ތޯގަން ހަޒާޑް ޑޯޓްމަންޑަށް ސޮއިކޮށްފި

ބްރޫޝިއާ މޮންޗެންގްލެޑްބެޗްއަށް ކުޅެމުން އަންނަ ތޯގަން ހަޒާޑް ވާދަވެރި ބްރޫޝިއާ ޑޯޓްމަންޑަށް ސޮއިކޮށްފިއެވެ.

ކުރިޔަށް އޮތް ސީޒަނަށް ގިނަ ކްލަބްތަކުން ފާރަލަމުން އައި ހަޒާޑް ޑޯޓްމަންޑަށް ސޮއިކޮށްފައި ވަނީ ފަސް އަހަރު ދުވަހުގެ އެއްބަސްވުމެއްގެ ދަށުންނެވެ. އޭނާއަކީ ޗެލްސީއަށް ކުޅެމުން އަންނަ ބެލްޖިއަމްގެ ކެޕްޓަން އެޑެން ހަޒާޑްގެ ކޮއްކޮއެވެ.

ޑޯޓްމަންޑްގެ ސްޕޯޓިން ޑައިރެކްޓަރ މައިކަލް ޒޯކް ބުނީ، އެ ކްލަބަށް ހަޒާޑް ސޮއިކުރުމުން ވަރަށް އުފާވެފައި ހުރި ކަމަށާއި، އޭނާގެ އެހީ ކްލަބަށް ލިބޭނެކަމާ މެދު ޝައްކު ނުކުރާ ކަމަށެވެ.

ޑޯޓްމަންޑަށް ސޮއިކުރުމަށް ފަހު އުމުރުން 26 އަހަރުގެ ހަޒާޑް ބުނީ، މޮންޗެންގްލެޑްބެޗްއާ އެކު އުފާވެރި ފަސް އަހަރު ހޭދަކުރެވިފައިވާ ކަމަށާއި، އެ ކްލަބް ދޫކޮށް ޑޯޓްމަންޑަށް ބަދަލުވުމަކީ ލިބުނު އިތުރު އުފަލެއް ކަމަށެވެ.

އެގޮތުން ހަޒާޑް ބުނީ، ޑޯޓްމަންޑަކީ ވަރަށް މޮޅު ކްލަބެއް ކަމަށާއި، ކްލަބުގައި އާދަޔާހިލާފު ގިނަ ސަޕޯޓަރުން ވެސް ތިބޭ ކަމަށެވެ. އަދި ކްލަބާ އެކު ކާމިޔާބީ ހޯދަން ބޭނުންވާ ކަމަށް ވެސް އޭނާ ވަނީ ބުނެފައެވެ.

ހަޒާޑް ބްރޫޝިއާ މޮންޗެންގްލެޑްބެޗްއަށް ދާއިމީކޮށް ބަދަލުވީ 2015 ވަނަ އަހަރުގެ ސީޒަނުގައެވެ. އޭނާ ވަނީ އެ ކްލަބަށް މީހާތަނަށް ކުޅުނު 176 މެޗުގައި 45 ލަނޑު ކާމިޔާބުކޮށްފައެވެ. އަދި އޭނާ ވަނީ 40 ލަނޑު ޖެހުމަށް އެހީތެރިވެދީފައެވެ.

ބެލްޖިއަމްގެ އެންމެ މޮޅު ކުޅުންތެރިޔާގެ މަގާމު 2013 ވަނަ އަހަރުގެ ސީޒަނުގައި ހޯދާފައިވާ ތޯގަން ހަޒާޑް ވަނީ މިހާތަނަށް ގައުމީ ޓީމަށް ކުޅުނު 21 މެޗުގައި ތިން ލަނޑު ކާމިޔާބުކޮށްފައެވެ. އަދި އޭނާ ވަނީ ނިމިގެންދިޔަ ވޯލްޑް ކަޕްގެ ތިން ވަނަ ވެސް ބެލްޖިއަމްއާ އެކު ހޯދާފައެވެ.