހުން ބަންދުގެ މުއްދަތު ޖަހައިދޭން ބުދަ ދުވަހު ފުލުހުން ހުޅުމާލޭ ކޯޓަށް ދިޔައެވެ. އެކޯޓުން ބުނީ ފުލުހުން އެދެމީހުންގެ ބަންދުގެ މުއްދަތު ޖަހަން އައީ ޖިނާއީ އިޖުރާއަތުގެ ގަވައިދުގެ 8 ވަނަ މާއްދާގެ (ހ) ފުރިހަމަ ނުކޮށް ކަމަށެވެ. އެމާއްދާގައި ވާގޮތުން ތަހުގީގުކުރުމުގެ މަސައްކަތް ހަވާލުވެފައިވާ ފަރާތް ކޯޓަށް ހާޒިރުވުމަށް އުޒުރުވރިވާނަމަ ގާނޫނު ތަންފީޒުކުރާ އިދާރާގެ ރަސްމީ ލިޔުމަކާއިއެކު ބަދަލުގައި އެ އިދާރާގެ އެހެން ފަރާތެއް ކޯޓަށް ހާޒިރު ކުރެވިދާނެކަމަށެވެ.
ފައިސަލް ވިދާޅުވީ އެމައްސަލަ ތަހުގީގުކުރުމުގެ މަސައްކަތް ހަވާލުވެފައިވާ ފުލުސް މީހާގެ ބަދަލުގައި އެހެން ފުލުހަކު ފޮނުވާނަމަ އެކަން ބަޔާންކޮށް ސިޓީއެއް ފޮނުވިދާނެކަމަށާއި އެހެން ނަމަވެސް ރަސްމީކޮށް އެއްވެސް ލިޔުމެއް ސިޓީއެއް ވެސް ފޮނުވާފައި ނުވާކަމަށެވެ. ފުލުހުންގެ އިންޓަލިޖެންސަށް ލިބުނު މައުލޫމާތަކާއި ގުޅިގެން ހޯމަ ދުވަހުގެރޭ 03:10 ހާއިރު ހުޅުމާލޭގައި ފުލުހުން ހިންގި އޮޕަރޭޝަނެއްގައި ހައްޔަރު ކުރީީ 25 އަހަރުގެ ދިވެހި ފިރިހެނަކާއި، 52 އަހަރު ދިވެހި އަންހެނެއްކަމަށް ފުލުހުން ބުންޏެވެ.
