އެޓްލެޓިކޯ ދޫކޮށްލާކަން ގްރިޒްމަން ކަށަވަރުކޮށްދީފި

އެޓްލެޓިކޯ މެޑްރިޑް ދޫކޮށްލާކަން އެ ކްލަބަށް ކުޅެމުން އަންނަ ފްރާންސްގެ ފޯވާޑް އެންޓޯނިއޯ ގްރިޒްމަން ކަށަވަރު ކޮށްދީފިއެވެ.

އެޓްލެޓިކޯއިން އާންމުކުރި ވީޑިއޯއެއްގައި ގްރިޒްމަން ބުނީ، މި ސީޒަނަށް ފަހު އެޓްލެޓިކޯ ދޫކޮށްލަން އޭނާ ނިންމާފައިވާ ކަމަށާއި، އާކަންތައްތަކެއް ތަޖުރިބާ ކުރުމަށް ބޭނުންވާ ކަމަށެވެ.

އެގޮތުން ގްރިޒްމަން ބުނީ، ކާމިޔާބު ފަސް އަހަރު އެޓްލެޓިކޯއާއެކު ހޭދަކުރެވިފައިވާ ކަމަށާއި، ކްލަބުގެ ސަޕޯޓަރުންނާއި، ކުޅުންތެރިންނާއި، މެނޭޖްމަންޓް އަދި ކޯޗު ޑިއެގޯ ސިމިއޯނީއަށް ވަރަށް ބޮޑަށް ޝުކުރު އަދާކުރާ ކަމަށެވެ.

ރިޕޯޓްތައް ބުނާގޮތުން އެޓްލެޓިކޯ ދޫކޮށްލުމަށް ފަހު ގްރިޒްމަން ދެން ބަދަލުވާނީ ބާސެލޯނާއަށެވެ. އެގޮތުން އެކްލަބުން އަންނަނީ އޭނާ ހޯދުމަށް މަސައްކަތް ކުރަމުންނެވެ.

ގްރިޒްމަން އޭނާގެ ކެރިޔަރު ފެށީ 2009 ވަނަ އަހަރު ރެއާލް ސޮސައިޑާޑް އިންނެވެ. އޭނާ އެޓްލެޓިކޯ އަށް ބަދަލުވީ 2014 ވަނަ އަހަރެވެ. އެގޮތުން އޭނާ ވަނީ އެޓްލެޓިކޯގައި މިހާތަނަށް ހޭދަކުރި ފަސް ސީޒަނުގައި އެ ކްލަބަށް ކުޅުނު 256 މެޗުގައި 133 ލަނޑު ކާމިޔާބު ކޮށްފައެވެ.

އެޓްލެޓިކޯއާއެކު ޔުއެފާ ޔޫރޮޕާ ލީގު، ޔުއެފާ ސުޕާކަޕް އަދި ސްޕެނިޝް ސުޕާކަޕް ކާމިޔާބު ކޮށްފައިވާ ގްރިޒްމަން ވަނީ އެ ކްލަބުގައި އަމިއްލަ ގިނަ ރެކޯޑްތައް ވެސް ހަދާފައެވެ.

ލަލީގާގެ އެންމެ މޮޅު ކުޅުންތެރިޔާގެ މަގާމު 2016 ވަނަ އަހަރު ހޯދާފައިވާ ގްރިޒްމަން ވަނީ ހަމަ އެ އަހަރު ބެލޮންޑޯ އެވޯޑުގެ ތިންވަނަ ފަހަރު ހޯދާފައެވެ. އަދި އޭނާ ވަނީ މިދިޔަ އަހަރު ބެލޮންޑޯ އެވޯޑުގެ ތިންވަނަ ވެސް ހޯދާފައެވެ.

ފްރާންސް ގައުމީ ޓީމާއެކު މިދިޔަ އަހަރު ރަޝިއާގައި ބޭއްވި ފީފާ ވޯލްޑް ކަޕް ކާމިޔާބު ކޮށްފައިވާ ގްރިޒްމަން ވަނީ 2010 ވަނަ އަހަރު ފްރާންސްގެ 19 އަހަރުން ދަށުގެ ޓީމާއެކު ޔޫރޯ ވެސް ކާމިޔާބު ކޮށްފައެވެ. އޭނާ ވަނީ ގައުމީ ޓީމަށް މިހާތަނަށް ކުޅުނު 69 މެޗުގައި 28 ލަނޑު ކާމިޔާބު ކޮށްފައެވެ.