ޓޫރިޒަމް މިނިސްޓްރީން ވޯޓަރ ސޭފްޓީ ޕްރޮގްރާމް ބުރާސްފަތި ދުވަހު އިފްތިތާހުކޮށްފިއެވެ.

މި ޕްރޮގްރާމްގެ ދަށުން ހުޅުމާލެ ބީޗް ސަރަހައްދުގައި ސޭފްޓީ ބޯޑު އިފްތިތާހުކޮށްދެއްވީ ޓޫރިޒަމް މިނިސްޓަރު އަލީ ވަހީދު އާއި މާލެސިޓީ ކައުންސިލްގެ މޭޔަރު ޝިފާ މުހައްމަދުއެވެ.

މި ޕްރޮގްރާމް އިފްތިތާހު ކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން އަލީ ވަހީދު ވިދާޅުވީ މި މަސައްކަތަކީ ރާއްޖޭގެ ފަތުރުވެރިކަމަށް އެޅިގެންދާނެ މުހިންމު މަސައްކަތެއް ކަމަށާއި ފަތުރުވެރިކަމުގެ ދާއިރާގައި ދިމާވެ އެންމެ ބޮޑު ގެންޖެހުމަކީ މޫދުގައި ދިމާވާ ހާދިސާތައް ކަމަށެވެ. އަދި މި ޕްރޮގްރާމްގެ ސަބަބުން މޫދުގައި ދިމާވާ ހާދިސާތައް މަދުވެގެންދާނެ ކަމަށް މިނިސްޓަރު ވިދާޅުވިއެވެ.

މި ޕްރޮގްރާމްގެ ދަށުން ނޮވެމްބަރު މަހަށް ފަހު އެކި ރަށްތަކުގައި ލައިފް ގާޑުން ޓްރެއިން ކުރެވިގެންދާނެ ކަމަށް ޓޫރިޒަމް މިނިސްޓްރީން ބުންޏެވެ. މިނިސްޓްރީ ޖަހާފައިވާ މި ބޯޑުގައި ވަނީ އެކި ނިޝާންތައް ބޭނުންކޮށް، ފަތުރުވެރިންނާއި އާންމުން އަމަލުކުރަންޖެހޭ ގޮތް ދައްކުވައިދީފައެވެ. އެގޮތުން ފަތުރުވެރިން ބީޗްގައި އުޅޭއިރު އެކަށީގެންވާ މިންގަނޑުތަކަށް ހެދުން އެޅުމަށް ވެސް ބޯޑުގައި ވެއެވެ. މީގެ އިތުރުން ބައެއް މުހިންމު ނަންބަރުތައް ކަމަށްވާ ފުލުހުންނަށް ގުޅޭނެ ނަންބަރާއި ޓޫރިސްޓް ޕޮލިސް އަށް ގުޅޭނެ ނަންބަރުގެ އިތުރުން ކޯސްޓްގާޑަށް ގުޅޭނެ ހިލޭ ނަންބަރު ވެސް ބޯޑުގައި ހިމަނާފައި ވެއެވެ.

މި ޕްރޮގްރާމްގެ ދަށުން ހުޅުމާލެ ބީޗް އޭރިއާގައި (ޓްރެކް ސަރަހައްދުގައި) ވަނީ ދެ ދިދަ ހަރުކޮށްފައެވެ. އެ ދިދައިން އަންގައިދެނީ އެއީ މޫދަށް އެރި އުޅެވޭނެ ސަރަހައްދެއް ކަމެވެ.

މި ޕްރޮގްރާމް ރާއްޖޭގެ އެކި ރަށްތަކުގައި ފަށާނެ ކަމަށް މިނިސްޓްރީން ބުނެއެވެ.