ރަމަޟާން މަހަށްފަހުވެސް ހެޔޮ އަމަލު ކުރުމުގައި ދެމި ތިބުމަށް ހުކުރު ހުތުބާގައި ގޮވާލައިފި
31 މެއި 2019 | ހުކުރު 08:18ރޯދައިގެ ފައިދާ ލިބިގަނެވުނީ ކިހާ މިންވަރަކަށްތޯ އަމިއްލަ ނަފްސާ ސުވާލުކުރުމަށް ގޮވާލާފައިވޭ
ހުކުރު ޚުތުބާ
ރަމަޟާންމަސް އަޅުގަނޑުމެންނާއި އަލްވަދާއު ކީނަމަވެސް ހެޔޮ އަމަލުކުރުމުގައި ދެމި ތިބުމަށް މިއަދުގެ ހުކުރު ހުތުބާގައި ގޮވާލައިފިއެވެ.
"ރަމަޟާންމަހަށް ފަހު ހެޔޮ އަމަލުކުރުން މަތީ ދެމިތިބުން" މި މައުލޫގެ މައްޗަށް ބިނާ ކޮށްފައިވާ ހުތުބާގައި ބުނީ، ބާއްޖަވެރި މި މައްސަރު ނިމިގެންދާއިރު މި ރަމަޟާން މަހުގެ ރޯދައިގެ ފައިދާ ލިބިގަނެވުނީ ކިހާ މިންވަރަކަށްތޯ އަމިއްލަ ނަފްސާ ސުވާލު ކުރަން ޖެހޭ ކަމަށެވެ. އަދި ރަމަޟާން މަހުގައި އަޅުކަމަށް ބަހައްޓާ ފަރުވާތެރިކަން ކުރިއަށްއޮތް މަސްތަކުގައިވެސް އެގޮތުގައި ބޭއްވުމަށް ޚުތުބާގައި ހަނދާން ކޮށްދީފައިވެއެވެ.
މީގެ އިތުރުން، ރަމަޟާން މަސް ނިމުމުގެ ކުރިން ފިތުރު ޒަކާތް ދެއްކުމަށް ހުތުބާގައި ވަނީ ހަނދާން ކޮށްދީފައެވެ. އެގޮތުން ފިތުރު ޒަކާތް ދިނުން ވާޖިބުވާ ފަރާތްތަކުން އީދު ނަމާދުގެ ކުރިން ފިތުރު ޒަކާތް ދެއްކުމަށް ޚުތުބާގައި ވަނީ ވަސިއްޔަތް ކުރައްވާފައެވެ.
އޭގެ އިތުރުން ރަމަޟާންމަހުގެ ރޯދަޔަށްފަހު ޝައްވާލްމަހުގެ ހަ ރޯދަ ހިފުމަކީ ގަދަވެގެންވާ ސުންނަތެއް ކަމާއި އެކަމުގެ މުހިއްމުކަން ހުތުބާގައި ހަނދާން ކޮށްދީފައިވެއެވެ.
