ޗައިނާގެ ސިނަމާތަކުގައި މިހާރު އަޅުވާފައިވާ ބޮލީވުޑްގެ ފިލްމު "ޑަންގަލް" އަށް ފިލްމު އެޅުވިތާ 4 ދުވަހުގެ ތެރޭގައި ބޮޑު އާމްދަނީއެއް ލިބިއްޖެއެވެ.
"ޑަންގަލް" ޗައިނާގެ 9000 ސްކްރީނެއްގައި އަޅުވާފައިވާއިރު 4 ދުވަހުގެ ތެރޭގައި ލިބިފައިވަނީ 23.4 ޗައިނީޒް ޔުއާން (21 ކްރޯޑް ރުޕީސް) އެވެ.
މިދިޔަ ހުކުރު ދުވަހު އާމިރު ޚާންގެ "ޑަންގަލް" ޗައިނާގައި އަޅުވާފައިވާއިރު "ޑަންގަލް" ގެ ކުރިން ނިކުތް އާމިރު ޚާންގެ ފިލްމު "ޕީކޭ" ވެސް ވަނީ ޗައިނާގައި އަޅުވާފައެވެ. އެފަހަރު "ޕީކޭ"އަށް ޗައިނާއިން ލިބިފައިވަނީ ފިލްމު އެޅުވިތާ 2 ހަފްތާ ތެރޭގައި 100 ކުރޯޑް ރުޕީސްއެވެ.
މި އަދަދަށްވުރެ ގިނައިން "ޑަންގަލް"އަށް އިތުރަށް ލިބޭނެކަމަށް ލަފާކުރެވެއެވެ.
"ޑަންގަލް" އަކީ ރެސްލިން ތެޅުންތެރިޔާ މަހާވީރް ސިންގް ޕޯގަތް އޭނާގެ ގޭގައި ދެ އަންހެން ކުދިންނަށް ރެސްލިންތަޅަން ދަސްކޮށްދީގެން ތާރީހީ ކާމިޔާބީއާ ހަމައަށް ގެންގޮސްދިނުމަށް ކުރާ މަސައްކަތުގެ މައްޗަށް އުފައްދާފައިވާ ފިލްމެކެވެ. މި ފިލްުމުގައި އާމިރާ އެކު އޭނާގެ ދެ އަންހެން ދަރިންގެ ރޯލުން ފެނިގެންދަނީ ބޮލީވުޑަށް މުޅިން އަލަށް ތައާރަފުވި ފާތިމާ ސަނާ ޝައިޚް އާއި ސަނާޔާ މަލްހޯތުރާ އެވެ.
އިންޑިއާގެ ސިނަމާ ތަކުގައި މިދިޔަ ޑިސެމްބަރު މަހު "ޑަންގަލް" އެޅުވި ފަހުން މިފިލްމަށް ވަނީ 385 ކްރޯޑްގެ ބޮޑު ފައިދާއެއް ލިބިފަ އެވެ. މިފިލްމަށް ވަނީ ގިނަ އެވޯޑްތައްވެސް ލިބިފައެވެ.
