މަޖިލީހުގެ ރައީސަކަށް ނަޝީދު، ނައިބަކަށް އީވާގެ ނަންފުޅު ހުށަހަޅަން ފާސްކޮށްފި

ރައްޔިތުންގެ މަޖިލީހުގެ ރައީސް ކަމަށް ކުރީގެ ރައީސް މުހައްމަދު ނަޝީދުގެ ނަންފުޅު ހުށަހަޅަން އެމްޑީޕީ ޕާލަމެންޓްރީ ގްރޫޕުން ފާސްކޮށްފިއެވެ.

މަންޗަންގޮޅިމެދު ދާއިރާގެ ގޮނޑިއަށް އިންތިހާބުވެވަޑައިގެންނެވި ރައީސް ނަޝީދުގެ ނަންފުޅު، މަޖިލީހުގެ ރައީސް ކަމަށް ހުށަހަޅަން ފާސްކޮށްފައި ވަނީ ހޯމަ ދުވަހުގެ ރޭ ދަރުބާރުގޭ ރަންނަބަނޑޭރި މާލަމުގައި ބޭއްވި އެމްޑީޕީ ޕާލަމެންޓްރީ ގްރޫޕުގެ ފުރަތަމަ ބައްދަލުވުމުގައެވެ.

Advertisement

ނަވާރަ ވަނަ ރައްޔިތުންގެ މަޖިލީހަށް އިންތިހާބުވެވަޑައިގެންނެވި އެމްޑީޕީގެ 64 މެމްބަރުނާއެކު ބޭއްވި އެ ބައްދަލުވުމުގައި މަޖިލީހުގެ ރައީސް ކަމަށް، ނަޝީދުގެ ނަންފުޅު ހުށަހެޅުއްވީ އެ މަގާމަށް ޝައުގުވެރިކަން ފާޅުކުރެއްވި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމެވެ. ނަޝީދުގެ ނަންފުޅަށް ތާއިދު ކުރެއްވީ ވިލުފުށީ ދާއިރާގެ އިންތިހާބީ މެމްބަރު ހަސަން އަފީފެވެ.

މަޖިލީހުގެ ރައީސް ކަމަށް ނަޝީދުގެ ނަންފުޅު އަސްލަމް ހުށަހެޅުއްވުމުން، އެމަނިކުފާނު އެންމެ ފުރަތަމަ ވަނީ ތަނާޒުލްވެވަޑައިގެންފައެވެ. ނަމަވެސް ނަޝީދުގެ ނަންފުޅަށް ތާއިދު ކުރައްވައި، އަފީފު ދެއްކެވި ވާހަކަފުޅުތަކާ ގުޅިގެން، "ގާތް ރައްޓެއްސަކަށް ފޯން ކޯލެއް" ކުރެއްވުމަށް ކަމަށް ވިދާޅުވެ، ރިޔާސަތުން ނަޝީދު ތެދުވެވަޑައިގެންނެވިއެވެ.

ފޯން ކޯލު ކުރެއްވުމަށް ވަގުތު ކޮޅެއް ހުސް ކުރެއްވުމަށްފަހު، އަސްލަމާއި އަފީފުގެ ހުށަހެޅުއްވުމަށް ނަޝީދު ވަނީ އެއްބަސްވެވަޑައިގެން ވާހަކަފުޅު ދައްކަވާފައެވެ.

ނަޝީދުގެ ނަންފުޅަށް ވޯޓަށް އެއްސެވީ އެމްޑީޕީގެ ޗެއާޕާސަން ހަސަން ލަތީފެވެ. މަޖިލީހުގެ ރައީސް ކަމަށް ނަޝީދުގެ ނަންފުޅު ހުށަހަޅަން ފެނޭތޯ ބަލަން، ޕާލަމެންޓްރީ ގްރޫޕުގައި އަތްހިތްލައިގެން ނެގި ވޯޓުގައި 64 މެމްބަރުން އިއްތިފާގު ވެވަޑައިގެންނެވީ އެ ހުށަހަޅުމަށް ތާއިދު ކުރުމަށެވެ.

މަޖިލީހުގެ ނައިބު ރައީސަކަށް ނަން ހުށަހެޅުމުގެ ފުރުސަތު ހުޅުވާލުމުން، ހަމައެކަނި ހުށަހެޅީ ގަލޮޅު އުތުރު ދާއިރާގެ މެމްބަރު އީވާ އަބްދުﷲގެ ނަންފުޅެވެ. އީވާގެ ނަންފުޅު ހުށައެޅުއްވީ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި)އެވެ. އީވާގެ ނަންފުޅަށް ތާއިދު ކުރެއްވީ ހުޅުދޫ ދާއިރާއަށް އިންތިޚާބުވެވަޑައިގެންނެވި އިލްޔާސް ލަބީބެވެ. އީވާގެ ނަންފުޅު ވެސް ފާސްވީ 64 މެމްބަރުންގެ އިއްތިފާގުންނެވެ.

ނަވާރަ ވަނަ ރައްޔިތުންގެ މަޖިލީހުގެ ރައީސާއި ނައިބު ރައީސް ކަނޑައެޅުމަށް ބާއްވާ ރައްޔިތުންގެ މަޖިލީހުގެ ޖަލްސާ އޮންނާނީ އަންގާރަ ދުވަހުގެ ރޭ 10:30ގައި މަޖިލިސް ކުރާ ގޭގައެވެ.

ގާނޫނުއަސާސީގައި ބުނެފައިވާ ގޮތުން އާންމު އިންތިހާބަށްފަހު ބާއްވާ ރައްޔިތުންގެ މަޖިލީހުގެ ފުރަތަމަ ޖަލްސާގައި އެ މަޖިލީހުގެ މެމްބަރުންގެ ތެރެއިން އެ މަޖިލީހުގެ ރައީސާއި ނައިބު ރައީސް އިންތިހާބު ކުރާނީ މަޖިލީހުގައި ސިއްރު ވޯޓެއް ނަގައިގެންނެވެ.