މެމްބަރު ރިޒާ ހުވާކުރެއްވުން އުމްރާއަށް ފަހު
28 މެއި 2019 | އަންގާރަ 17:2786 މެމްބަރުން ހުވާ ކުރެއްވި
މެމްބަރު ރިޒާ
ނަވާރަ ވަނަ ރައްޔިތުންގެ މަޖިލީހުގެ މެމްބަރުން ހުވާ ކުރެއްވުމަށް އަންގާރަ ދުވަހުގެ ރޭ ބޭއްވި ޖަލްސާ އަށް ވަޑައިނުގަންނަވަނީ ގުރައިދޫ ދާއިރާގެ މެމްބަރު އިބްރާހިމް ރިޒާ އެކަނި ކަމަށް މަޖިލީހުގެ އިދާރާއިން ބުނެފިއެވެ.
މެމްބަރުން ހުވާކުރެއްވުމަށް މަޖިލިހުގެ އިދާރާގައި ބޭއްވި ޖަލްސާގައި މަޖިލީހުގެ އަމީންއާންމު ފާތުމަތު ނިއުޝާ ވިދާޅުވީ، ގުރައިދޫ ދާއިރާއަށް އިންތިހާބުވެ ވަޑައިގެންފައިވާ މެމްބަރު އިބްރާހިމް ރިޒާ މިވަގުތު އުމްރާއަކަށް ވަޑައިގެން ހުންނެވުމުން ހުވާ ކުރެއްވުމުގެ ރަސްމިއްޔާތުގައި ބައިވެރިވެވަޑައިނުގެންނެވޭ ކަމަށާއި، އޭނާއަށް ހުވާކުރުމުގެ އިންތިޒާމު ފަހުން ހަމަޖައްސަވައިދެއްވާނެ ކަމަށެވެ.
އާ މަޖިލިސް މެމްބަރުންނަށް ހުވާ ލައިދެއްވީ ދިވެހިރާއްޖޭގެ އުއްތަމަ ފަނޑިޔާރު ޑރ.އަހުމަދު އަބްދުﷲ ދީދީއެވެ.
އާ މަޖިލީހުގެ ސުޕަރ މެޖޯރިޓީ، 65 ގޮނޑިއާއެކު އެމްޑީޕީ ހޯދާފައިވާއިރު، ޕީއެންސީގެ ތިން މެމްބަރުން، ޕީޕީއެމްގެ ފަސް މެމްބަރުން، ޖޭޕީއަށް 5 މެމްބަރުން، އެމްޑީއޭގެ ދެ މެމްބަރުން މަޖިލީހުގައި ތަމްސީލް ކުރައްވާނެ އެވެ. މިނިވަން ހަތް މެމްބަރަކު ވެސް އާ މަޖިލީހުގައި ހިމެނިވަޑައިގަންނަވަ އެވެ.
