ގާނޫނު ހަދާ މަޖިލީހުގެ އަވަސް އިންތިޚާބެއް ބޭއްވުމަށް މަޑޫރޯ ހުށަހަޅުއްވައިފި
އަވަސް އިންތިޚާބުގެ ތާރީޚެއް މަޑޫރޯ ވިދާޅެއް ނުވޭ
މަޑޫރޯ އެއްވުމެއްގައި ބައިވެރިވެ ވަޑައިގަންނަވަނީ
ވެނެޒުއޭލާގެ ގާނޫނުހަދާ މަޖިލީހުގެ އަވަސް އިންތިޚާބެއް ބޭއްވުމަށް ރައީސް ނިކޮލަސް މަޑޫރޯ ހޯމަ ދުވަހު ހުށަހަޅުއްވައިފިއެވެ.
އެ ގައުމުގެ ގާނޫނު ހަދާ މަޖިލީހުގެ ރައީސްއަކީ އިދިކޮޅު ލީޑަރު އަދި އަމިއްލަފުޅަށް އިންތިގާލީ ލީޑަރު ކަމަށް އިއުލާނުކުރައްވާފައިވާ ވަން ވައިދޯ ކަމަށްވާއިރު ހުޅަނގުގެ ގިނަ ގައުމުތަކުން ބަލައިގަންނަ އެގައުމުގެ މުއައްސަސާއަކީ އެއީއެވެ.
ނޭޝަނަލް އެސެމްބްލީ ނުވަތަ އެ ގައުމުގެ ގާނޫނުހަދާ މަޖިލީހުގެ އިންތިޚާބު އެންމެ ފަހުން ބާއްވާފައިވަނީ 2015 ވަަނަ އަހަރުކަމަށްވާއިރު އެ އިންތިޚާބު ކާމިޔާބު ކޮށްފައިވަނީ އިދިކޮޅު ފަރާތްތަކުންނެވެ. އާއްމު އުސޫލުން އެ ގައުމުގައި ގާނޫނުހަދާ މަޖިލީހުގެ އިންތިޚާބެއް ދެން އޮންނާނީ 2020 ވަނަ އަހަރުގެ ފަހުކޮޅުއެވެ. އަވަސް އިންތިޚާބު ބާއެްވާނެ ތާރީޚެއްް މަޑޫރޯ ނުދެއްވައެވެ.
ސަރުކާރަށް ތާއީދުކޮށް ބޭއްވި އެއްވުމެއްގައި މަޑޫރޯ ވިދާޅުވީ މިދިޔަ ފަސް އަހަރު ގާނޫނު ހަދާ މަޖިލީސް އޮތީ ގާނޫނީ އިމުގެ ތެރޭގައި ނޫންކަމަށާއި މުޅި މުއައްސަސާ ސައްހަ ތަނަކަށް ހައްދަވާނެ ކަމަށެވެ.
