ދަރުމަވަންތަ ހޮސްޕިޓަލްގެ ލޮބީ ފަރުމާކޮށްފައި ވަނީ ރާއްޖޭގެ މާހައުލާ ގުޅޭ ގޮތަކަށް ނޫން: ސަލީމް
4 ޖޫން 2019 | އަންގާރަ 09:33"ލޮބީ" ހިޔާކޮށް ބިއްލޫރި ޖަހަންޖެހޭ ކަމަށް ވިދާޅުވި
އައިޖީއެމްއެޗްގެ ސީއީއޯ ބަންދު އިބްރާހިމް ސަލީމް (ކުޑަ ބަންދޭ)
ދަރުމަވަންތަ ހޮސްޕިޓަލްގެ ލޮބީ ސަރަހައްދު ފަރުމާކޮށްފައި ވަނީ ރާއްޖޭގެ މޫސުމާ ގުޅޭ ގޮތަށް ނޫން ކަމަށް އައިޖީއެމްއެޗް ހޮސްޕިޓަލްގެ ސީއީއޯ ބަންދު އިބްރާހިމް ސަލީމް (ކުޑަ ބަންދޭ) ވިދާޅުވެއްޖެއެވެ.
ރާއްޖެ އެމްވީ އަށް ދެއްވި ހާއްސަ އިންޓަރވިއުއެއްގައި ސަލީމް ވިދާޅުވީ ދަރުމަވަންތަ ހޮސްޕިޓަލްގެ ލޮބީ ފަރުމާކޮށްފައި ވަނީ ރާއްޖޭގެ ކަންކަމަށް ރިއާޔަތްނުކޮށް ކަމަށާއި ލޮބީ ސަރަހައްދު ހިޔާ ކޮށްފައި ނުވާ ކަމަށެވެ..
ރާއްޖެއަކީ ހުޅަނގު މޫސުމުގައި ބާރަށް ވައިޖެހޭ ގައުމަކަށްވާއިރު، ލޮބީ ސަރަހައްދު ހިޔާނުކޮށް އޮވެއްޖެ ނަމަ ވިއްސާރަ މޫސުމުގައި ހޮސްޕިޓަލްގެ ލޮބީ ބޭނުންކުރާ ފަރާތްތަކަށް ދަތިތަކާ ކުރިމަތިލާންޖެހޭނެ ކަމަށް ސަލީމް ވިދާޅުވިއެވެ.
އެހެންކަމުން ލޮބީ މިހާރު ފަރުމާކޮށްފައިވާ ގޮތަށް ބަދަލުގެނެސް، އެތަނުގައި ބިއްލޫރިޖަހަން ޖެހިފައިވާ ކަމަށް ސަލީމް ވިދާޅުވިއެވެ. އޭނާ ވިދާޅުވީ އެކަމަށް ވެސް އިތުރު ޚަރަދުތަކެއް ދާނެ ކަމަށެވެ.
އިމާރާތާ ހަވާލުވި ފަހުން އެ ނޫނަސް އިމާރާތަށް އެކި ބަދަލުތައް ގެންނަންޖެހިފައިވާ ކަން ސަލީމް ފާހަގަކުރެއްވިއެވެ. އެގޮތުން ދަރުމަވަންތަ ހޮސްޕިޓަލްގެ ފުރަތަމަ ފަންގިފިލާގައި ހުރި ރޭޑިއޮލޮޖީ އިކުއިޕްމަންޓްތަކުން ރޭޑިއޭޝަން ލީކުވާ މައްސަލަ ފާހަގަކުރެވިފައިވާ ކަމަށް އޭނާ ވިދާޅުވިއެވެ. އެ މައްސަލަ ހައްލުކޮށް އެތަނުން ޚިދުމަތް ދޭން ދުވަސްތަކެއް ނަގާނެ ކަމަށް ވެސް އޭނާ ވިދާޅުވިއެވެ. އެކަން ހައްލުކޮށްދިނުމަށް ކޮންޓްރެކްޓަރ އަށް މިހާރު އަންގާފައިވާނެ ކަމަށް ވެސް ސަލީމް ވިދާޅުވިއެވެ.
ރާއްޖޭގައި މިހާތަނަށް އެޅި އެންމެ އުސް އަދި އެންމެ އަގު ބޮޑު އިމާރާތް ހަވާލުކުރީ ސިންގަޕޫރުގެ ޝެންހުއާ ކުންފުންޏާ އެވެ. އެ ކުންފުންޏާ އެ އިމާރާތް އެޅުމަށް ހަވާލުކުރީ 143 މިލިއަން ޑޮލަރު (2.2 ބިލިއަން ރުފިޔާ) އަށް ޖޫން، 5، 2016 ގައެވެ.
އައިޖީއެމްއެޗުގެ ޖާގައިގެ ދަތިކަން ހައްލުކުރަން ކަމަށް ވިދާޅުވެ، ކުރީގެ ރައީސް އަބްދުﷲ ޔާމީންގެ ސަރުކާރުން އިމާރާތް ކުރި 25 ބުރީގެ ދަރުމަވަންތަ ހޮސްޕިޓަލަކީ ރައީސް ޔާމީންގެ ސަރުކާރުގައި ހިންގާފައިވާ ކޮރަޕްޝަންގެ އަމަލްތައް ދައްކުވައިދޭ ރަމްޒީ ބިނާއެއް ކަމަށް ގިނަ ރައްޔިތުން ދަނީ ބުނަމުންނެވެ.
އެތަން ނިނުމު އިރު ކުރި ހޭދައާ އަޅާބަލާއިރު ބޮޑެތި މައްސަލަތަކެއް ހުރިކަން ރައީސް އިބްރާހީމް މުހައްމަދު ސޯލިހް ވެސް މީގެ ކުރިން ވަނީ ފާހަގަކުރައްވާފައެވެ. އެ ގޮތުން އެތަނަށް ގެނައި ބައެއް އިކުއިޕްމެންޓްތައް އިމާރާތަށް ނުވަނުމާއި ފިޓްނުވުމުގެ މައްސަލަތައް ފާހަގަކުރެވިފައި ވެއެވެ.
