ޔޫތް މިނިސްޓަރަކު އަލަށް ދަނބިދޫއަށް ވަޑައިގެންފި
23 މެއި 2019 | ބުރާސްފަތި 17:57މިނިސްޓަރު މަހުލޫފު ޒުވާނުންނާ ބައްދަލު ކުރެއްވި
ދަނބިދޫގެ ޒުވާނުންނާއެކު ބޭއްވި ބައްދަލުކުރެއްވުމުގެ ތެރެއިން
ލ.ދަނބިދޫއަށް އަލަށް ޔޫތް މިނިސްޓަރަކު ވަޑައިގަންނަވައިފިއެވެ.
މީގެ ކުރިން އެއްވެސް އެހެން ޔޫތް މިނިސްޓަރަކު އެ ރަށަށް ވަޑައިގެންފައެއް ނުވެ އެވެ.
ރާއްޖެއެމްވީއަށް މައުލޫމާތު ދެއްވަމުން އެރަށުގެ ކައުންސިލްގެ ރައީސް ހުސެއިން އަޝްރަފް ވިދާޅުވީ, ޔޫތް މިނިސްޓަރު އަހުމަދު މަހުލޫފު އެރަށަށް ވަޑައިގަންނަވާ ޒުވާނުންނާ ބައްދަލުކުރައްވާފައިވާ ކަމަށެވެ.
އަޝްރަފް ވިދާޅުވީ, އަލަށް ޔޫތް މިނިސްޓަރަކު ވަޑައިގަންނަވާ ކުޅިވަރު ތަރައްގީ ކުރުމާ ބެހޭ ގޮތުން ޒުވާނުންނާ މަޝްވަރާ ކުރުމުން ވަރަށް ހިތްހަމަޖެހޭ ކަމަށެވެ.
އަޝްރަފް ވިދާޅުވީ މިބައްދަލުވުމުގައި މަޝްވަރާ ކުރެއްވީ މިހާރު ބޭނުންކުރަމުންދާ ދަނޑުގައި ޓާފު އަޅާނީތޯ ނުވަތަ ފުޓްސަލް ދަނޑެއް އެޅުމާ ބެހޭ ގޮތުން ކަމަށެވެ. އަދި މިބައްދަލުވުމުގައި ވަކި ގޮތަކަށް ނުނިންމާ ކަމަށް ވެސް އޭނާ ވިދާޅުވިއެވެ.
މީގެ އިތުރުން އަޝްރަފް ވިދާޅުވީ ޒުވާނުން ބޭނުންވާ ގޮތަށް ކުޅިވަރު ކުޅުމަށް ބޭނުންވާ ދަނޑު ތަރައްގީ ކޮށްދޭނެކަމުގެ ޔަގީންކަން މިނިސްޓަރު މަހުލޫފު ދެއްވި ކަމަށެވެ. މިއީ ޒުވާނުންނަށް ލިބުނު އުފަލެއް ކަމަށް އޭނާ ވިދާޅުވިއެވެ.
ބުރާސްފަތި ދުވަހު މިނިސްޓަރު މަހުލޫފް ދަނބިދޫއަށް ވަޑައިގެންނެވީ މިހާރު ލ. އަތޮޅަށް ކުރައްވަމުން ގެންދަވާ ދަތުރުގަ އެވެ. ދަނބިދޫގެ އިތުރުން އިސްދޫ ކަލައިދޫއަށް މިނިސްޓަރު ވަޑައިގެންނެވިއެވެ.
