ދިއްފުށީގައި ހިނގައިދިޔަ ހާދިސާތަކާ ގުޅިގެން އެއްވެސް މީހަކު ހައްޔަރެއް ނުކުރޭ!
23 މެއި 2019 | ބުރާސްފަތި 07:54ތޫނު އެއްޗަކުން ހަމަލާދީ ހަތަރު މީހަކު ވަނީ ޒަޚަމް ކޮށްލާފައި
ޑިންގީގައި ރޯވެ އަނދަނީ
ބުދަ ދުވަހުގެ ރޭ ކ. ދިއްފުށީގައި ހިނގައިދިޔަ ހާދިސާތަކާ ގުޅިގެން މިހާތަނަށް އެއްވެސް މީހަކު ހައްޔަރު ކޮށްފައި ނުވާ ކަމަށް ފުލުހުން ބުނެފިއެވެ.
ފުލުހުންގެ މީޑިއާ އޮފިޝަލް ރާއްޖެއެމްވީއަށް ވިދާޅުވީ ވައްކަން ކުރި މީހަކު ހޯދުމަށް ނުކުމެ ހިނގި ހަމަނުޖެހުމެއްގައި ތޫނު އެއްޗަކުން ހަމަލާދީ ހަތަރު މީހަކު ޒަޚަމް ކޮށްލާފައިވާ ކަމަށެވެ. އޭގެ ތެރެއިން ދެ މީހަކު މާލެ ގެނެސް އައިޖީއެމްއެޗްގައި ފަރުވާ ދެމުންދާއިރު އަނެއް ދެ މީހުންނަށް ފަރުވާ ދެމުންދަނީ ދިއްފުށީ ސިއްހީ މަރުކަޒުގައި ކަމަށެވެ.
މީގެ އިތުރުން ބުދަ ދުވަހުގެ ރޭ ވަނީ އެ ރަށު ފަޅުތެރޭގައި އޮތް ޑިންގީއެއްގައި ރޯކޮށްލާފައެވެ. އެ ޑިންގީ ބޭނުން ނުކުރެވޭ ވަރަށް އަނދާފައިވާ ކަމަށް ފުލުހުން ވަނީ ހާމަކޮށްފައެވެ.
ދިއްފުށީގައި ބުދަ ދުވަހުރޭ ހިނގި ދެ ހާދިސާގައި އެއްވެސް މީހަކު އަދި މިހާތަނަށް ހައްޔަރު ކޮށްފައި ނުވި ނަމަވެސް ފުލުހުން އެ މައްސަލަ ތަހުގީގު ކުރަމުންދާ ކަމަށް މީޑިއާ އޮފިޝަލް ވިދާޅުވިއެވެ.
