އިރާންގެ ކުރީގެ ނައިބްރައީސް މުހައްމަދު އަލީ ނަޖަފީ އޭނާގެ ދެވަނަ އަނބިމީހާ މަރާލި ކަމަށް އެއްބަސްވެއްޖެއެވެ.

ތެހެރާންގެ ކުރީގެ މޭޔަރުކަން ވެސް ކުރައްވާފައިވާ 67 އަހަރުގެ ނަޖަފީ ހައްޔަރުކުރީ މިދިޔަ އަންގާރަ ދުވަހު އޭނާގެ އަނބިމީހާ މަރާލުމަށް ފަހު ތެހެރާންގެ ޕޮލިސް ސްޓޭޝަނަށް ހިންގާފަ ދިޔަ މަގުމަތީގައެވެ.

އަލްޖަޒީރާއިން ރިޕޯޓުކޮށްފައިވާ ގޮތުގައި ނަޖަފީ ވަނީ މިތްރާ އޮސަދު ގަޔަށް ބަނޑިޖަހާ މަރާލިގޮތް ފޮލިސް ސްޓޭޝަންގައި ކިޔައިދީފައެވެ. ނަޖަފީ އަނބިމީހާ މަރާލި ކަމަށް އިއުތިރާފްވީ މިތްރާ އޮސަދުގެ ހަށިގަނޑު އޭނާ ދިރިއުޅޭ އެޕާޓްމެންޓްގެ ފާހަނާތެރިން ފެނިގެން އެޚަބަރު މީޑިއާގައި ފެތުރެމުން ދިޔަތާ ގަޑިއެއް ހާއިރު ފަހުންނެވެ.

ރިޕޯޓުތަކުން ބުނާ ގޮތުގައި ނަޖަފީ ވަނީ ބަނޑިން 5 ވަޒަން ޖަހާފައެވެ. އޭގެން އެއްވަޒަން މިތްރާ އޮސަދު މެޔަށް އަރާފައިވާއިރު އަނެއްވަޒަންތައް އަރާފައިވަނީ އަތަށެވެ.

މީގެ އިތުރުން މިމައްސަލައާ ގުޅިގެން ބުދަ ދުވަހުގެ އަޑުހެހުމެއްގައި ނަޖަފީ ވިދާޅުވީ މިތްރާ އޮސަދު ކައިރިން ވަރިވާން އެތައް ފަހަރަކު އެދުނު ކަމަށާއި، ނަމަވެސް މިތްރާ އޮސަދު އެކަމަށް ދެކޮޅު ހެދީ ކަމަށެވެ.

ނަޖަފީ ވިދާޅުވީ ބޭނުންވީ ގިނަ ދުވަސްތަކަށް އޮތް ޒުވާބު ނިމުމަކަށް ގެނައުމަށް ކަމަށެވެ. އަދި ބަނޑި ނެގީ ބިރު ދެއްކުމަށް ކަމަށާއި، އަނބިމީހާ ގަޔަށް ބަނޑިޖަހަން ނޫން ކަމަށެވެ. އަނބިމީހާ ބިރުން ފާހަނާއާ ދިމާލަށް ދިއުމުން އޭނާ ފަހަތުން ފާހަނާއަށް ގޮސް، އަންހެނުން ބިރުން ތެޅިގަނެ ބަނޑި ޖެހިޔަ ނުދޭން އުޅުމުން ބަޑި ޖެހީ ކަމަށް ވިދާޅުވެފައިވާ ކަމަށް އަލްޖަޒީރާގައި ވަނީ ރިޕޯޓު ކޮށްފައެވެ.

35 އަހަރުގެ މިތްރާ އޮސަދްއަކީ ނަޖަފީގެ ދެއަނބިންގެ ތެރެއިން ދޮށީ އަނބިމީހާއެވެ. ތެހެރާންގެ މޭޔަރކަމުން ފޭބުމަށް ފަހު ނަޖަފީގެ ދެވަނަ ކައިވެނީގެ ފޮޓޯތަކެއް ވަނީ ދައުރުވެފައެވެ. އަދި އެކަމާ ހެދި އޭނައަށް ފާޑުކިޔުން ތަކެއް އަމާޒުވީ ނަމަވެސް އޭނާއަކީ ވަރަށް ވާދަވެރި ކަންކަން އިސްލާހު ކުރަން މަސައްކަތް ކުރައްވާ އަދި މިނިސްޓްރީ އޮފް ސައެންސްއާ އެޑިޔުކޭޝަންގެ މަތީ މަގާމްތައް ފުރުއްވި ބޭފުޅެކެވެ.