'ގޭމް އޮފް ތްރޯންސް'ގެ ފަހު ސީޒަން ރީމޭކް ކުރުމަށް ގޮވާލާ ޕެޓިޝަންގައި ނުވަ ލައްކައަށް ވުރެ ގިނަ ސޮއި!

މަޝްހޫރު ސީރީޒް 'ގޭމް އޮފް ތްރޯންސް'ގެ ފަހު ސީޒަންއާ މެދު ހިތްހަމަ ނުޖެހިގެން، ފޭނުންތަކެއް ވަނީ ޕެޓިޝަނެއް ފަށާފައެވެ.

ޗޭންޖް.އޯގް ގައި މޭ މަހުގެ 9 ގައި ފަށާފައިވާ ޕެޓިޝަނަށް ފުރަތަމަ ދެ ތިން ދުވަހު މާ ބޮޑު ސަމާލުކަމެއް ނުލިބުނު ނަމަވެސް، މޭ 12 ގައި ނެރުނު އެ ޕިސޯޑަށް ފަހު އެ އަށް ބޮޑު ސަމާލުކަމެއް ލިބުނެވެ. އެގޮތުން، 18 މޭގެ މެންދުރު 12އާ ހަމައަށް އެ ޕެޓިޝަންގައި 940,011 އަށް ވުރެ ގިނަ މީހުން ވަނީ ސޮއިކޮށްފައެވެ.

މި ޕެޓިޝަންގައި 'ގޭމް އޮފް ތްރޯންސް'ގެ ސްކްރީންޕްލޭ ލިޔާ ޑޭވިޑް ބެނިއޮފް އާއި ޑީ.ބީ ވެއިސްއަށް ވަނީ ފާޑު ކިޔާފައެވެ. ކުރިން ލިޔެފައިވާ ފޮތެއް ނުބަލާ ސްކްރީންޕްލޭ އެއް ލިޔުމުގެ ޓެލެންޓެއް އެ މީހުންގެ ނެތްކަމަށް ޕެޓިޝަން ފެށި 'ޑިލަން ޑީ' ފާހަގަކޮށްފައިވެއެވެ. އަދި މި ސީރީޒްއަށް "ރަނގަޅު ފަހު ސީޒަނެއް ލިބެންޖެހޭ"ކަމަށް އޭނާ ބުނެފައިވެއެވެ.

'ގޭމް އޮފް ތްރޯންސް' އަކީ ޖޯޖް އާރް. އާރް މާޓިންގެ ފޮތްތަކެއްގެ މައްޗަށް އެޗްބީއޯއިން ތައްޔާރު ކުރާ ސީރީޒްއެކެވެ. ނަމަވެސް އޭނާ މިހާތަނަށް ރިލީޒްކޮށްފައިވަނީ މި ފްރެންޗައިސްގެ ފަސް ފޮތެވެ. ފްރެންޗައިސްގެ ބާކީ ހުރި ފޮތްތައް އަދި ނިންމާފައި ނުވާއިރު، ސީރީޒް ކުރިއަށް ގެންދިއުމަށް މާޓިންވަނީ ބެނިއޮފް އާއި ވެއިސްއަށް އޭގެ މުހިންމު ޕްލޮޓްތައް ކިޔާދީފައެވެ. ސަބަބަކީ ގިނަ ކުޑަ ކުދިންތަކެއް ތަރިންގެ ގޮތުގައި ފެންނަ މި ޝޯވ ޝޫޓު ކުރުން ލަސް ކުރެވެން ނެތުމުންނެވެ.

މި ޕެޓިޝަންގައި ބައި މިލިއަނަށް ބުރެ ގިނަ މީހުން ސޮއި ކުރި ނަމަވެސް، މިއީ ޝޯވ ބަލާ މީހުންނާ އަޅާ ބަލާއިރު ކުޑަ އަދަދެކެވެ. 'ގޭމް އޮފް ތްރޯންސް'ގެ ފަހު ސީޒަނުގެ އެޕިސޯޑަކަށް އެވަރޭޖްކޮށް 17 މިލިއަނަށް ވުރެ ގިނަ ވިއު ލިބޭކަމަށް ރިޕޯޓްކުރެވިފައިވެއެވެ.

މިފަދަ ޕެޓިޝަންތައް ބޭނުންކޮށްގެން ބައެއް ކަންކަން ބަދަލު ކުރެވިފައިވާއިރު، ބައެއް ފަރާތްތަކުން ދެކޭ ގޮތުގައި 'ގޭމް އޮފް ތްރޯންސް'ގެ ތަރިން މިހާރު މިވަނީ މާ މައްޗަށް ގޮސްފައެވެ.

މި ސީރީޒްގެ ލިޔުންތެރިން ބަދަލު ކުރަން ގޮވާލާއިރު، އެޑިޓިންގ އާއި ކުއަލިޓީގެ މައްސަލައެއްވެސް ވަނީ ފެންމަތިވެފައެވެ. އެގޮތުން، ސީޒަން އަށެއްގެ އެޕިސޯޑެއްގެ ސީނެއްގައި 'ސްޓާބަކްސް' ކޮފީތަށްޓޭއް ވަރަށް ރީތި ކޮށް ފެނުނެވެ.