ބޮލީވުޑުގެ ސުޕްސްޓާ ސަލްމާން ހާންގެ ބޭބޭ އަރުބާޒް ހާންއާ އެކްޓްރެސް ސަނީ ލިޔޯން އެކުގައި ފުރަތަމަ ފަހަރަށް ފެނިގެންދާ ފިލްމް " ތޭރާ އިންތިޒާރު" މި ވަނީ ބެލުންތެރިންނާ ހަމައަށް އައިސްފައެވެ. 

"ތޭރާ އިންތިޒާރު" އަކީ މިއަހަރު ރިލީޒް ކުރި ސަނީ ލިޔޯންގެ ފުރަތަމަ ފިލްމެވެ. މިފިލްމަކީ ސަނީ ލިޔޯންގެ އެހެން ފިލްމްތަކާ ވަރަށް ތަފާތު ފިލްމެކެވެ. އެގޮތުން މި ފިލްމުގައި ސަނީ ލިޔޯންގެ އެހެން ފިލްމްތަކުގައި ފެންނަ ފަދަ ގައިގޯޅި މަންޒަރުތަކެއް ނުފެންނާނެ ކަމަށް ފިލްމުގެ ޑައިރެކްޓަރު ރާޖީވް ވާލިޔާ ވަނީ ބުނެފައެވެ. 

ބޮލީވުޑުގެ ފިލްމްތައް ދިރާސާ ކުރާ ފަރާތްތަކުން އަންދާޒާކުރާ ގޮތުގައި ސަނީ ލިޔޯންއާއި އަރުބާޒް ހާންގެ "ތޭރާ އިންތިޒާރު" އަށް ހަފުތާއެއްގެ ތެރޭގައި 4.5 ކުރޯޑް ރުޕީޒް ލިބޭނެއެވެ. އަދި ފިލްމް ރިލީޒް ކުރި ދުވަހު ފިލްމަށް 1 ކުރޯޑް ރުޕީޒް ލިބޭނެ ކަމަށް ދިރާސާ ކުރާ ފަރާތްތަކުން އަންދާޒާ ކުރެއެވެ. 

ސަނީ ލިޔޯންއާއެކު އަރުބާޒް ހާން ކުރި ފުރަތަމަ ތަޖުރިބާ ހިއްސާ ކުރަމުން އަރުބާޒް ހާން ބުނީ އޭނާގެ މުޅި ފިލްމީ ކެރިއަރުގައި މިފަދަ ބޮޑު "ޝޮކެއް" ލިބިފައި ނުވާ ކަމަށެވެ. އަދި ސަނީ ލިޔޯންއާއެކު ކުރެވުނު ތަޖުރިބާ ދުވަހަކު ވެސް ހަނދާން ނުނެތޭނެ ކަމަށާއި އަދި ސަނީލިޔޯން އަކީ ވަރަށް ކުޅަދާނަ މޮޅު އެކްޓްރެސްއެއް ކަމަށް އަރުބާޒް ހާން ބުންޏެވެ. 

އަރުބާޒް ހާން ބުނީ އެހެން ތަރިންނާ ހިލާފަށް ސަނީ ލިޔޯން އަކީ ކުރާ މަސައްކަތަށް ވަަރަށް ބޮޑަށް ފަރުވާ ބަހައްޓާ އެކްޓްރެސްއެއް ކަމަށެވެ. އަދި ފިލްމުގެ މަސައްކަތްތައް ކުރިއަށް ދިޔައިރު ވެސް ސަނީ ލިޔޯންގެ އެއްބާރުލުން ވަަރަށް ފުރިހަމަ އަށް ލިބިގެން ދިޔަ ކަމަށާއި ސަނީ ލިޔޯން ފިލްމީ ދާއިރާގައި މަސައްކަތް ކުރަމުންދާ ގޮތަށް ބަލާއިރު ކުރިއަށް އޮތް ތަނުގައި ވަަރަށް ބޮޑެތި ކުރިއެރުންތަކެއް ހޯދާނެ ކަމަށް އަރުބާޒް ހާން ބުންޏެވެ.