ރާއްޖޭގެ ކްރިކެޓް ހާލަތު ބެލުމަށް އިންޑިއާގެ ވަފުދެއް ރާއްޖެ އަތުވެއްޖެ

ދިވެހިރާއްޖޭގެ ކްރިކެޓްގެ ހާލަތު ބަލައި ދިރާސާ ކުރުމަށް އިންޑިއާގެ ކްރިކެޓް ބޯޑްގެ ވަފުދެއް ރާއްޖެ އަތުވެއްޖެއެވެ.

ރާއްޖެ ވަޑައިގެންނެވި ވަފުދުގައި ހިމެނިވަޑައިގަންނަވަނީ އިންޑިއާގެ ކްރިކެޓްގެ ބެލެނިވެރި ފަރާތް ކަމަށްވާ ބޯޑް އޮފް ކްރިކެޓް ފޯ ކްރިކެޓް އިންޑިއާ (ބީސީސީއައި)ގެ ޖެނެރަލް މެނޭޖަރ، އިންޑިއާގެ ކުރީގެ ވިކެޓް ކީޕަރ ސަބާ ކަރީމް އަދި އިންޑިއާ ގައުމީ ޓީމްގެ ފީލްޑިން ކޯޗް އަބޭ ޝަރްމާއެވެ.

މި ވަފުދުން ޔޫތު މިނިސްޓަރ އަހުމަދު މަހްލޫފްއާ ބައްދަލުކޮށްފައިވާއިރު، މަހުލޫފް ކުރެއްވި ޓުވީޓެއްގައި ވިދާޅުވީ، އިންޑިއާގެ ވަފުދުން ރާއްޖެއަށް ކުރާ ދަތުރުގެ ސަބަބުން ރާއްޖޭގެ ކްރިކެޓަށް ބޮޑެތި ކުރިއެރުންތައް ލިބިގެންދާނެ ކަމަށެވެ.

ބީސީސީއައިގެ އޮފިޝަލަކު އިންޑިއާގެ ނޫހަކަށް ދިން އިންޓަވިއުއެއްގައި ވިދާޅުވީ، އިންޑިއާގެ ސަރުކާރުން ރާއްޖޭގައި ކްރިކެޓް ކުރިއެރުވުމަށް އެހީތެރިވަން އެދުމުން އެކަމާއި އުފާކުރާ ކަމަށާއި، އިންޑިއާގެ ވަފުދުން ރާއްޖެއަށް ކުރާ ދަތުރުގައި ރާއްޖޭގައި ކްރިކެޓް އިތުރަށް ކުރިއަރުވައި ތަރައްގީ ކުރުމާއި ބެހޭ ގޮތުން މަސައްކަތް ކުރާނެ ކަމަށެވެ.

އިންޑިއާގެ ވަފުދު ރާއްޖެ އަންނަ ގޮތަށް ހަމަޖެހުނީ މިދިޔަ މަހު އިންޑިއަން ޕްރިމިއާ ލީގުގެ މެޗެއް ބައްލަވަން ރައީސް އިބްރާހިމް މުހައްމަދު ސޯލިހު އިންޑިއާގެ ބެންގަލޫރަށް ކުރެއްވި ދަތުރުފުޅުގައި އެކަމަށް އެދުމުންނެވެ.

ރައީސް ސޯލިހު ބެންގަލޫރަށް ކުރެއްވި ދަތުރުގައި އިންޑިއާގެ މަޝްހޫރު ދެ ކުޅުން ތެރިން ކަމަށްވާ ވިރާޓް ކޯލިގެ އިތުރުން އެމްއެސް ދޯނީ ވަނީ އެ ދެ ކުޅުންތެރިންގެ ޖޯޒީ ރައީސް ސޯލިހަށް އަރުވާފައެވެ.