ކޮޅުވެއްޓިއެއްގެ ތެރޭގައި މީހަކު ނިޔާވެފައި އޮއްވާ ފެނިއްޖެ

ލ. މާވަށުގައި ބަނދަރުކޮށްގައި އޮތް ކޮޅުވެއްޓިއެއްގެ ތެރޭގައި މީހަކު ނިޔާވެފައި އޮއްވާ ފެނިއްޖެއެވެ.

ފުލުހުން ބުނި ގޮތުގައި ކޮޅުވެއްޓީގައި ނިޔާވެފައި އޮއްވާ ފެނިފައިވަނީ އުމުރުން 59 އަހަރުގެ މީހެކެވެ. ނަމަވެސް އެއީ ކާކު ކަމެއް ހާމައެއް ނުކުރެ އެވެ.

ރާއްޖެ އެމްވީއަށް ކަށަވަރުވެފައިވާ ގޮތުގައި ނިޔާވެފައި ވަނީ އޭދަފުށީ ގުލިސްތާނުގޭ އަހްމަދު ނަސީމުއެވެ. އޭނާއަކީ އޭޑީކޭ ކޮމްޕެނީގެ އެ ކޮޅުވެއްޓީގެ ކެޕްޓަން އެވެ.

"އުއްލާން" ކިޔާ އެ ކޮޅުވެއްޓި މާވަށު ބޭރުގައި ބަނދަރުކުރީ، ގއ. އަތޮޅުގައި ތަރައްގީކުރާ ރިސޯޓަކަށް މުދާ ހުސްކުރުމަށް ފަހު އެނބުރި ތިލަފުއްޓަށް ދިއުމުގެ މަގުމަތީގަ އެވެ. އެ ކޮޅުވެއްޓި މާވަށުގައި ބަނދަރުކުރީ ހޮނިހިރު ދުވަހުގެ ރޭ 9:30 ހާއިރު ކަމަށް، އޭގެ ކްރޫއެއްގެ ގޮތުގައި މަސައްކަތްކުރާ މާވަށަށް ނިސްބަތްވާ އަހްމަދު ރަޝީދު ބުންޏެވެ.

އޭނާ ބުނި ގޮތުގައި އަހްމަދު ނަސީމް ނިދަން ދިޔައީ 11:00 ހާއިރު ކަމަށާއި އާދަޔާ ޚިލާފު އެއްވެސް ކަމެއް ނުފެންނަ ކަމަށެވެ.

ނަސީމްގެ ހަށިގަނޑު މާލެ ގެންދިއުމަށް ކައްދޫ އެއާޕޯޓަށް މިހާރު ވަނީ ގެންގޮސްފަ އެވެ.