ކުރީގެ ރައީސް މައުމޫން އަބްދުލް ޤައްޔޫމް ޖަލަށް ފޮތް ހަދިޔާ ކުރައްވައިފިއެވެ.
އެމަނިކުފާނު ފޮތް ހަދިޔާ ކުރައްވާފައިވަނީ ހުކުރު ދުވަހުގެ ރޭ 09:30 ހާއިރު އަމީނިއްޔާ ސްކޫލަށް ވަޑައިގެންނެވެ.
ފޮތް ހަދިޔާ ކުރެއްވުމަށްފަހު މީޑިއާތަކަށް ދެއްވި އިންޓަވިއުގައި މައުމޫން ވިދާޅުވީ ފޮތް ހަދިޔާ ކުރުމުގެ ޕްރޮގްރާމަކީ މުހިންމު ޕްރޮގްރާމެއް ކަމަށާއި ޕްރޮގްރާމްގައި ބައިވެރިވެވަޑައިގެން ފޮތް ހަދިޔާ ކުރައްވަން ފުރުސަތު ލިބުމުން އުފާ ކުރައްވާ ކަމަށެވެ.
"ފޮތް ހަދިޔާ ކުރުމުގެ ޕްރޮގްރާމަކީ މުހިންމު ޕްރޮގްރާމެއް، އެ ޕްރޮގްރާމްގައި ބައިވެރިވެ ޖަލަށް ފޮތް ހަދިޔާ ކުރުމަކީ އަޅުގަނޑަށް ލިބުނު ވަރަށް ބޮޑު އުފަލެއް. ޖަލުގައި ކުށް ކުރާ މީހުންނާއި ކުށް ނުކުރާ މީހުން އެބަތިބި، އަޅުގަނޑު ވެސް ޖަލުގައި އޮތީމަ މިކަންތައްތައް ވަނީ ފެނިފައި. އެންމެން ބޭނުންވޭ އިސްލާހުވާން، އެނބުރި މުޖުތަމައުއަށް އަންނަ. މިކަމަށް މަގުފަހި ކުރުމުގެ ގޮތުން ކޮށްދެވެން އޮތް ހުރިހާ ކަމެއް ސަރުކާރުގެ ކަމާބެހޭ ފަރާތްތަކުންނާއި އަދި އަމިއްލަ ފަރުދުން ވެސް ކުރަން ޖެހޭނެ" މައުމޫން ވިދާޅުވިއެވެ.
ރާއްޖޭގެ ޖަލުތަކުގެ ލައިބްރަރީއަށް ފޮތް ހަދިޔާ ކުރުމުގެ ފުރުސަތު މޯލްޑިވްސް ކަރެކްޝަނަލް ސަރވިސް އާއި ހޯމް މިނިސްޓްރީ ގުޅިގެން ހުޅުވާލާފައިވާއިރު ޖަލުތަކުގެ ލައިބްރަރީއަށް ފޮތް ހަދިޔާ ކުރުމުގެ ޕްރޮގްރާމް ފަށާފައިވަނީ މެއި 22 ވަނަ ދުވަހުއެވެ. އަދި މި ޕްރޮގްރާމް ކުރިއަށްދާނީ މެއި 25 ވަނަ ދުވަހުގެ ނިޔަލަށެވެ.
ހޯމް މިނިސްޓްރީން ބުނީ ފޮތް ކިޔުމުގެ ޝައުގުވެރިކަން ޖަލުގައި އުފައްދައި، އާންމު މައުލޫމާތާއި ހުނަރާއި ގާބިލުކަން އިތުރުކޮށް ދޭ މައުލޫމާތު ހުންނަ ފޮތްތައް ކިޔުމުގެ ފުރުސަތު ހޯދައިދީގެން ކުށުގެ ވެށިން ގިނަ ރައްޔިތުންތަކެއް ދުރުހެލި ކުރެވިދާ ކަމަށެވެ. ސަބަބަކީ ފޮތް ކިޔުމަކީ ވިސްނުމާއި ފިކުރަށް ހެޔޮ ބަދަލު ގެނެސްދޭ ކަމަކަށް ވާތީއެވެ.
އެހެންކަމުން ފޮތް ކިޔުމުގެ ތެރެއިން އަހްލާގަށް ހެޔޮ ބަދަލުތަކެއް ގެނައުމަށް ހޯމް މިނިސްޓްރީ އާއި މޯލްޑިވްސް ކަރެކްޝަނަށް ސަރވިސް ގުޅިގެން ހިންގާ ޕްރޮގްރާމްގައި ބައިވެރިވެ، ފޮތް ހަދިޔާ ކުރުމުގެ ފުރުސަތު އާންމުނަށާއި މުއައްސަސާތަކަށް ހުޅުވާލާފައިވާ ކަމަށް ހޯމް މިނިސްޓްރީން ވަނީ ބުނެފައެވެ.
