ތ. އަތޮޅުގެ ފެން ބޮޑުވި ރަށްތަކުން ފެން ހިންދާ ނިމިއްޖެ: ޑިޒާސްޓަރ

މެދުކެނޑުމެއް ނެތި ބޯކޮށް ވާރޭ ވެހުމުގެ ސަބަބުން ތ. އަތޮޅުގެ ރަށްތަކުގައި ފެންބޮޑުވެފައިވާއިރު، ފެން ހިންދުމުގެ މަސައްކަތް މިހާރު ނިމިފައިވާ ކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފިއެވެ.

ހޯމަ ދުވަހުގެ ހެނދުނު 8:00 އިން ފެށިގެން އެ އަތޮޅުގެ ރަށްތަކަށް ހުއްޓުމެއް ނެތި ވާރޭ ވެހި ފެން ބޮޑުވެފައިވާއިރު، އެކަމާ ގުޅޭ ގޮތުން "ރާއްޖެއެމްވީ" އަށް މައުލޫމާތު ދެއްވަމުން އެންޑީއެމްއޭގެ ޗީފް އެގްޒެކެޓިވް ހިސާން ހަސަން ވިދާޅުވީ، ފުލުހުންނާއި އެމްއެންޑީއެފް އަދި ރަށްރަށުގެ ކައުންސިލާއި ރައްޔިތުންގެ އެހީއާ އެކު ފެން ހިންދުމުގެ މަސައްކަތް އަންގާރަ ދުވަހު މެންދަމު 3:00 ހާއިރު ނިންމާލެވިފައިވާ ކަމަށާއި، މިހާރު އެއްވެސް ރަށެއްގައި ފެން ބޮޑުވެފައި ނެތް ކަމަށެވެ.

ހިސާން އިތުރަށް ވިދާޅުވީ، އެންޑީއެމްއޭ އިން މިހާރު ގެންދަނީ ރަށު ކައުންސިލުތަކާ ގުޅިގެން, ގެއްލުން ލިބުނު ތަންތަނުގެ އެސެސްމަންޓް ހަދަމުން ކަމަށާއި، އެސެސްމަންޓް ރިޕޯރޓްތައް ލިބުމުން ގެއްލުންތައް އެ އޮތޯރިޓީން މޮނިޓަރ ކުރާނެ ކަމަށެވެ. އަދި ތ. އަތޮޅުގެ ރަށްރަށުގައި ފެން ބޮޑުވުމުގެ ސަބަބުން އެއްވެސް ގެއަކުން މީހުން ބަދަލުކުރަން ޖެހިފައިނުވާ ކަމަށާއި، ނަމަވެސް ގޭގޭގައި ހިފާގެންގުޅޭ ސާމާނުތަކަށް ގެއްލުން ލިބިފައިވާ ކަމުގެ މައުލޫމާތު ލިބިފައިވާ ކަމަށް ހިސާން ވިދާޅުވިއެވެ.

މިހާރު ރާއްޖެއަށް ކުރަމުންދާ ވިއްސާރައިގައި ބައެއް އަތޮޅުތަކަށް މޫސުން ގޯސްވެ ކާރިސާއެއް ކުރިމަތިވެދާނެ ކަމަށް ލަފާ ކުރެވޭތީ ސަމާލުވުމަށް ހޯމަ ދުވަހު އެ އޮތޯރިޓީން އިންޒާރު ދީފަިއިވާއިރު، ތ. އަތޮޅުގެ މޫސުން ވެސް އަންގާރަ ދުވަހުގެ މެންދުރު ފަހުން ގޯސް ވެދާނެ ކަމަށް ލަފާ ކުރެވޭ ކަމަށާއި، ޚާއްސަކޮށް ދަންވަރު ރާއްޖޭގެ ހުރިހާ ހިސާބަކަށް ވެސް ގުގުރުމާ އެކު ބޯކޮށް ވާރޭ ވެހޭނެ ކަމަށް ލަފާ ކުރެވޭ ކަމަށް މެޓް އޮފީހުން ވަނީ ބުނެފައެވެ.