އިންޑިއާގެ ފިލްމް އިންޑަސްޓްރީގައި ޝާހުރުކް ޚާން އާއި އާމިރު ޚާން އަދި ސަލްމާން ޚާންގެ އިތުރުން ސައިފް އަލީ ޚާންގެ ފިލްމަކާ އެކު ރިލީޒް ކުރާ އެހެން ފިލްމަކަށް ކުރިލިބިދާނެ ކަމަށް ގަބޫލުކުރާ މީހުން މަދޭ ދެންނެވުން ދޮގޮކަށް ނުވާނެއެވެ. ގިނަ ފަހަރަށް މި ހަތަރު ޚާންގެ ފިލްމް ރިލާޒް ކުރާ ދުވަހު ނުވަތަ އެ ފިލްމަކާ އެކުއެކީގައި ރިލީޒް ކުރާ ފިލްމަކަށް ބޮކްސްއޮފީހުގައި މާ އެދެވޭ ކާމިޔާބީއެއް ލިބިފައެއް ނުވެއެވެ. ނަމަވެސް މިފަހަރު މަންޒަރު މުޅިން ބަދަލުވެއްޖެއެވެ.
ބޮލީވޫޑްގެ ސްޕަސްޓާ އާމިރު ޚާންގެ "ސީކްރެޓް ސްޕަސްޓާ"އާ އެކުއެކީގައި ރިލީޒް ކުރި އަޖޭ ދޭވްގަންގެ " ގޯމާލް އެގައިން" މިވަނީ އާމިރު ޚާންގެ "ސީކްރެޓް ސްޕަސްޓާ" ފަހަތަށް ޖައްސާލާފައެވެ. އަދި އާމިރުގެ " ސީކްރެޓް ސްޕަސްޓާ" ގެ މައްޗަށް އަޖޭގެ "ގޯލްމާލް އެގައިން" އަށް ކުރި ލިބިދާނެ ކަމަށް ގޯލްމާލްގެ ޓީމުން ވެސް އުންމީދެއް ނުކުރެއެވެ.
ޑައިރެކްޓަރު ރޯހިތު ޝެޓީގެ "ގޯލްމާލް" ފްރެންޗައިޒްގެ ހަތަރު ވަނަ ބައި " ގޯލްމާލް އެގައިން" ގައި ފެނިގެންދާ މުހުންމު ތަރިންނަކީ އަޖޭ ދޭވްގަން އާއި ޕަރިނީތީ ޗޯޕްޅާ، ތާބޫގެ އިތުރުން އަރުޝަދު ވަރުޝީއެވެ.
ބޮލީވޫޑްގެ ފިލްމްތައް ދިރާސާ ކުރާ ފަރާތެއް ކަމަށްވާ ތަރުން ބުނެފައި ވަނީ އަޖޭގެ " ގޯލްމާލް އެގައިން" އަށް މިއަހަރުގެ މިހާތަނަށް އެންމެ ކާމިޔާބު ދެ ވަނަ ފިލްމްގެ މަގާމް ލިބޭނެ ކަމަށެވެ. އެގޮތުން މިހާތަނަށް އަޖޭގެ "ގޯލްމާލް އެގައިން" އަށް މިހާތަނަށް 136.07 ކްރޯޑް ރުޕީޒް ލިބިފައިވާ ކަމަށް ތަރުން ވަނީ ބުނެފައެވެ. އަދި އެއީ ހަމައެކަނި އިންޑިއާގައި އެ ފިލްމަށް ލިބުނު އާންމުދަނީ ކަމަށް ވެސް ތަރުން ބުނެފައި ވެއެވެ.
ދެން އޮތީ އާމިރު ޚާންގެ "ސީކްރެޓް ސްޕަސްޓާ" ގެ ވާހަކައެވެ. މި ފިލްމަކީ "ޑަންގަލް" އަށް ފަހު އާމިރު ޚާން ޕްރޮޑިޔުސްކޮށް ރިލީޒް ކުރި ފުރަތަމަ ފިލްމެވެ. މި ފިލްމުގައި އާމިރު ޚާންގެ އިތުރުން ފެނިގެންދަނީ ކުޑަކުދިންގެ ރޯލްތައް ކުޅޭ އެކްޓްރެސް ޒައިރާ ވަސީމްއެވެ. އަދި ފިލްމުގައި ލީޑްރޯލް އަދާކޮށްފައި ވަނީ ވެސް ޒައިރާއެވެ.
ސީކްރެޓް ސްޕަސްޓާ އަށް މިހާތަނަށް ލިބިފައި ވަނީ 41.59 ކޮރޯޑް ރުޕީޒްއެވެ. އެ ފިލްމަށް ކުރިއަށް އޮތް ދުވަސްތަކުގައި ވެސް މާ އެދެވޭ ކާމިޔާބީއެއް ލިބިދާނެ ކަމަށް ދިރާސާ ކުރާ ފަރާތްތަކުން ގަބޫލެއް ނުކުރެއެވެ. ނަމަވެސް ފިލްމް އުފައްދަން ދިޔަ ހަރަދު ވަނީ ފިލްމަށް ލިބިފައެވެ. އެގޮތުން "ސީކްރެޓް ސްޕަސްޓާ އުފައްދަން ދިޔައީ 15 ކްރޯޑް ރުޕީޒްއެވެ.
އާމިރު ޚާންގެ "ސީކްރެޓް ސްޕަސްޓާ" 100 ކްރޯޑް ރުޕީޒް ވެސް ނުލިބޭނެކަން ޔަގީންވެފައިވާއިރު ފިލްމަށް މިހާތަނަށް ލިބިނު ކާމިޔާބީއާ ގުޅޭ ގޮތުން އަމީރު ޚާން ބުނެފައި ވަނީ ދުނިއޭގެ އެކި ހިސާބުތަކުން ފިލްމަށް ލިބެމުންދާ ތަރުހީބާއި ލޯތްބަށް ޝުކުރު އަދާ ކުރުމަށެވެ. އަދި ފިލްމަށް ލިބެމުންދާ އާންމުދަނީއާ މެދު ވަަރަށް ހިތްހަމަ ޖެހޭ ކަމަށް އާމިރު ވަނީ ބުނެފައެވެ.
ނަމަވެސް ފިލްމް ދިރާސާ ކުރާ ފަރާތްތަކުން ބުނާ ގޮތުގައި އާމިރު ޚާންގެ މި ފިލްމަކީ މިވަގުތު ބެލުންތެރިން ބޭނުންވާ ފަދަ ވާހަކައެއްެގެ މައްޗަށް ބިނާކޮށް ހަދާފައިވާ ފިލްމެއް ނޫނެވެ. ނަމަވެސް ފިލްމް ޑިސެންބަރު މަހު ރިލީޒް ކުރި ނަމަ މިއަށްވުރެ ބޮޑު ކާމިޔާބީއެއް ލިބޭނެ ކަމަށް ފިލްމް ދިރާސާ ކުރާ ފަރާތްތަކުން ބުނެއެވެ.
