އޮޑިޓް ރިޕޯޓް ހުށަނާޅާ ޕާޓީތައް 50،000ރ އިން ޖޫރިމަނާ ކޮށްފިއެވެ.

އިލެކްޝަންސް ކަމިޝަން(އީސީ)އިން ބުނީ ޖޫރިމަނާ ކޮށްފައިވަނީ އަދާލަތު ޕާޓީއާއި ޑީއާރުޕީން ކަމަށެވެ.

އެދެޕާޓީ ވެސް ޖޫރިމަނާ ކޮށްފައިވަނީ ކޮންމެ ޕާޓީއެއް 50،000ރ.އަށެވެ.

އޮޑިޓް ރިޕޯޓް ހުށައެޅުމަށް އީސީއިން ހުޅުވާލި ފުރުސަތުގައި އެކަމިޝަނަށް ރިޕޯޓް ހުށައަޅާފައިވަނީ 10،000 މެމްބަރުން ހަމަވާ ހަތަރު ޕާޓީ އެކަންޏެވެ. އެއީ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ)، ޖުމްހޫރީ ޕާޓީ (ޖޭޕީ) މޯލްޑިވްސް ޑިވެލޮޕްމަންޓް އެލަޔަންސް (އެމްޑީއޭ) އާއި ޕްރޮގްރެސިވް ޕާޓީ އޮފް މޯލްޑިވްސް(ޕީޕީއެމް)އިންނެވެ.

ސިޔާސީ ޕާޓީތަކުގެ ގާނޫނު ބުނާ ގޮތުން 10،000 މެމްބަރުން އެޕާޓީއެއްގައި ހިމެނޭނަމަ އެ ޕާޓީއަކަށް ފައިސާ ދޫކުރަން ވާނެއެވެ. އެހެން ނަމަވެސް ޕާޓީއަށް ފައިސާ ދޫކުރެވޭނީ ފާއިތުވެދިޔަ އަހަރުގެ އޮޑިޓް ރިޕޯޓާއި އަހަރީ ރިޕޯޓް އެޕާޓީއަކުން އީސީއަށް ހުށައަޅައިގެންނާއި ޕާޓީގެ މަގުސަދުތައް ހާސިލު ކުރުމަށް މަސައްކަތް ކޮށްފައިވާ އަހަރީ ރިޕޯޓުން ފެންނަން އޮތުމުންނެވެ.

މީގެ އިތުރުން އޮޑިޓް ރިޕޯޓް ހުށައެޅި ޕާޓީތަކުގެ ތެރެއިން އީސީއިން ވަނީ ސިޔާސީ ޕާޓީތަކުގެ ގާނޫނާއި ޚިލާފަށް ޕީޕީއެމުން ފައިސާ ޚަރަދު ކުރިކަން ބަޔާންކޮށްފައިވާތީ އެޕާޓީ 20،000ރ އއިން ވަނީ ޖޫރިމަނާ ކޮށްފައެވެ. އަދި ޕީޕީއެމްގެ ފައިސާ ބެލެހެއްޓުމުގައި އިސްކޮށް ހަރަކާތްތެރިވާ މީހާ 5،000ރ.އިން ވަނީ ޖޫރިމަނާ ކޮށްފައެވެ.

ސިޔާސީ ޕާޓީތަކުގެ ގާނޫނުގައި ބުނެފައިވަނީ އޮޑިޓް ރިޕޯޓް ހުށަނާޅާ ޕަޓީތައް 20،000 ރުފިޔާއާއި، 50،000 އިން ޖޫރިމަނާ ކުރެވޭނެ ކަމަށެވެ. އަދި ޕާޓީއަކުން ކަނޑައަޅާ ފަރާތެއް 5000 ރުފިޔާއާއި، 10،000 ރުފިޔާއިން ޖޫރިމަނާ ކުރެވިދާނެ ކަމަށް ވެސް ގާނޫނުގައި ބުނެފައިވެއެވެ.

އޮޑިޓް ރިޕޯޓް ހުށައެޅި 10،000 މީހުން ހަމަވި ހަތަރު ޕާޓީގެ ތެރެއިން ޕީޕީއެމް ފިޔަވައި ދެން ހުރި ޕާޓީތަކަށް ފައިސާ ދޫކުރުމަށް އީސީއިން ވަނީ ނިންމާފައެވެ. ޕީޕީއެމަށް ފައިސާ ދޫކުރުން މަޑުޖައްސާލީ އެ ޕާޓީއިން ހުށައެޅި އޮޑިޓް ރިޕޯޓުގައި އިސްލާހު ކުރަންޖެހޭ ކަންތައްތަކެއް ހުރުމުންނެވެ. އީސީއިން ބުނީ ޕީޕީއެމަށް ފައިސާ ދޫކުރާނީ އޮޑިޓް ރިޕޯޓުގައި ރަނގަޅު ކުރަންޖެހޭ ކަންތައްތަކެއް ހުށައެޅުމުންކަމަށެވެ. ޕީޕީއެމުން ވަނީ ރަނގަޅު ކުރަން އީސީއިން ބުނި ކަންތައްތައް ފުރިހަމަ ކުރުމަށްފަހު އީސީއަށް އޮޑިޓް ރިޕޯޓް ހުށައަޅާފައެވެ.