ހައި ކޯޓުން އަލުން ބަލަން ހުކުމްކުރި ދެ މައްސަލަ ސުޕްރީމްކޯޓުގައި އިސްތިއުނާފު ކުރަނީ
ޚިޔާނާތުގެ މައްސަލަ ހޯމަ ދުވަހު ސުޕްރީމްކޯޓުގައި ޕީޖީއިން އިސްތިއުނާފު ކުރާނެ
ކުރީގެ ނައިބު ރައީސް އަހްމަދު އަދީބު
ކުރީގެ ނައިބު ރައީސް އަހުމަދު އަދީބުގެ ދެ މައްސަލައެއް ސުޕްރީމް ކޯޓުގައި އިސްތިއުނާފު ކުރުމަށް ޕްރޮސެކިއުޓަރ ޖެނެރަލް (ޕީޖީ) ގެ އޮފީހުން ނިންމައިފިއެވެ.
ހައިކޯޓުން ވަނީ އަދީބަށް ކުރި ޚިޔާނާތުގެ އަށް އަހަރާއި ލޯންޗުކޮޅު މައްސަލައިގައި އިއްވި 15 އަހަރުގެ ހުކުމް ބާތިލް ކޮށްފައެވެ. އަދި އެ ދެ މައްސަލަ ބެލުމަށް ކްރިމިނަލް ކޯޓުގައި އެދިފައި ވަނިކޮށް، ކްރިމިނަލް ކޯޓުން ވަނީ އެ މައްސަލަތައް އަނބުރާ ޕީޖީއަށް ފޮނުވާލާފައެވެ.
އަދީބުގެ މައްޗަށް ކުރި އެ ދެ ހުކުމުގެ އިތުރުން ޕީޖީއިން ދައުވާ ކުރި 13 މައްސަލައެއް ކްރިމިނަލް ކޯޓުން ވަނީ އަނބުރާ އެ އޮފީހަށް ފޮނުވާފައެވެ.
ކްރިމިނަލް ކޯޓުން މެއި މަހުގެ 28 ގައި ނިންމި ނިންމުމުގައި ބުނެފައި ވަނީ ނުފޫޒުން އެއްކިބާވެފައިވާ ގޮތަށް ތަހުގީގު ކުރުމަކާ ނުލައި މިހާރު ދައުވާކުރެވިފައިވާ ގޮތުގެ މަތިން އިތުރަށް ކުރިއަށް ގެންދިއުން ގާނޫނީ ހަމަތަކުގެ މަތިން ސައްހަ ވެގެން ނުވާ ކަމަށް އެކޯޓުގެ ފަނޑިޔާރުންގެ އަޣުލަބިއްޔަތުން ނިންމާފައިވާ ކަމަށެވެ.
އެކަމާ ގުޅިގެން ޕީޖީ އައިޝަތު ބިޝާމް ރާއްޖެއެމްވީއަށް ވިދާޅުވީ ހައިކޯޓުން ބާތިލް ކުރި އަދީބުގެ ދެ މައްސަލަ ސުޕްރީމް ކޯޓުގައި އިސްތިއުނާފު ކުރައްވާނެ ކަމަށެވެ. އެގޮތުން ޚިޔާނާތުގެ މައްސަލަ ހޯމަ ދުވަހު ސުޕްރީމްކޯޓުގައި އިސްތިއުނާފު ކުރައްވާނެ ކަމަށް ވިދާޅުވިއެވެ. ބެލެވޭ ގޮތުގައި ލޯންޗުކޮޅުގެ މައްސަލާގައި ހައިކޯޓުން ބާތިލު ކުރި ހުކުމް ވެސް ސުޕްރީމް ކޯޓުގައި ހޯމަ ދުވަހު އިސްތިއުނާފު ކުރާނެއެވެ.
ރިޔާސީ ލޯންޗްކޮޅު ފިނިފެންމާގައި އެއްޗެއް ގޮއްވާލި މައްސަލާގައި އަދީބު ޖަލަށް ލާން ކުރި 15 އަހަރުގެ ހުކުމް ބާތިލްކޮށް، އެ މައްސަލާގެ ޝަރީއަތް އަލުން ހިންގަން އަމުރު ކުރީ މި މަހުގެ 20 ވަނަ ދުވަހުއެވެ.
އެ މައްސަލަ ހައި ކޯޓުން ބެއްލެވި ތިން ފަނޑިޔާރުންގެ އިއްތިފާގުން ހުކުމްކުރީ ރިޔާސީ ލޯންޗްކޮޅުގެ މައްސަލާގައި އަދީބަށް ކުރި ހުކުމުގެ މައްސަލަ ދަށު ކޯޓުން އަލުން ބަލަން ޖެހޭ ކަމަށާއި އެހެންވެ، އެ މައްސަލަ އަލުން ބެލުމަށް ކްރިމިނަލް ކޯޓަށް އަލުން ބެލުމަށް 15 ދުވަހުގެ މުހުލަތެއް ދިނުމަށެވެ.
އަދީބު ޚިޔާނާތްވި ކަމަށް ކަނޑައަޅައި ކުރި އަށް އަހަރުގެ ހުކުމަކީ ޅ. މާބިންހުރާގައި ޓޫރިސްޓް ރިސޯޓެއް ތަރައްގީކުރަން އެމްއެމްޕީއާރުސީ އިން ކުރެއްދޫ ހޯލްޑިންގްސް ޕްރައިވެޓް ލިމިޓެޑަށް ކުއްޔަށް ދޫކުރުމުން އިކުއިޒިޝަން ކޮސްޓްގެ ގޮތުގައި އެ ކުންފުނިން އެމްއެމްޕީއާރުސީ އަށް ދިން ފަސް މިލިޔަން ޑޮލަރަށް (77 މިލިއަން ރުފިޔާ) ޚިޔާނާތްތެރިވި މައްސަލައިގައި އިއްވާފައިވާ އަށް އަހަރުގެ ހުކުމެވެ. އެހުކުމް ބާތިލް ކުރުމަށް ފަހު ހައިކޯޓުގެ ފަނޑިޔާރުންގެ އަޣުލަބިއްޔަތުން ކުރި ހުކުމުގައި ވަނީ ކްރިމިނަލް ކޯޓުގެ ހުކުމް ބާތިލްކޮށް، އެ މައްސަލަ އަލުން ބަލަން ކްރިމިނަލް ކޯޓުގެ މައްޗަށް އަންގާ ކަމަށެވެ.
ކްރިމިނަލް ކޯޓުން ޕީޖީއަށް އަނބުރާ ފޮނުވި 15 މައްސަލަތަކުގެ ތެރޭގައި އެމްއެމްޕީއާރުސީގެ ޚިޔާނާތާ ގުޅިގެން އެންޓި ކޮރަޕްޝަން ކޮމިޝަން (އޭސީސީ) އިން ކުރި ތަހުގީގާ ގުޅިގެން ނުވަ ރަށެއްގެ ނުވަ ދައުވާ ވެސް ހިމެނެއެވެ. އެ ދައުވާގެ ތެރޭގައި މަގާމުގެ ނުފޫޒު ބޭނުން ކޮށްގެން ނާޖާއިޒް ފައިދާ ހޯދައިދިނުމުގެ ދައުވާ ހިމެނެއެވެ.
ތަފާތު އެކި ދައުވާތަކުގައި އަދީބުގެ މައްޗަށް ދަށު ކޯޓުން 33 އަހަރަށް ވުރެ ގިނަ ދުވަހަށް ޖަލަށް ލުމަށް ހުކުމްކުރިއެވެ. ނަމަވެސް މަތީ ކޯޓުތަކުން މިހާރު ވަނީ އެ ހުކުމްތައް ބާތިލްކޮށްފައެވެ. އަދީބު މި ވަގުތު ހުންނެވީ ކޯޓުގެ ހުރުމަތް ކެނޑުމުގެ ކުށުގައި ކުރި 15 ދުވަހުގެ ހުކުމުގައެވެ. ބަލި ހާލަތު ހުރި ގޮތުން އަދީބު ގޭބަންދުގައި ހުންނަވާތާ ގިނަ ދުވަސްތަކެއް ވެއްޖެއެވެ.
