އޭޕްރީލް މަހުގެ 21 ވަނަ ދުވަހު ސްރީލަންކާގެ ފަސް ހޮޓަލަށާއި، އީސާއީ ދީނުގެ މީހުން އަޅުކަންކުރާ ފައްޅިތަކަށް ހަށި ގޮއްވާލައިގެން ދިން ހަމަލާގައި ހިމެނޭ މީހުން ނިސްބަށްވާ ނެޝަނަލް ތައުހީދު ޖަމާއަތް (އެންޓީޖޭ) އިން އަނޫރާދަޕޫރާގެ ކެކިރަވާގައި އަޅާފައިވާ މިސްކިތް އެ އަވަށު މުސްލިމުން ނިކުމެ ތަޅާލައިފިއެވެ.
އެންޓީޖޭއަކީ އައިއެސްއާ ގުޅުން އޮތް ޖަމާއަތެކެވެ. އޭޕްރީލް މަހުގެ 27 ވަނަ ދުވަހު ލަންކާގައި އެ ޖަމާއަތުގެ ހަރަކާތްތައް ހިންގުން ވަނީ މަނާކޮށްފައެވެ.
ކެކިރަވާ މިސްކިތާއި ހަވާލުވެގެން ހުންނަ އަކްބާރް ހާން ބުނީ، އެންޓީޖޭ އިން ބޭނުންކޮށްފައިވާ އެ މިސްކިތަކީ ބޭރުގެ ޖަމާއަތްތަކުން ހަރަދުކޮށްގެން ހަދާފައިވާ މިސްކިތެއް ކަމަށެވެ.
މިސްކިތް ތަޅާލުމަށްފަހު އެބިމުގައި ކުޑަކުދިންނަށް ލައިބްރަރީއެއް އެޅުމަށް ވަނީ ނިންމާފައެވެ. އަކްބަރް ބުނީ، މިސްކިތް ތަޅާލަން ނިންމީ ގައުމުގެ ހާލަތަށް ބެލުމުގެ އިތުރުން އެ އެވަށުގައި ދެ މިސްކިތެއް ބޭނުން ނުވާތީ ކަމަށެވެ. އެ ނިންމުން ނިންމާފައިވަނީ އެ ސަރަހައްދުގައި އުޅޭ މުސްލިމުންވެސް އެކަމަށް އެއްބަސް ވެގެން ކަމަށް އޭނާ ބުންޏެވެ.
ހަށި ގޮއްވާލައިގެން ދިން ހަމަލާގައި އެންޓީޖޭގެ ލީޑަރު ޒަހްރާން ހާޝިމީ މަރުވެފައިވާކަން ފުލުހުން ވަނީ ކަށަވަރު ކޮށްދީފައެވެ.
ބުރާސްފަތި ދުވަހު މީޑިއާއަށް މައުލޫމާތުދެމުން ފުލުހުންގެ މީޑިއާ އޮފިޝަލް ވިދާޅުވީ، ބޮން ގޮއްވާލުމުގައި ބައިވެރިވި މީހުންނަށް ގުޅަން ބޭނުންކޮށްފައިވާ 1800 ފޯނު ނަންބަރު ދިރާސާ ކުރަމުންދާ ކަމަށެވެ.
އީސްޓާ ސަންޑޭ ހަމަލާގައި ތުހުމަތު ކުރެވޭ 66 މީހަކު ހައްޔަރު ކޮށްފައިވެ އެވެ. އޭގެ ތެރެއިން ހަ އަންހެނަކު ސީއަޑީގެ ބެލުމުގެ ދަށުގައި ތިބިއިރު، ޓެރަރިޒަމް އިންވެސްޓިގޭޝަން ޑިޕާޓްމެންޓް (ޓީއައިޑީ)ގެ ބެލުމުގެ ދަށުގައި 21 މީހަކު އެބަތިއްބެވެ.
