ޗައިނާ އާއި އެމެރިކާގެ ޕާޓްނަރޝިޕަކުން ޓީއެމްއޭގެ މެޖޯރިޓީ ހިއްސާ ގަނެފި

ރާއްޖޭގައި ކަނޑަށް ޖައްސާ މަތިންދާބޯޓުގެ ޚިދުމަތްދޭ އެންމެ ބޮޑު ކުންފުނި ޓީއެމްއޭގެ މެޖޯރިޓީ ހިއްސާ އެމެރިކާގެ ބެއިން ކެޕިޓަލް އާއި ޗައިނާގެ ޓެމްޕަސް ގްރޫޕުން ގަނެފިއެވެ.

މި ދެ ކުންފުނިން ގަނެފައި ވަނީ ޓީއެމްއޭގައި އޮތް އެމެރިކާގެ ބްލެކްސްޓޯން ގްރޫޕްގެ ހިއްސާއެވެ. ރިޕޯޓްތައް ބުނާ ގޮތުން މިހިއްސާ ގަނެފައި ވަނީ 500 މިލިއަން އެމެރިކާ ޑޮލަރު، ނުވަތަ 7.71 ބިލިއަން ދިވެހި ރުފިޔާއަށެވެ. ޓީއެމްއޭގެ ހިއްސާ ބެއިން ކެޕިޓަލްއަށް ވިއްކާލުމުގެ އެއްބަސްވުމުގައި ސޮއިކޮށްފައި ވަނީ އާދިއްތަ ދުވަހުއެވެ.

ބްލެކްސްޓޯން ގްރޫޕުން، ކުރިން ދެ ކުންފުންޏެއްގެ ގޮތުގައި ހިންގަމުން އައި މޯލްޑިވިއަން އެއަރ ޓެކްސީ އާއި، ޓްރާންސް މޯލްޑިވިއަން އެއަރވޭސް ގަނެ، އެ ދެ ކުންފުނި އެއްކޮށްލާފައި ވަނީ 150 މިލިއަން ޑޮލަރަށް 2013 ވަނަ އަހަރެވެ. އަދި އަލަށް އުފެދުނު ޓްރާންސް މޯލްޑިވިއަން އެއަރވޭސް ވެގެން ދިޔައީ މުޅި ދުނިޔޭގައި އޮތް އެންމެ ބޮޑު ސީޕްލޭން އޮޕަރޭޓަރަށެވެ.

ހަތަރު އަހަރު ފަހުން ބްލެކްސްޓޯން ގްރޫޕުން ޓީއެމްއޭ ވިއްކާލާފައި މި ވަނީ ހަތަރު ގުނަ ބޮޑު ފައިދާއަކާ އެކުގައެވެ. އަދި މިއީ ބްލެކްސްޓޯން ގްރޫޕުން އޭޝިއާ ސަރަހައްދުގެ ކުންފުންޏެއް ވިއްކައިލި އެންމެ ފައިދާ ބޮޑު ވިޔަފާރި ކަމަށް ރިޕޯޓްތައް ބުނެއެވެ.

ބްލެކްސްޓޯންގެ ހިއްސާ ބެއިން އަށް ވިއްކާލުމުގެ އެއްބަސްވުމަށް ލަފާއަރުވާފައި ވަނީ ދުނިޔޭގެ އެންމެ ބޮޑު އެއް ބޭންކް ކަމަށްވާ އިނގިރޭސިވިލާތުގެ ހޮންކޮންގ ޝަންހާއީ ބޭންކިންގ ކޯޕަރޭޝަން (އެޗްއެސްބީސީ) އެވެ.

ބެއިން ކެޕިޓަލްއިން ބުނީ އެކުންފުނިން ލެއިޝަރ މާކެޓްގައި ކޮށްފައިވާ ތަޖުރިބާތަކާ އެކު، ޓީއެމްއޭ ގޮވައިގެން އިތުރު ހަރުފަތަކަށް އެރޭނެ ކަމަށް ޤަބޫލުކުރާ ކަމަށެވެ.

ބެއިން ކެޕިޓަލްއިން ގެންދަނީ އެކުންފުނިން ޓޫރިޒަމް މާކެޓްގައި ކުރާ އިންވެސްޓްމަންޓްތައް އިތުރުކުރަމުންނެވެ. އެގޮތުން ޓީއެމްއޭ ގަތުމުގެ ކުރިން އެކުންފުނިން ވަނީ 422 މިލިއަން އެމެރިކާ ޑޮލަރަށް ޖަޕާނުގެ ހޮޓެލް ކުންފުންޏެއް ކަމަށްވާ އޫއެޑޮން-އޮންސެން ހޯލްޑިންގްސް ގަނެފައެވެ. އަދި އިނގިރޭސިވިލާތުގެ މަހުޖަނު އަދި ވަރޖިން ގްރޫޕްގެ ވެރިޔާ ރިޗަރޑް ބްރެންސަންއާ އެކު ކެރީބިއަން ސަރަހައްދުގައި ވަރޖިން ވޮޔޭޖަސް ކިޔާ ކްރޫޒް ލައިނެއް ޤާއިމްކުރުމުގެ މަސައްކަތް ވެސް ބެއިން ކެޕިޓަލް ކުންފުނިން އަންނަނީ ކުރަމުންނެވެ.

ބެއިން ކެޕިޓަލް އިން އަންނަނީ އަވަށްޓެރި އިންޑިއާގައި ވެސް އިންވެސްޓްކުރަމުންނެވެ. އެހެން ނަމަވެސް އިންޑިއާގައި އެކުންފުނިން އިންވެސްޓް ކުރަނީ މާލީ ދާއިރާގައެވެ.