ބަންގްލަދޭޝްގައި މަރުވި ދިވެހި މޮޑެލް ރައުދާ އާތިފްގެ މަރާ ގުޅޭ ގޮތުން ބަންގްލަދޭޝްގެ ފުލުހުން ތައްޔާރުކުރި ފައިނަލް ރިޕޯޓު އާންމުކޮށްފިއެވެ.

ރައުދާގެ މަރުގެ މައްސަލައިގެ ރިޕޯޓް ބަންގްލަދޭޝް ޕޮލިސް ބިއުރޯ އޮފް އިންވެސްޓިގޭޝަނުން ބުދަ ދުވަހު ރާޖްޝާހީ ކޯޓަށް ހުށައަޅާފައިވާ އިރު، ފުލުހުންގެ ފަރާތުން ސަބް އިންސްޕެކްޓަރ ސައިދޫރް ރަހްމާން ވިދާޅުވީ، ރައުދާ މަރުވެފައި ވަނީ އަމިއްލައަށް ކަމަށް ފުލުހުންގެ ތަހުޤީޤުން ސާބިތުވެފައިވާ ކަމަށާއި، ރައުދާ އެކަން ކޮށްފައިވަނީ ލޯބިވެރިޔާއާ ޖެހުނު މައްސަލައެއްގެ ސަބަބުން ކަމަށެވެ. އެގޮތުން ރައުދާ މަރުވުމުގެ ކުރިން "އަހަރެން މަރާލީ ކަލޭ" ކަމަށް ބުނެ ލޯބިވެރިޔާއަށް ވަޓްސްއެޕުން މެސެޖްކޮށްފައިވާ ކަމަށާއި، ރައުދާގެ ވަޓްސްއެޕަށް އެންމެ ފަހުން އައިސްފައި ވަނީ ވެސް ލޯބިވެރިޔާގެ ކޯލެއް ކަމަށް އެ ރިޕޯރޓުގައި ބުނެފައި ވެއެވެ.

އޭގެ އިތުރުން، ރައުދާގެ ފޯނާއި، ލެޕްޓޮޕާއި، އޭނާގެ ސޯޝަލް މީޑިއާ އިން ހޯދުނު ހޯދުންތަކަށް ބަލާއިރު، މަރު ވުމުގެ އެއް ރޭ ކުރިން ލޯބިވެރިޔާގެ ފޭސްބުކް ރައުދާ ބޭނުންކޮށްފައިވާ ކަމަށާއި، އޭނާ ރައުދާއަށް ބޭވަފާތެރިވިކަން ރައުދާއަށް އެނގުނު ކަމަށް ވެސް ރިޕޯރޓްގައި ވަނީ ބުނެފައެވެ.

ރައުދާ މަރުވި ގޮތާ ގުޅޭ ގޮތުން ފުލުހުން އިތުރަށް ބުނީ، ލޯބިވެރިޔާ ބޭވަފާތެރިވިކަން އެނގުމުން ރައުދާ "ސެޑޭޓިވް ޕިލް" ތަކެއް ކެއި ކަމަށެވެ.

އަދި އެ މެސެޖްތަކުން، އޭނާ މަރުވީ ލޯބިވެރިޔާ ބޭވަފާތެރި ވުމުންކަން ދެހަވާ ކަަމަށް އިންވެސްޓިގޭޓިންގ އޮފިސަރ ވަނީ ބުނެފައެވެ. ނަމަވެސް އެކަމާ ގުޅިގެން ލޯބިވެރިޔާއާ ދެކޮޅަށް އެއްވެސް "ތުހުމަތެއް" ކޮށްފައެއް ނުވެއެވެ.

ބަންގްލަދޭޝްގެ ރާޖްޝާޙީގައި ހުންނަ އިސްލާމީ ބޭންކް މެޑިކަލް ކޮލެޖްގައި މެޑިސިން ކިޔަވަމުން ދިޔަ، އުމުރުން 21 އަހަރުގެ ރައުދާ އާތިފް ދަންޖެހުނު ޚަބަރު އެންމެ ފުރަތަމަ އާންމުވީ މާޗް މަހުގެ 29 ވަނަ ދުވަހުގެ މެންދުރު ކުރީގެ ވަގުތުގައި ބަންގްލަދޭޝްގެ މީޑިއާ އިންނެވެ. ރައުދާ "ދަންޖެހިފައި" ހުއްޓާ ފެނިފައި ވަނީ، އިސްލާމީ ބޭންކް މެޑިކަލް ކޮލެޖްގައި ތަޢުލީމް ހާސިލްކުރާ އެހެން ޤައުމުތަކުގެ ދަރިވަރުންނަށް ޙާއްސަ އަންހެން ކުދިންގެ ހޮސްޓެލްގައި ރައުދާ ދިރިއުޅުނު 209 ނަމްބަރު ކޮޓަރިންނެވެ. ރައުދާގެ ކުއްލި މަރުގެ ޚަބަރާ އެކު، މުޅި ރާއްޖެ ސިހިގެން ދިޔަ އެވެ. މީޑީއާގައި ރައުދާ އަމިއްލަ އަށް މަރުވި ކަމަށް ރިޕޯޓް ކުރި ނަމަވެސް، އެ ޚަބަރާ މެދު ދިވެހީންގެ ތެރެއިން ގިނަ ބަޔަކު ސުވާލު އުފެއްދިއެވެ.

ރައުދާގެ ހަށިގަނޑުގެ ޕޯސްޓްމޯޓަމް ހެދުމަށް ފަހު ބަންގްލަދޭޝް ސަރުކާރުން ފުރަތަމަ ބުނީ އޭނާ މަރުވީ ދަންޖެހިގެން ކަމަށެވެ. ބަންގްލަދޭޝް ފުލުހުން ރައުދާ މަރުވީ އަމިއްލައަށް ކަމަށް ބުނުމުން، އެކަން ގަބޫލުނުކޮށް އޭނާގެ މަރަކީ ގަތުލެއްގެ ގޮތުގައި ތަހުގީގުކޮށްދޭން އެދުނީ އޭނާގެ ބައްޕަ މުހައްމަދު އާތިފެއެވެ. ރައުދާގެ ބައްޕަގެ އެދުމަށް ކޯޓް އަމުރެއްގެ ދަށުން ރައުދާގެ މަރުގެ ތަހުގީގް އަލުން ފަށާ ވަޅުލިތާ 27 ދުވަސް ފަހުން ރައުދާ ހަށިގަނޑު ނެގިއެވެ. އެ ފަހަރު ރައުދާގެ މަރާ މެދު ސީއައިޑީން ތައްޔާރުކޮށް ރާޖްޝާހީ މެޓްރޮޕޮލިޓޭން މެޖިސްޓްރޭޓް ކޯޓަށް ހުށަހެޅި ފައިނަލް ރިޕޯޓަށް ވެސް އާތިފު ވަނީ ދެކޮޅު ހަދާފަ އެވެ. އެހެން ނަމަވެސް ދެވަނަ ޕޯސްޓްމޯޓަމްގެ ނަތީޖާ ވެސް އައީ އަމިއްލައަށް މަރުވި ކަމަށެވެ.