މެންޗެސްޓަރ ޔުނައިޓެޑުން ފާރަލަމުން އަންނަ އެޓްލެޓިކޯ މެޑްރިޑަށް ކުޅެމުން އަންނަ ފްރާންސްގެ އެންޓޮއިން ގްރީޒްމަން ޔުނައިޓެޑަށް ބަދަލުވާން ނުނިންމާ ކަމަށް އޭނާ ބުނެފިއެވެ.
އެންމެ ކުޑައިރުން ފެށިގެން ޑެވިޑް ބެކަމް ހީރޯއެއްގެ ގޮތުގައި ބަލަމުން އަންނަ ގްރީޒްމަން ބުނީ އެޓްލެޓިކޯގައި ހުރީ ހިތްހަމަ ޖެހިގެން ކަމަށާއި އެހެން ޓީމަކާ މެދު ނުވިސްނާ ކަމަށެވެ.
ކިތަންމެ ވަރަކަށް އެއް ސުވާލެއް އަމާޒުވިޔަސް އޭނާ ދެމުން އަންނަ ޖަވާބަށް ބަދަލެއް ނާންނާނެ ކަމަށް ގްރީޒްމަން ބުންނެވެ.
ގްރީޒްމަން ބުނި ގޮތުގައި އޭނާއަށް އެންމެ ކަމުދާ ކުޅުންތެރިއަކީ ބެކަމް ނަމަވެސް އޭގެ މަނައަކީ ޔުނައިޓެޑަށް ދާން ނިންމައިގެން ހުރުމެއް ނޫނެވެ.
އޭނާ މިހެން ބުނެފައި ވަނީ ބައެއް މީޑިއާ ރިޕޯޓްތަކުގައި ޔުނައިޓެޑްގެ ހަތް ނަންބަރު ޖާސީގައި ދެން ފެންނާނީ ގްރީޒްމަން ކަމަށް ދެކެވޭ ވާހަކަތަކާ ގުޅިގެންނެވެ.
ޔުނައިޓެޑް ހަތް ނަންބަރު ޖާސީއަކީ ބެކަމް އަށް ޚާއްސަކުރެވުނު ޖާސީއެކެވެ. ބެކަމްގެ ފަހުން އެނަންބަރަށް ކްރިސްޓިއާނޯ ރޮނާލްޑޯ އަދި ޑިމަރިއާ ކުޅެފައި ވެއެވެ.
ގްރީޒްމަނާއި ޔުނައިޓެޑާ ބެހޭ ގޮތުން ވަރަށް ގިނަ ވާހަކަތައް މީޑިއާގައި ރިޕޯޓް ކުރެވިފައި ވެއެވެ. އެގޮތުން ޔުނައިޓެޑަށް ކުޅެމުން އަންނަ ފްރާންސްގެ ތަރި ޕޮގްމާ މެދުވެރިކޮށްގެން ގްރީޒްމަން ގެނެވޭނެ ކަމަށް ވެސް އަޑުތައް ފެތުރިފައި ވެއެވެ.
ގްރީޒްމަން އަށް ފާރަލަމުން އަންނަ ކްލަބްތަކުގެ ތެރޭގައި ޔުނައިޓެޑާއި ޗެލްސީ، ޕީއެސްޖީ އަދި ބަޔާން މިއުނިކް ހިމެނެ އެވެ.
