މޫދަށް ވެއްޓުނު މީހެއްގެ ބޮލުގައި އޮކްސިޖަން ފުޅިއަކުން ޖެހި ސީރިއަސް ހާލުގައި!
އެކްސިޑެންޓްގައި އަނިޔާ ލިބުނު އުމުރުން 29 އަހަރުގެ ޖަރުމަނު މީހަކަށް
އދ. މަހިބަދޫ ކައިރިން ޑައިވް ކުރުމަށް ސަފާރީއަކުން މީހުން ބޭލި ވަގުތު މޫދަށް ވެއްޓުނު މީހެއްގެ ބޮލުގައި އޮކްސިޖަން ފުޅިއަކުން ޖެހި ސީރިއަސް އަނިޔާތަކެއް ލިބިގެން ފަރުވާދޭން ފަށައިފިއެވެ.
ފުލުހުން ބުނީ އަންގާރަ ދުވަހުގެ ހެނދުނު 11:00 އެހަކަންހާއިރު އދ. މަހިނބަދޫ ކައިރި އޮންނަ މަންތާ ޕޮއިންޓަށް ދިޔަ ސަފާރީއަކުން ޑައިވް ކުރަން މީހުން މޫދަށް ބޭލިއިރު، ޖެހި ރާޅަކާ އެކު އެތަނުން އެއް ފަތުރުވެރިއަކު މޫދަށް ވެއްޓިފައިވާ ކަމަށެވެ.
އަދި އެ މީހާ ވެއްޓުނީ މޫދުގައި އޮތް ފަތުރުވެރިޔާގެ ގައިމައްޗަށް ކަމަށާއި އޭނާ އަޅައިގެން ހުރި އޮކްސިޖަން ފުޅި މޫދުގައި އޮތް މީހާގެ ބޮލުގައި ޖެހިފައިވާ ކަމަށް ވެސް ފުލުހުން މައުލޫމާތު ދެއެވެ.
މި އެކްސިޑެންޓްގައި އަނިޔާ ލިބުނު އުމުރުން 29 އަހަރުގެ ޖަރުމަނު މީހާ ވަނީ، މަހިނބަދޫ ހޮސްޕިޓަލަށް ގެންގޮސްފައި ކަމަށް ފުލުހުން ބުނެއެވެ. އަދި އިތުރު ފަރުވާއަށް މިއަދު މެދުރު ފަހު 14:00 ގައި ވަނީ މާލެ ގެނެސްފައެވެ. އޭނާގެ ހާލު ސީރިއަސް ކަމަށް ވެސް ފުލުހުން މައުލޫމާތު ދެއެވެ.
މި ހާދިސާގެ މައުލޫމާތު ފުލުހުންނަށް ލިބިފައި ވަނީ މިއަދު މެންދުރު ފަހު 13:00 އެހާކަން ހާއިރު ކަމަށް ފުލުހުން ބުނެއެވެ.
