މިހާރު ރާއްޖެއަށް ކުރަމުންދާ ހުޅަނގު މޫސުމުގެ ވިއްސާރައިގައި ހއ. އުލިގަމުގެ ދެ ސަރަހައްދެއްގައި ވަރަށް ބޮޑަށް ފެންބޮޑުވެއްޖެއެވެ.

އެކަމާ ގުޅޭ ގޮތުން "ރާއްޖެއެމްވީ" އަށް މައުލޫމާތު ދެއްވަމުން އުލިގަމު ކައުންސިލުގެ މެމްބަރު އިމާދު އަބްދުﷲ ވިދާޅުވީ، ބުދަ ދުވަހުގެރޭ ފަތިހުން ފެށިގެން ހުއްޓުމެއް ނެތި އެރަށަށް ބޯކޮށް ވާރޭ ވެހިފައިވާ ކަމަށާއި، ރަށުގެ ދެ ސަރަހައްދެއް ވަރަށް ބޮޑަށް ފެންބޮޑުވެފައިވާ ކަމަށެވެ. އެގޮތުން ރަށުގެ އިންޖީނުގެ ހުންނަ ސަރަހައްދާއި، އެރަށު އެމްއެންޑީއެފް އޮފީސް ހުންނަ ސަރަހައްދުގައި ވަރަށް ބޮޑަށް ފެންބޮޑުވެފައިވާ ކަމަށް އިމާދު ވިދާޅުވިއެވެ.

ޕަމްޕް ބޭނުންކޮށްގެން އެ ސަރަހައްދުތަކުގެ ފެން ހިންދުމުގެ މަސައްކަތް ކައުންސިލާއި، ރަށު ރައްޔިތުންނާއި، އެމްއެންޑީއެފް އަދި ފުލުހުން ގުޅިގެން ކުރަމުންދާއިރު، އެ ސަރަހައްދުތަކަކީ ބޯކޮށް ވިއްސާރަވެއްޖެ ނަމަ އާންމުކޮށް ފެންބޮޑުވާ ސަރަހައްދުތަކެއް ކަމަށް އިމާދު ވިދާޅުވިއެވެ. އަދި ފެން ބޮޑުވުން ކޮންމެވެސް ވަރަކަށް ކޮންޓްރޯލްވި ނަމަވެސް އަދިވެސް ހުއްޓުމެއް ނެތި އެރަށަށް ވާރޭ ވެހެމުންދާ ކަމަށް އިމާދު ވިދާޅުވިއެވެ.

އިމާދު އިތުރަށް ވިދާޅުވީ، ފެން ބޮޑުވުމުގެ ސަބަބުން ރަށުގެ ބައެއް ގޭގެއަށް ފެން ވަދެފައިވާ ކަމުގެ ޝަކުވާ ލިބިފައިވާ ކަމަށާއި، އެއްވެސް ގެއަކަށް ގެއްލުމެއް ލިބިފައިވޭތޯ ބަލައި އެކަމުގެ ތަފްސީލުތައް ކައުންސިލުން މި ވަގުތު ބަލަމުންދާ ކަމަށެވެ.

ރާއްޖެއަށް މިހާރު ކުރަމުންދާ ވިއްސާރައިގައި ދާދިފަހުން އުލިގަމަށް ވަނީ ހޮނު އަޅައި ބޮޑެތި ގެއްލުންތަކެއް ވެސް ލިބިފައެވެ.

ކުރިއަށް އޮތް 24 ގަޑިއިރު ރާއްޖޭގެ ބޮޑު ބަޔަކަށް ވިއްސާރަކުރާނެ ކަމަށް މޫސުމާ ބެހޭ ގައުމީ އިދާރާއިން ބުނެފައިވާއިރު ވިއްސާރައިގައި ބޯކޮށް ވާރޭ ވެހި ވައި ގަދަވެ ކަނޑުތައް ގަދަވާނެ ކަމަށް ލަފާކުރެވޭތީ ހުރިހާ ފަރާތްތަކުން، ޚާއްސަކޮށް ކަނޑު ދަތުރު ކުރާ ފަރާތްތަކުން މޫސުމަށް ސަމާލުވުމަށް އެ އިދާރާއިން ވަނީ އިލްތިމާސްކޮށްފައެވެ.