ހައްޖަށް މީހުން ގެންދިއުމަށް ހުށައެޅި އެއްވެސް ކުންފުންޏަކުން އެ މިނިސްޓްރީއަށް އެއްވެސް ޝަކުވާއެއް ހުށައަޅާފައި ނުވާ ކަމަށް އިސްލާމިކް މިނިސްޓްރީން ބުނެފިއެވެ. 

އެމިނިސްޓްރީއާ ދޭތެރޭ ހަގީގަތާ ޚިލާފު ވާހަކަތަކެއް ފެތުރެމުންދާތީ އެކަން އޮޅުންފިލުވުމަށް ކަމަށް ބުނެ އިސްލާމިކް މިނިސްޓްރީން ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ޑެޕިއުޓީ މިނިސްޓަރ ޝާފިއު އަލީ ވިދާޅުވީ ހައްޖަށް މީހުން ގެންދާ ކުންފުނިތައް ކަނޑައެޅި ގޮތް ބާތިލު ކުރަން ކޯޓަށް މައްސަލަ ހުށައެޅިއިރު އެ މިނިސްޓްރީއަށް އެއްވެސް ޝަކުވާއެއް ހުށަހަޅާފައި ނުވާ ކަމަށެވެ. 

މި އަހަރު ހައްޖަށް މީހުން ގެންދާ ކުންފުނިތައް އިސްލާމިކް މިނިސްޓްރީން ކަނޑައެޅި ގޮތް ބާތިލު ކުރަން ސިސިލްފަރު ހައްޖު އެންޑް އުމްރާ ގްރޫޕުން ހޯމަ ދުވަހު ސިވިލް ކޯޓަށް މައްސަލަ ވަނީ ހުށައަޅާފައެވެ. 

ސިސިލްފަރުން ހުށަހެޅި މައްސަލާގައި ބުނެފައި ވަނީ ކުންފުނީގެ ތަޖުރިބާއަށް ބަލައި ފަސް ޕަސެންޓް ދޭނެ ކަމަށް ބުނެފައިވާ ކަމަށާއި އެކުންފުންޏަކީ  35 އަހަރު ހައްޖާޖީންގެ ހިދުމަތުގައި އުޅެފައިވާ ގްރޫޕެއް ކަމަށެވެ. ނަމަވެސް ސިސިލްފަރުގެ ތަޖުރީބާއަށް އިސްލާމިކް މިނިސްޓްރީ ދީފައި ވަނީ 0.7 ޕަސެންޓް ކަމަށް އެ ކުންފުނިން ކޯޓަށް ހުށައެޅި މައްސަލާގައި ވަނީ ބުނެފައެވެ.

ޝާފިއު ވިދާޅުވީ އެމިނިސްޓްރީން ބަލާލާފައި ވާނީ ކުންފުނީގެ ތަޖުރިބާއަށް ނޫންކަމަށާއި ކުންފުނިން ތަޖުރިބާގެ ގޮތުގައި ހުށައެޅި މީހުންގެ ތަޖުރިބާއަށް ކަމަށެވެ. އެގޮތުން ތަޖުރިބާގެ ގޮތުގައި މާކްސް ދީފައި ވަނީ ފަސް ކެޓަގަރީއަކަށް ބަހައިގެން ކަމަށް ޝާފިއު ވިދާޅުވިއެވެ.

"އަޅުގަނޑުމެން މި ތިބީ އެ ބޭފުޅުން ހުށައަޅާ ޝަކުވާތައް އެ އޮންނަ އުސޫލުތަކާއި އެއްގޮތަށް ފޯރުކޮށްދިނުމަށް ތައްޔާރަށް،. އަޅުގަނޑުމެންގެ ވަޒަން ކުރުމުގެ އުސޫލުތަކާއި ހަމަތަކާއި ޕޮއިންޓް ދެވިފައިވާ ގޮތުގެ ތަފްސީލު މިހާރު ވާނީ ސަރުކާރުގެ ގެޒެޓުގައި ޝާއިއު ކުރެވިފައި، ޝާފިއު ވިދާޅުވިއެވެ. 

ތަޖުރިބާއަށް އިސްލާމިކް މިނިސްޓްރީން ޕޮއިންޓް ދީފައި ވަނީ އިސްވެރިއެއްގެ ގޮތުގައި ކުރީ އަހަރުތަކުގައި ހައްޖަށް ނުވަތަ އުމްރާއަށް ރައްޔިތުން ގޮވައިގެން ގޮސް ހުރި މިންވަރާއި ހައްޖަށް ނުވަތަ އުމްރާއަށް ނައިބެއްގެ ގޮތުގައި ގޮސް ލިބިފައި ހުރި ތަޖުރިބާ އާއި، ދީނީ މުރުޝިދުންގެ ގޮތުގައި ހުށައަޅުއްވާފައި ތިއްބެވި ބޭފުޅުން މީގެ ކުރިން ހައްޖުގައި އެ ބޭފުޅުން މަސައްކަތް ކުރައްވާފައިވާ މިންވަރާއި ޑޮކްޓަރުން ނުވަތަ ސިއްހީ ދާއިރާގެ މީހުންގެ ގޮތުގައި ކަނޑައަޅާފައިވާ މީހުންގެ ތަޖުރިބާ އާއި ނަރުހުންގެ ގޮތުގައި ސިއްހީ ދާއިރާގައި ހޭދަކޮށް ލިބުނު ތަޖުރިބާއަށް ކަމަށް އިސްލާމިކް މިނިސްޓްރީން ބުނެއެވެ.