ތުޅާދޫ ކަރަންޓުގެ ހާލަތު ރަނގަޅު ކުރުމަށް ފެނަކައިގެ ޚަރަދުގައި ޖެނެރޭޓަރސެޓެއް ފޮނުވައިފި
20 މެއި 2019 | ހޯމަ 10:57600 ކިލޯވޯޓުގެ ޖެނެރޭޓަރ ސެޓެއް ވަނީ ފޮނުވާފައި
ބ.ތުޅާދޫ
ބ.ތުޅާދޫ ކަރަންޓުގެ ހާލަތު ރަނގަޅު ކުރުމަށްޓަކައި ފެނަކަ ކޯޕަރޭޝަންގެ ޚަރަދުގައި އެރަށު އިންޖީނުގެއަށް ޖަނަރޭޓަރ ސެޓެއް ފޮނުވައިފިއެވެ.
ހޯމަ ދުވަހު އެކުންފުނިން ކުރި ޓްވީޓެއްގައި ބުނީ، ބ.ތުޅާދޫ ކަރަންޓުގެ ހާލަތު ރަނގަޅު ކުރުމަށް އެރަށު އިންޖީނުގެއަށް ފޮނުވާ 600 ކިލޯވޯޓުގެ ޖެނެރޭޓަރ ސެޓަކީ އެކުންފުނީގެ ޚަރަދުގައި ގަތުމަށް ފަހު ފޮނުވާފައިވާ ޖެންސެޓެއް ކަމަށެވެ.
އެކަމާ ގުޅޭގޮތުން "ރާއްޖެއެމްވީ"އަށް މައުލޫމާތު ދެއްވަމުން ތުޅާދޫ ކައުންސިލުގެ ރައީސް އަހުމަދު ރަޝީދު ވިދާޅުވީ، ފެނަކައިން ފޮނުވާފައިވާ ޖެންސެޓް ލިބިފައިވާ ކަމަށާއި، މިހާރު ކުރިއަށް ދަނީ ޖެންސެޓް އިންސްޓޯލް ކުރުމުގެ މަސައްކަތް ކަމަށެވެ. އަދި ތުޅާދޫގެ ކަރަންޓު މައްސަލައަށް އަހަރެއް ވެފައިވާ ކަމަށާއި، އަލަށް އިންސްޓޯލް ކުރާ ޖެންސެޓްގެ ސަބަބުން އެކަމަށް ހައްލެއް ލިބިގެންދާނެ ކަމަށް ވެސް އޭނާ ވިދާޅުވިއެވެ.
ރަށްރަށަށް ދިމާވެފައިވާ ކަރަންޓުގެ މައްސަލަ ހައްލު ކުރުމަށް މި ސަރުކާރުން ބޮޑު އިސްކަމެއްދީގެން މަސައްކަތް ކުރަމުންދާއިރު، ކުރިއަށް އޮތް ތިން އަހަރުގެ ތެރޭގައި މުޅި ރާއްޖޭގެ ކަރަންޓް މައްސަލަ ހައްލު ކޮށްދެއްވާނެ ކަމަށް ފެނަކަ ކޯޕަރޭޝަންގެ މެނޭޖިން ޑިރެކްޓަރ އަހުމަދު ސައީދު މުހައްމަދު ވަނީ ވިދާޅުވެފައެވެ.
