ރިޔާސީ ލޯންޗުކޮޅު ފިނިފެންމާގައި އެއްޗެއް ގޮއްވާލި މައްސަލާގައި ކުރީގެ ނައިބު ރައީސް އަހުމަދު އަދީބަށް ކުރި ހުކުމް އަލުން ބެލުމަށް 15 ދުވަސް ޖެހުމުން އެބަންދާއި މެދު ގޮތެއް ކަނޑައެޅުމަށް އެމަނިކުފާނު ކްރިމިނަލް ކޯޓަށް ހާޒިރުކުރައްވައިފިއެވެ.
ލޯންޗުކޮޅުގައި އެއްޗެއް ގޮއްވާލިކަން ސާބިތުވެގެން އަދީބަށް 15 އަހަރުގެ ޖަލު ހުކުމެއް ކުރިއެވެ. އެ މައްސަލަ އަދީބަު ހައިކޯޓުގައި އިސްތިއުނާފު ކުރުމުން އެ ކޯޓުން އަމުރު ކުރީ އެމައްސަލަ ދަށު ކޯޓުން އަލުން ބަލަން ޖެހޭ ކަމަށާއި އެހެންވެ، އެ މައްސަލަ އަލުން ބެލުމަށް ކްރިމިނަލް ކޯޓަށް 15 ދުވަހުގެ މުހުލަތެއް ދިނުމަށެވެ. ހައިކޯޓުން އެ އަމުރު ކުރީ މިމަހުގެ 20 ވަނަ ދުވަހު އެވެ. އެ 15 ދުވަސް ހަމަވާން ދެން އޮތީ ބާކީ ދެ ދުވަހެވެ.
ޕްރޮސެކިއުޓަރ ޖެނެރަލް އައިޝަތު ބިޝާމް ރާއްޖެއެމްވީއަށް ވިދާޅުވީ އަދީބުގެ ބަންދުގެ މުއްދަތު އިތުރު ކުރުމަށް އެ އޮފީހުން ހުށައެޅީ ޝަރީއަތް ނިމެންދެން ކަމަށެވެ. އެހެން ނަމަވެސް ހައިކޯޓުން އަލުން ބަލަން ނިންމި އަދީބުގެ ދެމައްސަލަ ކްރިމިނަލް ކޯޓުން އެއޮފީހަށް އަނބުރާ ފޮނުވާލާފައިވާ ކަމަށް ވިދާޅުވިއެވެ.
ހައިކޯޓުން ކްރިމިނަލް ކޯޓުގެ މައްޗަށް އަލުން ބެލުމަށް އަމުރު ކުރި ދެ މައްސަލައަކީ ލޯންޗުކޮޅުގެ މައްސަލައާއި ޚިޔާނާތުގެ މައްސަލައިގައި ކުރި 8 އަހަރުގެ ހުކުމެވެ. އެދެމައްސަލަ ބާތިލް ކުރި ނަމަވެސް އަލުން ބެލުމަށް އެހުކުމުގައި ވަނީ އަމުރުކޮށްފައެވެ.
ބިޝާމް ވިދާޅުވީ ހައިކޯޓުން ނިންމާ ނިންމުމަކަށް ކްރިމިނަލް ކޯޓުން އަމަލު ކުރަންޖެހޭނެ ކަމަށެވެ. އަދި ޕްރޮސެކިއުޓަރ ޖެނެރަލްގެ ފަރާތުން ވެސް އެ އަމުރާއި އެއްގޮތަށް އަމަލު ކުރައްވާނެ ކަމަށާއި ހައިކޯޓުން ނިންމާ ނިންމުމަކަށް ދަށު ކޯޓުން އަމަލު ނުކުރުމަށް ނުނިންމޭނެކަމަށެވެ.
ހައިކޯޓުން އަލުން ބަލަން ދަށު ކޯޓަށް ފޮނުވި ދެ މައްސަލަ ވެސް ޕީޖީއަށް އަނބުރާ ފޮނުވާލާފައިވަނީ. ހައިކޯޓަކީ އިސްތިއުނާފު ކޯޓެއް. ކްރިމިނަލް ކޯޓަކަށް އެގޮތަށް ނުނިންމޭނެ މައްސަލަ ނުބަލާކަށް.-ޕްރޮސެކިއުޓަރ ޖެނެރަލް އައިޝަތު ބިޝާމް-
ބިޝާމް ވިދާޅުވީ އެމައްސަލައާއި ބެހޭގޮތުން އިތުރަށް އެއްޗެއް ވިދާޅުވެވޭނީ އަދީބުގެ ބަންދާއި މެދު ކްރިމިނަލް ކޯޓުން ގޮތެއް ނިންމުމުން ކަމަށެވެ. އަދި އަދީބުގެ ބަންދުގެ މުއްދަތު ކްރިމިނަލް ކޯޓުން އިތުރު ނުކޮށްދީފިނަމަ ސުޕްރީމް ކޯޓުގައި އެމައްސަލަ އިސްތިއުނާފު ކުރައްވާނެކަމަށް ވިދާޅުވިއެވެ.
އަދީބުގެ މައްޗަށް ކޮށްފައިވާ 33 އަހަރުގެ ޖަލު ހުކުމް ތަކުން މިހާރު ވަނީ މިނިވަންވެވަޑައިގެންފައެވެ. ނަމަވެސް ރިޝްވަތު ދިނުމާއި ރަސްމީ ހައިސިއްޔަތުން ކުރަންޖެހޭ ކަންކަމަށް ނުފޫޒު ފޯރުވުމުގެ ދައުވާގެ ޝަރީއަތުގެ މަޖިލީހުގައި އަދީބުގެ މައްޗަށް، ކޯޓުގެ ހުރުމަތް ކެނޑިކަމުގެ ކުށުގައި 15 ދުވަހުގެ ހުކުމެއް ވަނީ އިއްވާފައެވެ. އެހުކުމް ކަރެކްޝަނުން ދަނީ މިހާރު ތަންފީޒު ކުރަމުންނެވެ.
15 ދުވަހުގެ ހުކުމް ތަންފީޒު ކޮށް ނިމޭނީ މި މަހުގެ 13 ވަނަ ދުވަހުގެ ރެއަށެވެ.
