ވެލިދޫގައި ޒަމާނީ ފެންވަރުގެ ހިނަވާގެއެއް ހުޅުވައިފި
ހިނަވާގެ އެޅުމަށް މިލިއަނެއްހާ ރުފިޔާ ޚަރަދުވި
ވެލިދޫ ހިނަވާގެ
މަރުވާ މީހުން ހިނެވުމަށްޓަކައި ވެލިދޫގައި ޒަމާނީ ފެންވަރުގެ ހިނަވާގެއެއް ހުޅުވައިފިއެވެ.
ވެލިދޫ ކައުންސިލުގެ ނައިބުރައީސް އަޙުމަދު ޖައުފަރު (ޖޯބެ) ރާއްޖެޓީވީއާ ވާހަކަ ދައްކަވަމުން ވިދާޅުވީ އެރަށު ކައުންސިލްގެ އިސްނެގުމާ އެކު ނޮޅިއެންޓަރޕްރައިސަސްގެ ފާރަތުން ބިނާ ކުރި މި ހިނަވާގެ ހުޅުވައި ދެއްވީ އެރަށު ދޭލިޔާގެ ހަސަން މޫސާފުޅު ކަމަށެވެ.
މިލިއަނެއްހާ ރުފިޔާ ޚަރަދު ކޮށްގެން ހަދާފައިވާ މި ހިނަވާގެ އެޅުމަށް ހަތް މަސް ދުވަހުގެ މުއްދަތެއް ނެގި ކަމަށް އޭނާ ވިދާޅުވިއެވެ.
އަޙުމަދު ޖައުފަރު ވިދާޅުވީ ހިނަވާގޭގައި ހިމެނެނީ ހިނަވާ ބަޔަކާއި، ގުދަނަކާއި، ފާޚާނާއެއްގެ އިތުރުން ވެއިޓީން ހޯލެއް ކަމަށެވެ. އަދި ސަންދޯން ޖަހާ ބައެއް ހިމެނޭއިރު ހިނަވާގެ ބޭރުގައި ވެސް މީހުންނަށް މަޑުކޮށްލައިގެން ތިބެވޭނެ އިންތިޒާމް ހަމަޖެހިފައިވާ ކަމަށް އަޙުމަދު ޖައުފަރު ވިދާޅުވިއެވެ.
މަރުވާ މީހުން ހިނެވުމަށާ ވަޅުލުމަށް ބޭނުންވާ ހުރިހާ ވަސީލަތްތަކެއް މީގެ ކުރިން ވެސް ރައްޔިތުންނަށް ކައުންސިލުން ހިލޭ ފޯރުކޮށްދެމުން ދާކަމަށް އަޙުމަދު ޖައުފަރު ވިދާޅުވިއެވެ.
މީގެ އިތުރުންވެ ސް ރަމަޟާންމަހަށް ޚާއްސަކޮށްގެން ކައުން ސިލުން އިސްނަގައިގެން ވެލިދޫގައި ތަރާވީސްނަމާދު ކުރުމާއި ދީނީ ނަސޭހަތް ދިނުމުގެ އިންތިޒާމް ހަމަޖެއްސުމުގެ އިތުރުން ރަމަޟާން މަސް ފެށުމުގެ ކުރިން ކޮންމެ ގޭބިސީއަކަށް މަސްދަޅު ކޭހެއް ބަހާފައިވާ ކަން ފާހަގަ ކޮށްލެވެއެވެ.
