އދ.ގެ އާއްމު މަޖިލީހުގައި ނިމިދިޔަ ހަފްތާގައި ފޯޅަވަހީގެ މައްސަލައިގައި ނެގި ވޯޓުގައި މޮރިޝަސްއާ ދެކޮޅަށް ރާއްޖެއިން ވޯޓު ދިނުމުން އެކަމަށް މައާފަށް އެދެން ޖެހޭނެ ކަމަށް އިދިކޮޅު ޕާޓީ ޕީޕީއެމުން ބުނެފިއެވެ.

ފޯޅަވަހި ނުވަތަ ޗާގޮސް އައިލެންޑްސް އިނގިރޭސިންގެ އަތްދަށުން މޮރިޝަސްގެ އަތްމައްޗަށް ދޫކޮށްލަން ޖެހޭ ކަމަށް އދގެ ކޯޓަކުން ދިން ލަފާ ބަލައިގަތުމަށް އދއިން ނެގި އާއްމު ވޯޓުގައި ރާއްޖެ ހިމެނޭ ގޮތަށް އެލަފާ ބަލައިނުގަތުމަށް ނިންމީ ހަ ޤައުމުންނެވެ. އަދި އެއްކޮޅަށް 116 ވޯޓު ލިބުނެވެ. މި ލަފާ ބަލައިގަންނަން ޖެހޭ ކަމަށް ވޯޓު ދިން އެއްވެސް ޤައުމަކީ ސަރަހައްދީ އިމުގެ ގޮތުން ފޯޅަވައްސާއި ގުޅުމެއް އޮތް ޤައުމުތަކެއް ނޫނެވެ. ޚާރިޖީ ވުޒާރާއިން އެ މައްސަލާގައި ބުނެފައި ވަނީ އދ.ގެ އާއްމު މަޖިލީހަށް ހުށަހެޅުނު ޤަރާރާ ދެކޮޅަށް ރާއްޖެއިން ވޯޓު ދިނީ ދައުލަތުގެ އެންމެ މަސްލަހަތު އިސްކުރުމަށް ކަމަށެވެ.

އެނގިފައިވާ ގޮތުގައި ފޯޅަވައްސަކީ މޮރިޝަސްގެ ބައެއް ކަމުގައި ވެއްޖެނަމަ ރާއްޖޭގެ ދެކުނުގެ އިޤްތިޞާދީ ކަނޑުގެ ސަރަހައްދުން ރާއްޖެއަށް ބައެއް ގެއްލިގެންދާނެއެވެ. އައްޑޫ ސިޓީގެ ދެކުނުން އޮންނަ، ފޯޅަވައްސަކީ އަސްކަރީ މަރުކަޒެއްގެ ގޮތުގައި އެމެރިކާއިން ބޭނުންކުރަމުންދާ އަތޮޅެކެވެ. އިނގިރޭސީވިލާތުން ވަނީ އެ އަތޮޅު އެމެރިކާއަށް 50 އަހަރަށް ދީފައެވެ.

ޕީޕީއެމުން ބުނެފައި ވަނީ ރާއްޖޭގެ އެ ނިންމުމަކީ ދުނިޔޭގެ މައި ކޯޓާއި މޮރިޝަސްގެ ރައްޔިތުންގެ އިންސާނީ ހައްގުތައް ގެއްލޭ އަމަލެއް ކަމަށެވެ. ފޮރިން މިނިސްޓްރީން މީގެ ކުރިން ބުނެފައި ވަނީ ގޮތުގައި ބައިނަލްއަޤްވާމީ ކޯޓުން ނިންމާފައި ވަނީ އަމަލުކުރުން ލާޒިން ނިންމުމެއް ނޫން ކަމަށާއި، އެއީ ލަފައެއް ކަމަށެވެ. ބައިނަލްއަޤްވާމީ ކޯޓުގެ އެޑްވައިޒަރީ އޮޕީނިއަން ހިފައިގެން އދގެ އާއްމު މަޖިލީހަށް ދިޔައީ އެލަފަޔަށް ބުރަދަނެއް ހޯދުމުގެ ނިޔަތުގައި ކަމަށާއި، އެހެންކަމުން އެއާ ދެކޮޅަށް ވާހަކަ ދެއްކުމުގެ ހައްޤު މި މައްސަލައިގައި މަސްލަހަތު އޮތް ޤައުމެއްގެ ހައިސިއްޔަތުން ރާއްޖެއަށް ލިބިގެންވާ ކަމަށް ޚާރިޖީ ދާއިރާގެ ބައެއް ބޭފުޅުން ފާހަގަކުރައްވައެވެ.

އެ މައްސަލާގައި ޕީޕީއެމުން ކަންބޮޑުވުން ފާޅުކުރިއިރު، ފޯޅަވަހީގެ މައްސަލާގައި ބައިނަލްއަޤްވާމީ ކޯޓުގެ ލަފަޔަކަށް އެދުމަށް މޮރިޝަސްއިން 2017 ވަނަ އަހަރުގެ ޖޫން މަހުގެ 22 ވަނަ ދުވަހު ހުށަހެޅި ހުށަހެޅުމަށް 16 ޤައުމަކުން ދެކޮޅު ހެދިއިރު، އޭގެ ތެރޭގައި ރާއްޖެ ހިމެނެއެވެ. ފޯޅަވަހީގެ މައްސަލާގައި ރާއްޖެއިން ގެންގުޅޭ ސިޔާސަތަކީ ކޮންމެ ސަރުކާރެއް އޮތް ނަމަވެސް އެއް ސިޔާސަތެއް ކަމަށް ފޮރިން މިނިސްޓްރީއިން އިއްޔެ ނެރުނު ބަޔާނެއްގައި ވަނީ ފާހަގަކޮށްފައެވެ.

އެހެންކަމުން ފޯޅަވަހި މައްސަލާގައި ސަރުކާރުން މައާފަށް އެދުމަށް ޕީޕީއެމުން ގޮވާލުމަކީ "ބޮޑު ޖޯކެއް" ކަމަށް ބައެއް މީހުން ދަނީ ސިފަ ކުރަމުންނެވެ.