ރޯމާއަށް ކުޅެމުން އަންނަ އިޓަލީގެ މިޑްފިލްޑަރ ޑެނިއަލް ޑިރޮސީ 18 އަހަރަށް ފަހު އެ ކްލަބް ދޫކޮށްލަން ނިންމައިފިއެވެ.

މި ސީޒަނަށް ފަހު އުމުރުން 35 އަހަރުގެ މިޑްފިލްޑަރ ރޯމާއާއެކު ހަދާފައިވާ އެއްބަސްވުން ހަމަވާއިރު، އޭނާ ކްލަބް ދޫކޮށްލާކަން ރޯމާއިން ވެސް ވަނީ ކަށަވަރު ކޮށްދީފައެވެ.

ރޯމާގެ ކެޕްޓަންކަން 2001 ވަނަ އަހަރުން ފެށިގެން އަދާކުރަމުން އަންނަ ޑިރޮސީ ރޯމާގެ ޖޯޒީގައި ކުޅޭ ފަހު މެޗުގައި ނިކުންނާނީ ޕާމާއާ ދެކޮޅަށެވެ. މި މެޗުގައި އޭނާގެ ފެއާވެލްއެއް ބޭއްވުމަށް ވަނީ ހަމަޖެހިފައެވެ.

ރޯމާއިން ބުނީ، ޑިރޮސީ ކްލަބް ދޫކޮށްލި ނަމަވެސް އޭނާއަށް އަބަދުވެސް ކްލަބުގެ ދޮރުތައް ހުޅުވާލެވިފައި ހުންނާނެ ކަމަށާއި، ކްލަބުން އޭނާއަށް ރޯލެއް ދިނުމަށް ވެސް ތައްޔާރު ކަމަށެވެ.

ރޯމާއާ 2001 ވަނަ އަހަރުގެ ސީޒަނުގައި ގުޅުނު ޑިރޮސީ ވަނީ އެ ކްލަބަށް މިހާތަނަށް ކުޅުނު 614 މެޗުގައި 63 ލަނޑު ކާމިޔާބު ކޮށްފައެވެ. އޭނާ ވަނީ ރޯމާއާއެކު ކޮޕައިޓަލިއާ ދެފަހަރު ކާމިޔާބު ކޮށްފައިވާ ޑިރޮސީ ވަނީ އެ ކްލަބާއެކު އިޓާލިއަން ސުޕަކަޕްވެސް ކާމިޔާބުކޮށްފައެވެ.

މީގެއިތުރުން އޭނާ ވަނީ އިޓާލިއަން ލީގުގެ އެންމެ މޮޅު ޒުވާން ކުޅުންތެރިޔާގެ މަގާމު 2006 ވަނަ އަހަރު އަދި އިޓާލިއަން ލީގުގެ އެންމެ މޮޅު ކުޅުންތެރިޔާގެ މަގާމު 2009 ވަނަ އަހަރު ހޯދާފައެވެ.

އިޓަލީ ގައުމީ ޓީމާއެކު 21 އަހަރުން ދަށުގެ ޔޫރޯ ކާމިޔާބު ކޮށްފައިވާ ޑިރޮސީ ވަނީ 2006 ވަނަ އަހަރު ވޯލްޑްކަޕް ވެސް އިޓަލީއާއެކު ކާމިޔާބު ކޮށްފައެވެ. އޭނާ ވަނީ އިޓަލީ ގައުމީ ޓީމަށް ކުޅުނު 117 މެޗުގައި 21 ލަނޑު ކާމިޔާބު ކޮށްފައެވެ.