ނިމިގެން ދިޔަ މަހުގެ 22 ވަނަ ދުވަހުގެ ރޭ ށ. ޅައިމަގު "ކުރިމަގު 1'' ބޯޓުން ގެއްލުނު ލުތުފަރު މަރާލި ގޮތް އެ ބޯޓުގެ ފަޅުވެރިން ލައްވާ ފުލުހުން ކުޅުވައިފިއެވެ.

ޅައިމަގު މީހަކު ބުނީ، އެ ބޯޓުގައި ތިބި ބިދޭސީން ލުތުފަރު މަރާލި ގޮތް ފުލުހުންނަށް ކުޅެދިނީ ހުކުރު ދުވަހު އެތަން ހިނގި ތަނުގައެވެ. ލުތުފަރު މަރާލުމުގައި ތިން މީހުން ވަނީ ބައިވެރިވެފައެވެ.

އެ ބޯޓުގެ ފަޅުވެރިންނަށް އަންގާފައިވަނީ ރޭގަނޑު ނިދާ ގަޑި ޖެހުނީމަ ބޯޓު ދުރު ކުރުމަށެވެ. ބާވީސް ވަނަ ދުވަހު  ބޯޓު ފުރަން ތައްޔާރުކޮށްފައި އެރޭ ލުތުފަރު ބޯޓަށް އެރުމުން އެމީހުން ބޯޓު ފާލަމުން ދުރުކޮށް ލުތުފަރު އަރިކަށީގައި ޖަހާ އޭނާ ހޭނައްތާލީއެވެ.

އެ މަންޒަރުތައް ކުޅެދިން އިރު ލުތުފަރު ސިފަކުރުމަށް އެމީހުން ގެންގުޅުނީ އެއްޗެހި އަޅާ ގުޅުވާފައި ހުރި ދެ ގޯންޏެވެ.  ލުތުފަރު ހޭ ނައްތާލުމަށް ފަހު އެމީހުން އޭނާ މަރާލީ ބޯޓުގެ ތެރޭގައެވެ. 

އެ މަންޒަރު ކުޅެނިކޮށް ފެނުނު މީހަކު ބުނީ، ލުތުފަރު މަރާލުމަށް ފަހު ތިން މީހުން ވެސް ތިބީ ގޮސް ބޯޓުގެ ދިރުބާ ކޮޅަށް އަރާ ކަމަށެވެ. ބެލެވޭ ގޮތުގައި އެމީހުން ސައްލާ ކުރީ ލުތުފަރުގެ ހަށިގަނޑަށް ދެން ހަދާނެ ގޮތަކާއިމެދުއެވެ.

'' އެމީހުން ހެދި ގޮތަކީ އޭނާ ޓީޝާޓް ބާލުވާފައި މޭމަތީގައި ވެލިބަސްތާ އެއްސީ. އައްސާފައި ދެން ދެ ކަކޫ ކައިރިކޮށްފައި ކަކުލުގައި އަނެއް ބަސްތާ އެއްސީ. ދެން އެއްސީ ރީނދޫ ހަމެއް'' އެމީހާ ބުންޏެވެ.

އޭގެ ފަހުން އެ މީހުން ލުތުފަރުގެ ހަށިގަނޑު ފައްތާލީ އެރަށު ބަނދަރު ފަޅި ނޫން އަނެއް ފަޅިއަށެވެ. އެ ރަށު ތޮށިގަނޑުން ބޭރަށް ލުތުފަރުގެ ހަށިގަނޑު ބޭރު ކުރިކަން އެމީހުން ކުޅުނު ފިލްމުން އެގެއެވެ. އެ ރަށު ވަލުތެރެއިން ފުލުހުންނަށް މީގެ ކުރިން ފެނިފައިވަނީ ލުތުފަރު ލައިގެން ހުރި ޓީޝާޓާއި އެމީހުން ބޭނުން ކުރި ރީދޫ ހަމެވެ.