ޔޫއޭއީގެ އައްސޭރިފަށާއި ކައިރިން ގަލްފް އޮމާންގައި ދަތުރުކުރަމުންދިޔަ ކަނޑު އުޅަނދުތަކަށް ގެއްލުންދިން ހާދިސާ ސަރުކާރުން ކުށްވެރި ކޮށްފިއެވެ.
ރާއްޖޭގެ ފޮރިން މިނިސްޓްރީން އަންގާރަ ދުވަހު ނެރުނު ބަޔާނެއްގައި ބުނެފައިވަނީ ސަރުކާރުން ޔޫއޭއީ އާއެކުގައިވާ ކަމަށާއި މިނިވަންކަމާއެކު ކަނޑު ދަތުރުފަތުރު ކުރުމަށް ހުރަސް އެޅޭނެ، އުޅަނދުތަކުގެ ސަލާމަތަށް ހުރަސް އެޅޭނެ އެންމެހާ ކަންކަން ހަރުކަށި އިބާރާތުން ކުށްވެރި ކުރާ ކަމަށެވެ.
ދިވެހި ސަރުކާރުން ވަނީ ބައިނަލައްޤުވާމީ މުޖުތަމައު އިން ޒިންމާ ނެގުމަށާއި ކަނޑު ދަތުރުގެ ރައްކާތެރިކަން ކަށަވަރު ކޮށްދިނުމުގެ އިތުރުން ބައިނަލައްޤުވާމީ ރައްކާތެރިކަމަށާއި ހަމަޖެހުމަށް ހުރަސް އަޅާ ކަންތައްތަކާއި ކުރިމަތިލުމަށް ބައިނަލައްޤުވާމީ މުޖުތަމައު އަށް ގޮވާލާފައެވެ.
އާދިއްތަ ދުވަހު ދިން މި ހަމަލާގައި ހަތަރު ކޮމާޝަލް އުޅަނދަކަށް ވަނީ ގެއްލުންދީފައެވެ. މި ހަމަލާ ޔޫއޭއީ ސަރުކާރުންނާއި ސައުދީ ސަރުކާރުން ދަނީ ތަހުޤީޤު ކުރަމުންނެވެ.
އެމެރިކާ އިން ތުހުމަތު ކޮށްފައިވާ ގޮތުގައި މި ހަމަލާތައް ދީފައިވަނީ އިރާނުންނެވެ.
