އާސާރީ ތަންތަން ރައްކާތެރި ކުރާއިރު އެތަނެއްގެ އާސާރީ ވަންތަކަން ގެއްލުވާ ނުލައްވާ: ޔުމްނާ
2 ޖޫން 2019 | އާދީއްތަ 06:32އާސާރީ ތަންތަން ރައްކާތެރި ކުރައްވަންވާނީ އޭގެ އަސްލު ނުގެއްލޭގޮތަށް
ހެރިޓޭޖް މިނިސްޓަރ ޔުމްނާ މައުމޫނު
އާސާރީ ތަންތަން ރައްކާތެރި ކުރާއިރު އެތަނެއްގެ އާސާރީވަންތަކަން ގެއްލުވާ ނުލެއްވުމަށް މިނިސްޓަރ އޮފް އާރްޓްސް، ކަލްޗަރ އެންޑް ހެރިޓޭޖް، ޔުމްނާ މައުމޫނު ވިދާޅުވެއްޖެއެވެ.
ފ. ބިލެއްދޫ ރަށު ކައުންސިލުން އިސްނަގައިގެން އެރަށު މީހުން އިހު ޒަމާނުގައި ބޭނުންކުރި ވެވު ކޮނެ މަރާމާތު ކޮށްފައިވާއިރު، އެކަމާ ގުޅޭގޮތުން މިނިސްޓަރ ކުރެއްވި ޓްވީޓެއްގައި ވިދާޅުވީ، އާސާރީ ތަންތަން ރައްކާތެރި ކުރައްވަންވާނީ އޭގެ އަސްލު ނުގެއްލޭ އަދި އެ ތަނެއްގެ އާސާރީ ގޮތް ދެމެހެއްޓޭ ފަދަ ގޮތަކަށް ކަމަށެވެ. އަދި އެފަދަ ކަންކަމުގެ ސަބަބުން އެތަންތަނުގެ އާސާރީ ގޮތް ގެއްލިގެން ދިއުމަށް މަގުފަހިވެދާނެތީ އެކަމަށް ސަމާލުވުމަށް މިނިސްޓަރ އެދިވަޑައިގެންފައިވެއެވެ.
ފ.ބިލެއްދޫ ވެވު ކޮނުމާ ގުޅޭގޮތުން "ރާއްޖެއެމްވީ" އަށް މައުލޫމާތު ދެއްވަމުން އެރަށު ކައުންސިލް ރައީސް އިހުސާން ވިދާޅުވީ ވެވު އެއީ ބިލެއްދޫ ރައްޔިތުންގެ ތަނެއް ކަމަށާއި، އެތަން ހިމާޔަތް ކުރުމަކީ އެރަށުގެ ރައްޔިތުންގެ ޒިންމާއެއް ކަމަށެވެ. އަދި ވެވު ހިމާޔަތް ކުރުމުގެ ނަމުގައި އެތަން ވަޅުލާފައި ބާއްވަން ބޭނުންވާ ނުވާ ކަމަށާއި، އެތަން ހެރިޓޭޖް މިނިސްޓްރީގެ ސަމާލުކަން ލިބުނީ ވެސް ކޮންނަން ފެށި ހިސާބުން ކަމަށް އިހުސާން ވަނީ ވިދާޅުވެފައެވެ. އޭގެ އިތުރުން، އެތަން ކޮނުނީ އެއްވެސް ގެެއްލުމެއް ނުލިބޭ ގޮތަށް ވަރަށް ބަލައިގެން ކަމަށްވެސް އިހުސާން ވިދާޅުވިއެވެ.
މިމައްސަލައާ ގުޅިގެން ހެރިޓޭޖް މިނިސްޓަރު ޔުމްނާ މައުމޫން ކަންބޮޑުވުންފާޅު ކުރައްވާ އޭރު ކުރެއްވި ޓްވީޓެއްގައި ވިދާޅުވީ، އާސާރީ ތަންތަން ކޮންނަން ވާނީ އެ ތަނެއް ރައްކާތެރިކޮށް ބެލެހެއްޓޭނެ ގޮތެއް ރޭވުމަށް ފަހު ކަމަށެވެ. އަދި އެފަދަ ތަންތަން ކޮންނަން ވާނީ ތަނަށް ގެއްލުން ނުވާނެ ގޮތަކަށް ‘އާކިޔޮލިޖިކަލް' އުސޫލުތަކާ އެއްގޮތަށް ކަމަށްވެސް މިނިސްޓަރ ވަނީ ވިދާޅުވެފައެވެ.
ފ.ބިލެއްދޫ ކައުންސިލް އިސްނަގައިގެން ވެވު ކޮނެ މަރާމާތު ކޮށްފައިވާއިރު، ވެވުގެ ބޭރުގައި ވަނީ ވަށާ ފާރެއް ރާނާ ހިޔާކޮށްފައެވެ. އަދި ވަށާފާރުގައި ވަނީ ލިއެލާ ޖަހާއިރު ބޭނުންކުރާ ފަދަ ފަރުމާއަކުން ވަށާފާރުގައި ކުލަލާފައެވެ. އެކަމުގައި ރަށުގެ ގިނަ ބަޔެއްގެ އެހީތެރިކަމާ އެއްބާރުލުން ލިބިފައިވާކަމަށް ރަށުން ވާހަކަދެއްކި ބައެއް ފަރާތްތަކުން ބުނެފައިވެއެވެ.
ފ ބިލެއްދޫ ވެވު ކޮނުނު ސަރަޙައްދަކީ ގެޒެޓު ކޮށްފައިވާ ދިވެހިރާއްޖޭގެ އާސާރީ ތަންތަނުގެ ދަފްތަރުގައި ވެސް ހިމެނޭ ސަރަޙައްދެކެވެ.
