ސިސިލްފަރުން ހުށައެޅި މައްސަލައިގެ ވަގުތީ އަމުރެއް ނެރެދެވޭކަށް ނެތް: ސިވިލް ކޯޓު

މި އަހަރު ހައްޖަށް މީހުން ގެންދާ ކުންފުނިތައް އިސްލާމިކް މިނިސްޓްރީން ކަނޑައެޅި ގޮތް ބާތިލު ކުރަން ސިސިލްފަރު ހައްޖު އެންޑް އުމްރާ ގްރޫޕުން ސިވިލް ކޯޓަށް ހުށަހެޅި މައްސަލައިގައި ވަގުތީ އަމުރެއް ނެރެދެވެން ނެތް ކަމަށް އެކޯޓުން ކަނޑައަޅައިފިއެވެ.

ސިވިލްކޯޓުން ވަގުތީ އަމުރާއި މެދު ނިންމިގޮތް ބަޔާން ކޮށް ބުނެފައިވަނީ ޝަރީއަތުގެ އަދާލަތުގެ ހަމައަށް ރިއާޔަތް ކޮށް އެކަށައަޅާފައިވާ ހަމަތަކާއި ޝަރީއަތް ކުރުމާއި ބެހޭ ގޮތުން ހެދިފައިވާ ގަވައިދުގެ 295 ވަނަ މާއްދާގައިވާ ގޮތުގެ މައްޗަށް ވަގުތީ އަމުރެއް ނެރެންޖެހޭ ހާލަތުގެ ކަމެއް ސިސިލްފަރުން ހުށައަޅާފައިވާ ކަންތައްތަކުގެ ތެރޭގައި ނެތް ކަމަށެވެ. އަދި ވަގުތީ އަމުރާއި ގުޅޭގޮތުން ސުޕްރީމް ކޯޓުގެ ގަޒިއްޔާގައި ކަނޑައަޅާފައިވާ އުސޫލުތަކަށް ރިއާޔަތް ކޮށް ސިސިލްފަރުން އެދުނު ގޮތަށް ވަގުތީ އަމުރެއް ނެރެފިނަމަ ދައުވާގެ މައުޟޫގައި ދުރާާ ވަގުތީ އަމުރު މައުޟޫއީ ދައުވާއަށް ގޮތެއް ކަނޑައެޅިގެންދާނެކަމަށް ވެގެންދާނެކަމަށް ޝަރީއަތަށް ބެލެވޭ ކަމަށެވެ.

Advertisement

މިމަހުގެ 14 ވަނަ ދުވަހު ސިސިލްފަރުން ކޯޓަށް ހުށައެޅި އެމައްސަލައިގެ ޑިސްޕިއުޓް ރިޒޮލިއުޝަން މަރުހަލާ ގައި ސިސިލްފަރުގެ ގާނޫނީ ވަކީލު ވަނީ ހައްޖަށް މީހުން ގެންދިއުމަށް ޕޮއިންޓް ދިން އުސޫލު އާންމުކޮށްފައި ނުވާ ކަމަށް ބުނެފަ އެވެ.

ސިސިލްފަރުން ސިވިލް ކޯޓަށް ހުށަހެޅި އެ މައްސަލާގައި ބުނެފައި ވަނީ ކުންފުނީގެ ތަޖުރިބާއަށް ބަލައި ފަސް ޕަސެންޓް ދޭނެ ކަމަށް ބުނެފައިވާ ކަމަށާއި އެކުންފުންޏަކީ 35 އަހަރު ހައްޖާޖީންގެ ހިދުމަތުގައި އުޅެފައިވާ ގްރޫޕެއް ކަމަށެވެ. ނަމަވެސް ސިސިލްފަރުގެ ތަޖުރިބާއަށް އިސްލާމިކް މިނިސްޓްރީ ދީފައި ވަނީ 0.7 ޕަސެންޓް ކަމަށް އެ ކުންފުނިން ކޯޓަށް ހުށައެޅި މައްސަލާގައި ވަނީ ބުނެފައެވެ.

އިސްލާމިކް މިނިސްޓްރީން ބުނީ ސިސިލްފަރުން މައްސަލަ ހުށައެޅިއިރު ހައްޖަށް މީހުން ގެންދިއުމަށް ޕޮއިންޓް ދިން އުސޫލު އާންމުކޮށްފައިވާ ކަމަށާއި އެތަފްސީލުތައް ކުންފުނިތަކަށް ފޮނުވާފައިވާނެ ކަމަށެވެ. އަދި ނޫސްވެރިން މެދުވެރިކޮށް ޕޮއިންޓްދިން އުސޫލު އާންމު ކޮށްފައިވާނެ ކަމަށާއި އިތުރަށް ފުރިހަމަ ކުރަންޖެހޭ ކަމެއް އޮތްނަމަ ކުންފުނިތަކުން އެދުމުން އެކަން ކުންފުނިތަކަށް އެމިނިސްޓްރީން ބުނެދޭނެ ކަމަށް އެމިނިސްޓްރީން ވަނީ ބުނެފައެވެ.