ނިއުގެ ޖާގަ އެހެން ކްލަބަކަށް ނުދޭނަން: އެފްއޭއެމް

ފުޓުބޯޅައިގެ ހުރިހާ ހަރަކާތްތަކުން ވަގުތީ ގޮތުން ސަސްޕެންޑުކޮށްފައިވާ ނިއުރޭޑިއަންޓް ސްޕޯޓްސް ކްލަބުގެ ބަދަލުގައި ދިވެހި ޕްރިމިއާ ލީގަށް އިތުރު ޓީމެއް ނުނަގަން ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ނިންމައިފިއެވެ.

އެފްއޭއެމްގެ ރައީސް ބައްސާމް އަދީލް ޖަލީލު ކުރެއްވި ޓުވީޓެއްގައި ވިދާޅުވީ، މިއަހަރުގެ ދިވެހި ޕްރިމިއާ ލީގުގައި ނިއުގެ ބަދަލުގައި އެއްވެސް ޓީމެއް ނުނަގަން ނިންމާފައިވާ ކަމަށެވެ.

ނަމަވެސް ބައްސާމް މީގެކުރިން ވިދާޅުވީ، ނިއުގެ ޖާގަ މިދިޔަ އަހަރު ފުރަތަމަ ޑިވިޝަނުން ރެލިގޭޓްވި ކްލަބް ވެލެންސިއާއަށް ލިބުމުގެ ފުރުސަތު އޮތް ކަމަށެވެ. ނަމަވެސް މިހާރު ބައްސާމް ދެއްކެވި ވާހަކަ މުޅިން ވަނީ ބަދަލުވެފައެވެ.

ވަގުތީ ގޮތުން ނިއު ސަސްޕެންޑުކުރަން އެފްއޭއެމުން ނިންމީ އެ ކްލަބުގެ ކުޅުންތެރިންނަށް މުސާރައިގެ ގޮތުގައި ދޭން ޖެހޭ 3.8 ރުފިޔާ ނުދީ އޮތުމުން، އެ ފައިސާ ދައްކާ ނިމެންދެން މި އަހަރުގެ ޖެނުއަރީ މަހުގެ 26 ވަނަ ދުވަހުއެވެ. އަދި މާޗު މަހުގެ 25 ވަނަ ދުވަހު ނިއުގެ ސަސްޕެންޝަން ދަމަހައްޓަން އެފްއޭއެމްގެ އޯޑިނަރީ ކޮންގްރެސްގައި ވެސް ވަނީ ނިންމާފައެވެ.

އޮންލައިން ނޫސް މިހާރަށް ދިން އިންޓަވިއުއެއްގައި އެފްއޭއެމްގެ ޖެނެރަލް ސެކެޓްރީ ހުސެއިން ޖަވާޒް ވިދާޅުވެފައި، ނިއު ސަސްޕެންޑުކޮށްފައި އޮއްވާ އިތުރު ޓީމެއް ދިވެހި ޕްރިމިއާ ލީގަށް ގެނެވޭނެ ގޮތެއް ނެތް ކަމަށާއި، އެކަމަށް ގާނޫނީ ގޮތުން ވެސް ފުށުއެރުންތަކެއް އެބަހުރި ކަމަށެވެ.

މީގެ އިތުރުން ޖަވާޒް ވިދާޅުވީ، ނިއުގެ ސަސްޕެންޝަން އުވާލުމާ އެކު، އެ ކްލަބަށް މުބާރާތްތަކުގައި ވާދަކުރެވޭނެ ކަމަށެވެ.

ފުރަތަމަ ޑިވިޝަންގައި މި ފަހަރު ވާދަކުރަނީ އެންމެ ފަހުގެ ޗެމްޕިއަން ޓީސީ ސްޕޯޓްސް ކްލަބް، މާޒިޔާ ސްޕޯޓްސް އެންޑް ރެކްރިއޭޝަން، ކްލަބް އީގަލްސް، ޔުނައިޓެޑް ވިކްޓަރީ، ކްލަބް ގްރީން ސްޓްރީޓްސް، ވިކްޓަރީ ސްޕޯޓްސް ކްލަބް، ށ. ފޯކައިދޫ، ފ. ނިލަންދޫ އަދި މި ފަހަރު އަލަށް ފުރަތަމަ ޑިވިޝަނުގައި ވާދަކުރާ ޑަ ގްރާންޑޭ ސްޕޯޓްސް ކްލަބެވެ.

ސީޒަން ހުޅުވާ މެޗުގައި ބައްދަލުކުރާނީ ދިވެހި ޕްރިމިއާ ލީގުގެ ޗެމްޕިއަން ޓީސީ އަދި މިނިވަން ޗެމްޕިއަންޝިޕްގެ ދެވަނަ ހޯދި ށ.ފޯކައިދޫ އެވެ. މި އަހަރުގެ ޗެރިޓީ މެޗު ކުޅޭނީ ދެ ލެގަކަށެވެ. އެގޮތުން ފުރަތަމަ ލެގު އަންނަ މަހު 7 ވަނަ ދުވަހު ފޯކައިދޫގައި ކުޅުމަށް ހަމަޖެހިފައިވާއިރު، އަނެއް ލެގު އޮންނާނީ އަންނަ މަހުގެ 10 ވަނަ ދުވަހު މާލޭގަ އެވެ.

ސީޒަން ހުޅުވާ މެޗުގައި ކުޅެން ފޯކައިދޫގެ ބަދަގައި ފުރަތަމަ ފުރުސަތު ލިބުނީ ތ.ތިމަރަފުއްޓަށެވެ. ނަމަވެސް އެ ކްލަބުން ވަނީ އެ ފުރުސަތު ދޫކޮށްލާފައެވެ.