އޭޖީއާއި ޝާހިދު މަޖިލީހަށް ހާޒިރުކުރުމަށް ޖާބިރު ހުށަހަޅުއްވައިިފި
ގަތަރާއި ރާއްޖެއާ އޮތް ގުޅުމާ ގުޅޭގޮތުން ފޮރިން މިނިސްޓަރާ ސުވާލު ކުރައްވަން ބޭނުންވޭ: ޖާބިރު
ފޮރިން މިނިސްޓަރ އަބްދުﷲ ޝާހިދާއި އޭޖީ ރިއްފަތު
ބަންޑާރަނައިބު އިބްރާހިމް ރިއްފަތާއި، ފޮރިން މިނިސްޓަރ އަބްދުﷲ ޝާހިދު މަޖިލީހަށް ހާޒިރުކުރުމަށް ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު އެދިވަޑައިގެންފިއެވެ.
މިިދޔަ ބުދަ ދުވަހު ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް ޖާބިރު ފޮނުއްވި ސިޓީއެއްގައި ވިދާޅުވީ، ގަތަރާއި ރާއްޖެއާ އޮތް ގުޅުމާ ގުޅޭގޮތުން ފޮރިން މިނިސްޓަރާ ސުވާލު ކުރައްވަން ބޭނުންފުޅު ކަމަށާއި، އެ ގައުމާ ގުޅުން ބަދަހި ކުރުމަކީ މި ސަރުކާރުގެ ހާރިޖީ ސިޔާސަތުގައި ހިމެނޭ ކަމެއްތޯ ސުވާލު ކުރައްވަން ބޭނުންފުޅުވާ ކަމަށެވެ. އެގޮތުން ރާއްޖެއާއި ގަތަރާމެދު ގުޅުން ބަދަހި ކުރުމުގެ މަޝްވަރާތައް ފަށާފައިވާ ކަމަށް ފޮރިން މިނިސްޓަރ އަބްދުﷲ ޝާހިދު ވެސް ވަނީ ވިދާޅުވެފައެވެ.
އޭގެ އިތުރުން، ބިޒްނަސް އިމޭޖް ގްރޫޕް (ބިގް) އަށް، ދައުލަތުން ބޮޑު ބަދަލެއް ދޭން ޖެހިފައިވާއިރު، އެ މައްސަލާގައި ސިވިލް ކޯޓުން ކޮށްފައިވާ ހުކުމް ދައުލަތުން އިސްތިއުނާފް ކޮށްފައިވޭތޯ އާއި އެ ކުންފުންޏަށް ފައިސާ ދިނުމާ ގުޅޭގޮތުން އެއްވެސް ފަރާތަކަށް ލަފާ ދެއްވާފައިވޭތޯ ސާފު ކޮށްދިނުމަށް ވެސް ޖާބިރު ވަނީ އެދިވަޑައިގެންފައެވެ.
އޭގެ އިތުރުން، މިހާރު ކުރަމުންދާ ވިއްސާރައިގައި ގެއްލުން ލިބުނު މީހުންނަށް އެހީތެރިވުމަށް ބާރު އެޅުމުގެ ގޮތުން ލިބުނު ގެއްލުންތަކުގެ ތަފްސީލު ބަލައި އެކަންކަން ވީ އެންމެ އަވަހަކަށް ހައްލުކޮށްދިނުމަށް އެދި ޖާބިރު ވަނީ ކުއްލި މައްސަލައެއް ވެސް މަޖިލީހަށް ހުށަހަޅުއްވާފައެވެ.
